Slideshow Image 2

YUP TIK TIK

Shadum jahprang ai laika ni masa policy jaw jaw de bai gayin wa na matu ka ai laika ni law ka sai raitim n hti ai majaw n dum ai kun shingnrai hti nga ninglen hti shalai kau ai kun? n dum dingsa gaw shadum nga na ga ai, nawku hpung masha ni hpe pi n dum n hprang dingsa hpung up hpung sara ni gaw chyum laika hte shadum jahprang ai zawn anhte laika ka ai ni mung policy reng ai ni hpe n dum n hprang dingsa laika hte shadum jahprang nga na ga ai law.

J.W shi a pangdung hpe awngdawm shanglawt de bai gayin wa ga ngu lang hte lang ka shadum nga tim KIO ningbaw ni KIA du kaba ni gaw hkaw tsun hpawng shagu hta federal de sa na sha a tsun nga ai, masa gat hkai ai laika pa hkan mung pamphlet laika pa hkan mung KIO/KIA a pandung gaw federal re sha ja ja ka da nga ai, dingre laika mu hti shagu bawnu grai hkanu mat mat re ai lang hte lang rai wa sai.

N ta kaja galai n lu gaprawng ai ten laman kawa n ta gan gap rawng ga ngu ai polic mi re da. Myen hte bawng yu nna nlu jang she awmdawm de sa na re da, shingnrai jinghpaw mung hpe shawng madu uphkang shara lu jang she awmdawm de sa na re da. N dai masa ni gaw myeni a “aten garawt masa” (delaying tactics) kaw kabye hkrup mat sai policy rai taw nga ai. Moi Aung San wa mung bawsang ni hpe 10 ning khahtap aten garawt maw kau yang yawng myen tai mat na re ngu ai “aten garawt masa” hpe jailang na lam mada-ga na yu ga ai.

U Nu a parliament prat hta mung bawsang ni hpe mungmasa ahkaw ahkang jaw ai zawn zawn galaw masu nna shaning 60 ning (1948-2012)jan aten garawt kau nu ai, kaji kajaw mahti jaw masu nna tinang ra sharawng ai de n du mat hkra aten garawt kau nu ai, n dai policy hpe myen ningbaw langai hpang langai lahpa galai matut lit la mat wa ma sai.

U Nu woi awn ai Myen la ni n tsa kaw dung nna mayam yam dip sha taw nga ai hpe hkam mana jin mat sai majaw bawsang ningbaw ni gaw mahtai tam na shakut wa ma ai. Dai majaw 1962 February 24 ya hta Yangon e zuphpawng kaba galaw nna dai zuphpawng hta Myen ni hpe Myen Mungdaw langai galaw na tsun shadut sai, Rapdaw 2 hpe maren mara ahkaw ahkang jaw na tang madun sai, raitim myen ningbaw U Ba Swe hte Takhin Chyit Maung ni gaw kaji pi nhkapla ma ai, mi na zawn sha matut lang na hpe tsun ma ai.

KIO/KIA hpe mung mungmasa jahta na matu ngu a sawng nna 1994 ning hta gap-jahkring-simsa la woi sai, mailung dut sha na, bawngring lam galaw na kaji kajaw ahkang jaw dat ma ai, KIO gaw mung masa jahta ga ngu yang, myendu ni gaw anhte gaw mungmasa la ni n re, asuya nnan pru wa yang dai asuya hte jahta la mu ngu tsun dat sai. Dai majaw KIO gaw mahkoi mi lu ngu ai hte NC lung sai, 2008 Tarakanu madi shadaw lawm sai, maga mi de Dapba-4 na KIA hpyen la ni hpe sat kau ya ai lam ni hkrum nga sai. Ralatapoi shang na hkyen ai n awngdang ai, jahtum gaw jarit sindap gale mu ngu ai kaw kre mat sai, 94 simsa gasadi gaw jarit sindap galaw na matu hpyi shawn la ai hte bung mat sa. Sa ang ai de n sa lu mu ga htaw ra zawn2 le ra zawn2 di nna KIO/KIA hpe aten garawt shana kau sai. Ban langai htum mat nna ban nnan bai du wa yang myit masa ni gaw shai wa ai, mi na zawn n rai mat ai, hpyen wa ra ai maga de gyi lawm mat wa chye ai. Ga shadawn 1961 ning na pandung hpe tawn kau nna 1975 ning kaw na federal ngu de gale mat sai, e n dai zawn re masa de du wa hkra hpyen wa gaw aten garawt nna shadang la kau chye ai.

