GANOI SHE?

Mungkan hta pra nga ai madu du nga ai prat madang mabyin hpe myit ndik myit n'gut myit htum ai jaw nra lung htawn kaw hkrat si mat na nga lung htawn mahka e tsap- shingdu de du tsap nga ai, gwi daw nang lu ngai ganoi sha ngu ninghpai na kun? Bung wa ai bungshi nsen hpe madaw mara jaw na kun?n'lung hta n'jung langa hta ze nga ai baw kun?

Jahte tam n'mu, shingna shingnyip gayet hkawm nga ai, hpaw tam ni a ga madat shut nna hka katsing wa ra na tsang nga ai kun?annau ni mung myen a matu nding ai maw lanyep hpe kam shut nna, Mung shawa yawng a prat tup shawng lam shingran katsi mat na hpe le ninghpai waw ninghpai rai udi matu tam n'mu ai zawn mau mwi hta labau laika hta kalang bai myit malai lu ai ga si n'len madun nu ga, ganoi she nga ai ten hpe sharai la ga.

Lungpu langai hta hkanghkyi hte sharaw, Panglai hkrudu hte puhtum, chyahkyawn hte sagu kasha, N'gup langai hta hka hte nhprang wan ma aum tawn ai hpa, lahkra lata hta ngarai wan lang tawn nna lapai lata hta hkyen tawn lang tawn ai zawn n'gup hta gaw Simsa lam lagaw lata gaw masha sat na zingri roirip na larau taw nga ai hpe shing lum ngwi pyaw mayu ai shinggyim ahkaw ahkang tam ai, simsa mayu ai ngu lachyum htai na kun? Ten n'tam gasat gala nga ai hpyen n'gun grau htu tawn ai, simsa ta masat htu tawn sai ni hte ya hkyak hkyak gasat gala nga ai dai shara ni hta hpyen n'gun htam 2 grau bai shaja htu tawn jahkrat tawn ai, Thein Sein asuya a ga hpe madat mara ai lam n'nga, ra ai hku galaw nga ai gaw hpyen dap law malawng madi shadaw tawn ai asuya hpe gara madang hku yu nna mai kam na ta? Myit san seng ai hte shada hkungga la ra ai lam n'nga yang, shawng mahkyen hte makyit gaw ngang na nre. Maga mi de April shata lapran ra lata lamang hta masha jahpan masu hte kalang bai mung shawa hpe masu dang la hkyen ai, tinang galaw ai bungli a jaw n'gup hta n'tsin ma aum tawn tim baw hta n'hprang wan n'ga mara hkrum nga sai myen hpe sari sadang mi a nga rai manyi sum sai myiman hte temsi dung nna dinghku masha hkum hkum poi naw la yu ga, simsa lam la tawn sai ni gaw annau ni a matu kasi shadaw kaba rai nga ai.

Lai wa sai 1994 shawng de annau ni dai ni na hta grau sari sadang naw nga ai, myen mung annau ni hpe grau naw hkrit hkungga ai, anhte buga mung hten ai lam nau n'nga ai, annau ni mung htenza ai lam nau n'nga shi ai ya dai ni simsa lam la ai hpang kaw nna lamu ga hten za ai, myusha ni mung Kani ya, shawa Num hte AIDS ana zinli byin ai grau law wa ai hta n'ga, miwa ni hpaga masing hte lamu ga jahten hkrum ai, kyang lailen jahten hkrum sai hta n'ga myen mung hpyen n'gun kaba hte dap jung tawn kau sai, ya kalang mi bai gap hkat wa ai gaw Karai jaw ai mahtai kaja re zawn annau ni yawng mung 100 shadang 85 daram madi shadaw nga sai ten re hte myen gaw grau nna pyi hkrit dik sai ten hta du nga sai. Bum lung yang bum pungding du na mahka she rai sai ten kaw, dahpran n'gun rai nga ai mung shawa a n'gun kaba, nsen kaba hpe madat nna shakre lung ra sai. Matut nna nsum machyi nu ga myen a masa 2 shinglet 2 bra tu ai gasi nru nra, ga n'brat tsun shaga ai hpe nmai na shut ai hte nmai kam ai.

Simsa lam la na madang du wa tim maigan mungdan Asean hpung kaw na rai, EU rai, UN rai rai, US rai lapran Slg ni a man e she ta masat htu yang kaja dik re. Shaning 60 ning jan manhtat gaya nchye hkra nga lai wa nna ya me mungkan hpe gaya ai nga gaw myen a magaw ai n'shawp ai lailen gaw htum sai ngu yawng chye chyalu re. Ladi n'tu yang kyi pyi sha na atsang she rai sai. Tsawra ai hpushawng hpuba, ningbaw ningla ni e lup sung hku hte bung mat sai, tsam daw hkyen sai, maza kanu law law sha hkrum nga sai, yet manam nga sai, lawhpa mana kan gaw kapaw mazang ayai hkyen sai, hpungkraw byin tawn nga sai myen hpe matut nna dating gasat yang gaw Padang hkrun lam majan gaw awng padang dip la na sha rai sai. Myen a pahkam na lawt hkra mahkrun kaba she tam ga.

Ya ten kalang bai simsa ai ga baw jahta wa ai hte annau ni buga hpe hpya sha na matse labye ni gaw kawng lamyin shagreng bang wa nga sai, dai majaw myen hte miwa galaw ai hpaga masing yawng hpe ja ja ninghkap jahkten nan jahten ra ai. Shalau nan shalau, shatsang nan shatsang ra ai. Hpakant hpe kalang bai n'gun hte pat ra ai. Hpyen masa hpe mung nmai shayawm ai hta pawt ru matu ndung de dandi kau ra ai. Myen gaw n'gup gaw bawlaw lata gaw lagyaw majoi hkrang gran tawn masu ai sha rai sai. Majoi grang dakrak ai kumla sha tai nga sai. Annau ni hpe shamyit shakre shagrawt shamat na hku ya dai ni gasat sai re hpe dum chye ra ai zawn ja ja matut gasat dan ra ai. Myen kaw nna tawngban ai hkungga jaw wa ai, pahkam masing nmu ai shani pyi nsha u zawn naw nga dan ra ai, myen hpe gaw n'kaw nlaw, ahkyak nla ai zawn madun dan ra ai, hpa zawn n'nawn ai hpa nsaw ai ladat lang ra sai.Hpyang dik ai myen asuya a ga hpe madat ai gaw madat hkam la nna galaw ai ni madaw shut sai re majaw hpa mi nga nga mung masa nbawngban shangut lu yang gaw simsa lam ga baw nmai lang ai. Teng mung masa bawngban ngut jang gaw shi hkrai simsa chyalu re. Singgu krin rai mat sai annau ni prat hpe hpa hte matsan dum ai ngu sakse madun shatai na ta? Ma ni a nsen hpe ten la nna naw madat ga, annau ni a kashu kasha ma ni a mara kata manyi sumsai ningsam ni hpe ten la nna naw bai nhtang yu ga, matut nna lang hte lang shingran yu ga law.

Galoi mung ganoi she ngu ai hpe laidi kau saga

Baren Numraw