JAN BAWK JA (NDF) A USA HKRUN LAM HTE SHARE N'GANG

Jinghpaw Wunpawng amyu sha ni a ahkaw ahkang hte rapra tara ai lam lu na matu shakut nga ai NDF (Jinghpaw Mungdaw) a ningbaw Saranum Labyawng Bawk Ja gaw Zar Ganar hte rau Amerikan mungdan a Maigan Kyithkai Hkingmang Daju Hillary Clinton, Amerikan Lutdaw Amat (Asuya Hkingmang Dat Kasa ni), Amerikan Gumsan Magam a hpaji jaw jauman ni hte hkrum shaga nna UN zuphpawng ni hta mung sa du shang lawm let Jinghpaw Wunpawng Sha ni a lam, Myen mung na amyu bawsang ni a lam hte Myen mungdan a ya yang byin taw nga ai kata lam mung masa ni hpe bawngban sang lang dan nna Amerika hta sa du shanu nga ai Jinghpaw Wunpawng amyu ni hte hkrum shaga ai lam mung galaw nga ai.

Shawng nnan Amerika Sinpraw hkingau (Virginia, Pennsylvania, Maryland the New York) hta shanu nga ai Jinghpaw Wunpawng Sha ni hte hkrum shaga lai wa sai. Dai hpang February 18-20 du hkra Florida mungdaw na Jinghpaw Wunpawng Sha ni hte hkrum shaga bawngban sai. February 20 ya shana de Saranum Labyawng Bawk Ja hpe Jinghpaw Wunpawng Sha ni a ahkaw ahkang hte tara rapra lam makawp maga SHARE N'GANG (ninggang) hpe Florida Jinghpaw Wunpawng Sha ni yawng a malai Jinghpaw Wunpawng Amyu Sharawt Ninghpang (Kachin Development Foundation) a ningbaw Bawmwang Jadan Li hku nna shagrau kumhpa hte rau shagrau ap ya lai wa sai lam na chye lu ai.

Matut nna Saranum Bawk Ja gaw February 21-22 ya shani gaw Louisiana mungdaw, February 23-26 ya du hkra Texas mungdaw, February 2-28 du hkra San Francisco, California mungdaw, February 28-March 2 ya du hkra Omaha Nebraska, March 3 hta Michigan hte Indianapolis ni hkan sa du hkawm na Jinghpaw Wunpawng Sha ni hte hkrum shaga na matu lajang da ai lam na chye lu ai. Dai majaw seng ang ai mungdaw ni the makau grupyin kaw shanu nga ai Jinghpaw Wunpawng amyu sha ni sa du jahkrum na matu mung lajin dat ai.