Ya mung UNFC kaw lawm ai bawsang laknak hpung mada n lawm ai uhpung hpe mada hpe sawng nna langai hpang langai simsa lam la lata mahkret hpang sai, hpaga galaw na ahkang jaw sai, bawngring lam galaw na ahkang jaw sai, Du kaba ni chyawm gaw lu su na re, hpyen ma ni gaw ta ta yaw, dai kata kaw garan sha n jaw yang shada bai galaw hkat. N dai lam ni mahkra gaw “aten garawt masa” hte divide-and-conquer masa n pu kaw galaw dat ai rai nga ai, sa ra ai lam de n lu sa mat na rai nga ai, le ra zawn2 n dai zawn2 di nna shaning 60 ning bai kahtap aten garawt mat na ra ai. Lai sai 60 ning, ya bai 60 ning bai jat pawng 120 ning de bai du mat na rawtmalan rai wa sai.

Rai yang bawsang ni a mungmasa pandung gaw;
1) gumhparw i?
2) arawng aya i?
3) lawt lu lam i?
bawsang ningbaw ni tsun gaw tsun nga ai anhte shakut ai gaw self-determination hte political rights da.

Myen ni gaw shanhte galaw ra ai hpe ngam ngam galaw nga ai, moi na mungdan tarakanu mung unitary state galaw da ai, ya na 2008 tarakanu mung unitary state galaw da ai, shinggan de gaw federal mungdan federal constitution re ngu n dau da ai, hpyi kaw gaw dai hku, shan kata de gaw Amyu Langai Up Tarakanu galaw da, hpamjaw dai hku galaw shanhte ra ai dai sha rai nga ai gaw. Moi na myen ningbaw ni mung dai hku sha hkawm ai, ya na myen ningbaw ni mung hkang dingsa sha hkawm ai.

Rai yang anhte bawsang ni wa hpa majaw dai ram bawja nna myen hte naw shakut pawng na sha jahta nga ai kun? federal ngu ai gabaw shatut nna Myen hte pawng na rai yang myen hpe sinat lang nna kasat n ra ai, masha n si hkam ra ai, lachyum n pru ai, moi na hpushawng hpuba ni sinat lang nna kasat ai gaw awmdawm shanglawt la na matu sinat hpai ai she re.

Manang wa a ka-pau de Nga hta bang na ladat gaw..shana de du jang kawsi kyu ai jahkrai ma maumwi zawn byin na jalu sha re.

Naw Kham

15 comments:

namlap said...

Laika ka sara wa e...na ningmu zawn nga law law bawnu gashin bungli jaw ra nga sai ngu ngai mung mu mada ai mungdan gata kaw na hpaji ningli du ni,up hkang shang lawt du ni a baw nu hpe loi jasan ya nna mungkan ting na ningbaw ning la zup hpawng kaba langai hpe lawan shiga nna hpaji hpyi ai hpawng galaw ra sai ngu mu mada nngai,maigan du ai ni a shang lawt myit jasat hpe mung tang madun na ahkaw ahkang hpaw ten rai sai ngu mu mada ai.mungkan kaw awm dawm mai hpyi ai ladat ni jawm bawng ban nna dai kaw na kaja dik hpe myit hkrum dawdan lam lawan galaw ra sai.nye pandung mung shang lawt awm dawm hpe gasat nga ai hpe ngun jaw ai wa rai nngai law..matut nna gasat nga ai gaw awm dawm shang lawt a matu she jawm myit sa ga ngu yu jut hpe tang dat ai law.

hkunman said...

Gaja dik nga ai Myen sawa a- Myit Kraw kata gade daram manai magaw ai hpe mu mada ai lam rai nga ai.dai hpe kaga a-myu baw sang ni hpa rai n-mu mada ma ai i...? n-mu masu su ma ai i...? mau hpa wa re.Hpa rai gap hkat jahkring mayu ma ai i....? n-gup ga hte laika hte SABOI n-tsa kaw jahta ai hte gaw. Tinang ra ai, ra ai hpe gara hku mung n-lu la lu ai,

Anonymous said...

Ndai ka grau grai hkrak sai, raitim ngai hku nna, mung masa hte hpyen masa hta woi awn nga ai KIO/KIA gaw ndai lam chyu tsun bu ai gaw, anhte Jinghpaw Wunpawng sha ni hta
-masha jahpan nlaw ai majaw kun?,
-lak nak nlaw ai majaw kun?
- Internatioanl madang woi awn na ningbaw nnga nna kun?
-N-gup sha baw law ,ta tut hta gaw, gap nga ai hpyen la ni hkrai chyu sha gap taw nga ra ai majaw kun?
anhte myit yu ra na re.
Ngai langai a ning mu gaw, ya byin nga ai majan hta pyi gaw , ba mat ai hpyen la ni grai law nga ai.. Nkau mi Mare kaba na Hpyen yen dabang hkan sa hkrawng nga ai Mung Shawa Hpyen la ni mung grai law wa ai..
ndai ni a majaw mung rai na re..
KIO/KIO Ning Baw Ning La ni yawng hpe mung grai chye ju dum ra nga ai,,,Masha mang nngu ai kaw shan hte grai shakut nna galaw nga ma ai ngu n-gun la nga ga ai.. Awm dawm rai yang gaw hkak dik she rai le..nmai byin ai lam law law a majaw rai na re.. ngu mu mada ai..

