SHANING NINGNAN

Moi… moi…
Moi chyaloi nhkoi chyi nma lai
Duhkra ladaw lai tsai wai,
Sumsing Tingnyang tsaw ning ngai
Ninggawn Tawa Hpan Karai,
Mungkan nga yawng dang hta rai
Hkum tsup tsawm htap shing-ra hkrai,
Hpan jahtuk shaman pri rap rai
Shani shana masat ninghtoi langai,
Ningsin ninghtoi galai shai
Chyeju shakawn Wa Karai…..

Oh…Goi ya…
N grin ai mungkan shing-ra rai
Hten run mungkan pin-ra hkrai,
Gyit hkang shabai la n lu mai
Ningsin Jan shang nyip run wai,
Ten hkying ladaw tek tek lai
Jaw prat Usa ni bai bai,
Dingsa shara maku lai
Sayonara mye rap rai,
Happy New Year Ningnan bai
Bawp tau hkalum mani sumsai…..

Aga …
Shaning dingsa ten lai lai
Shaning ningnan du shang sai,
Dingsa yawng hpe shingdu bai
Ningnan yawng hpe shawng lam hkrai,
Shut hpyit mara ahprun rut shatsai
Mara raw tsawra Wa Karai,
Myit masin machyan yawng galai shai
Kraw dung lungpa Hkristu hkrai,
Kungdawn manau awraw rai
Mungkan Ningnan de yawng bai…..

Bai ya…
Hkristu hpunau yawng ni hkrai
Chyeju Janmau lanlak hpai,
Nang shoi nang sha ga hkum pai
Pu gang sin dun lahkrip rai,
Baw hpraw wa rum prat janat rai
Pungkum Wudang lahpa hpai,
Mani na hkanu mani lwi lai
Daini na Jan Shata hpe she bai,
Htawt sit lagaw shawng lam hkrai
Mungkan Ninghtoi yawng gangai….

Karai mungga jum manat
Htunghking laili tum n tat,
Hpaji hparat tam shakat
Sut lu prat pra n-gun dat,
Shinggyim lai sa shachyut kagat
Zet let hkam ja shinggyim prat,
Myu tsaw mung tsaw myit jasat
Tinggyeng myit ja yawng lahkat,
Chyurum hkridun pawn shalat
Sin hpraw salum magyep hkat.

Wunpawng sutgan manu dat
Hkangzing mazing n mai tat,
Ahkying aten jahpu hkat
Ritkawp lam hpe manu dat,
Nanghpam tsep kawp n ginrat
Mungkan pyaw hpa hkindit pat,
Atsam marai zai ladat
Dakrin dalang dahpran sat,
Karai chyeju shakawn jat,
Shaning Ningnan myit jasat.

Bumwa Hkri Ma
(Fuji Majoi, Japan)
1. 1. 2012