>>>>Rawt Malan kahtawng kaw kaba wa ai>>>>
Ngadam Prang...

Anonymous said...

Ma tut nna gasat sa wa ga.
Shang lawt hpung hku nna,myen hte bawng ban nga ai hpe n ra sarawng ga ai.
Mung dan lu hkra gasat sa na matu woi awn sa wa na hpe ra sa rawng ga ai.Myen hte bawng ban nga ai du salang ni yawng hpe nra sha rawng ai law.
Myu hte mung dan a matu ja ja ga sat sa wa ai myu tsaw ni yawng hpe sha grau nngai.
mau sa! mau sa! mau dik sai!
Hpa ma jaw myen hte bawng ban mayu ma ai kun?
sa ra sha gu kaw du nga ai WP ni yawng hpe myen hte bawng ban ga ai hpe,lam amyu myu hku nna n hkap la na hpe galaw sa wa ga.

myu tsaw mung tsaw said...

an hte w.p mung dan hpe myen mung kaw na ga garan sai lam hpe mung kan ting chye hkra n dau let gap tit tit di ra ai.dai rai yang she mung kan mung dan langai ngai n dai mang hkan hpe sa hparan ya na re.FEDERAL hku sha tsun taw nga yang gaw n mai sai.laga amyu baw sang ni mung FEDERAL tsun taw tim gap hkat jahkrin she galaw nga ma ai.dai zawn re ai a myu ni yawng a matu an hte w.p myu sha ni wa shakut ya gaw n mai ai.gadai amyu ni wa an hte hpe garum nga ma ta?ya aten baw sang yawng gap hkat jahkring ai hpe mung kan kaw na gaw sim sa sai ngu chye na nga ma ai.n dai laga amyu baw sang ni pyi an hte hpe n garum yang an hte hpa majaw shan hte a matu shakut ya na ta?ti nang a gam maka hpe ti nang sha ka ga ngu,yawng hpe hkung ga let.....

nnye la nau said...

Hkrak sai ndai hku tsun dan tik tik di u Hkau wa e,.. Awng Dawm Shanglawt shawng woi galaw na hku law law tsun dan ga!Anhte Ning Baw Ningla KIO/KIA ntsa hta Karai Kasang shaman chye ju jaw nga u ga!

myu tsaw mung tsaw said...

dai zawn gap hkat jahkring tawn ai,hpyen n gun n nga ai laga amyu baw sang ni hpe gadai myen sawa wa FEDERAL jaw na ta?yawng a matu FEDERAL hkrai gajik ti an hte w.p myu sha ni myen sawa hpe gasat nga na ta?ti nang amyu a matu sha shakut ga....

Anonymous said...

asr4jykz

Anonymous said...

hkau wa e nang tsun ai hkap la ai ..moi gaw KIA a matu nga na kyu n hpyi ya yu ga ai.ya ten gaw J.P ngu mying ai ni yawng kyu hpyi nga ai ni hkrai re.majan kaw du nga ai share shagan ni hkrai sha n re,j.p ngu mying ai ni yawng gaw grai myit rawt taw ai ten re ,,n dai hpe anhte ning baw ning la ni yawng chye na re.n dai kalang gaw lam n mai yit mat na re,,,masha ngu ai gaw myit htum mat yang naw mai rawt ai.myit daw mat yang gara hku n mai rawt wa ai..grai sha kut ga.an nau ni a padang hkrum lam hpe

Anonymous said...

Hkau nang na ningmu jaw ai...
Myen hte gaw anhte W.P amyu ni mai nan nmai pawng nga sai.....
Myen ni gaw kaja nga yang self-determination ngu ai ga si hpe pyi n ra sharawng ai hpe asan sha mu lu nga sai...Federal madu up mungdan hku pyi jaw na nre....
Dai majaw, hkau nang tsun ai zawn.. aten na na katsi mat yang amyu sha myit hkrum lam hpe pyi tsang ra wa ai ten du chye ai....
Mai byin yang ya naw kahtet mawt mawt ten, masa hpe lawan galai yang mai na re ngu mu ai....."W.P Lamu Ga Hte Amyu Sha Yawng A K.K Jaw Da Sai Shanglawt A Hkaw Ahkang Hpe Lawan Bai Lu Makawp Gawgap La Lu U Ga"...that's my prayer in the liberator Christ.

Anonymous said...

KIO ningbaw ni wa i n chye. Shahte grau chye dik n mai byin na re hpe shanhte lang hte lang maram yu ngut sai gaw. Hpyen du ni n kau mi ya du hkra awng dawm de sa taw ai sha du ai.Ngai Rangrut la ai shaloi mung awng dawm shanglawt anhte mungdan anhte lu madu hkra nga sharin ya ma ai. Ya bai yu yang dai Rangrut sara ni nan n chye ai re.Dap Dung Dap Nawng hkan na hpye la ni hpe san yu yang mung n chye htai na ma ai.

Jutgert said...

KIA/O lahta salang ni, Myen hte rau Munghpawm(federal) a lam tam taw ai nrai ga ai.
Ga shadawn 2008 ning gawda tara hpe nhkap la ai ngu lachyum gaw, Myen wa a gawng rung kaba(mung masa) hpe jum magra da ai hte bung ga ai.Raitim ladat gaw naw shaw ra ga ai.
lahta kaw na, ndau laika zawn Mung shawa hpe, myit sharawt ai, ladat ni law law ra ga ai.
Awng dawm JW mung de, shakut sawa ga.

shanglawt said...

kahtet kamawt myit rawt nga yang yawng myit hkrum shakut dik nga ai ten lawan shanglawt lu na de she
lawan dawdan gasat shakre ga law.kaja dik ai manu dan dik ai ten ni n'shalai kau ga.

Anonymous said...

Kam u
Ngai myu tsaw langai hku n'na n,gun jaw mayu ai lam gaw, laika ka sara a mu mada ai masa lam yawng grai kaja nga ai,shinggyin masha yang gaw mai kaja ai lam hpe sha myit na re,"kam ai" Rai tim ta tut magam hta grup yin masa,hkrum dup nga sai ta tut lam hta gara shawng galaw ra na, gara ladat shawng jai lang ra na re ngu ai,lam ni hpe 'mung kan masha' yang gaw ta tut hkrum nga ai hte hkrum lai wa na re ngu "kam ai". (Gashadawn) shing gyin masha gaw lani mi na hkrum dup sa wa na lam hpe gadai chye lu ai n'rai nga ai, myit hta gaw ngai 'dai ni' ndai galaw shangut na ngu ai 'self intention' lamang gaw law nga na re, rai tim ta tut daw dan hkan sa galaw ai lam hta galaw ngut mai lu ai lam nga ai zawn n'mai ngut shi ai lam mung nga na re, "kam ai".dai galaw ngut ai lam hta shut shai ai nga ai zawn,mai kaja ai mung nga na re."kam ai" ra sharawng ai lam law ai zawn, galaw shangut mayu ai lam law na re,"kam ai".An hte chyurum sha ni mung "intention" langai sha rai nga ai ti nang a mung dan nga n'na lu mayu ai hkrai rai nga ga ai.ngai hku n'na laika ka sara hpe ga saw mayu ai lam gaw matut n'na chye shangun ga, shadum jahprang ga,rai tim "myit daw shangun ai ga" lam ni hpe mai byin ai ram mi n'htang hti n'na sawn yu ai hte n'gun jaw ga ni hte shadum jahprang yang grau mai nare ngu 'kam ai',bai n'na laika ka sara hpe shadum mayu ai gaw myit hta (KIO/KIA) hpe kam u. chyurum sha ni yawng kam ai rai yang byin tai wa na re. kahtap n'na tsun ma yu ai gaw "kam u"

Anonymous said...

Um laika ka sara wa tsun ai myit yu hpa re nga ai.Anhte Ningbaw ningla ni dum ra ai gaw awmdawm mungdan hpe kadai jaw lu ai ngu ai ningpawt hpe chye ra ai.K.K jaw lu ai kun? re jang K.K kaw hpyi ga.Myen wa lu jaw ai kun,re jang myen kaw manoi nga mu,shade wa masu sha hkrum nga ti mung ya du Federal nga ai gaw,Ndai majan kaw K.K nan ta tut lawm nga ai hpe matut nna K.K kaw mahtai tam nhtawm K.K gaw awmdawm kalaw mu nga nna mahtai jaw yang gaw lu nan lu na sha re.anhte K.I.A/O ning baw ni Myen wu kau ai hkrum mat ai hpan gaw ndi ga law.Cheyju hte lamu Ga hpe hpan ai wa kaw mahtai tam la ga,ngut jang dai kaw atsawm tsap wa nhtawm ngang ngang tsap ga.

Post a Comment