HPA MAJAW

Hpat wat ra lata poi a matu mungdan ting n rau n htau rai nga ma ai. Kaja nga yang gaw ra lata poi ngu na hta n ra lata poi ngu yang grau jaw na kun? 2010 ra lata poi hpe yu ai shaloi, n ra lata poi ngu ai she grau jaw nga ai. Hpa majaw? Mung chying sha ni gadai mung n ra ai, kadai mung n madi shadaw ai, hpyen palawng raw ai ni kadai mung n ra ai ni hpe lata lu hkra lata la ai poi wa n rai i? Ya dai ni mung kadai mung n ra ai ni hpe lu hkra bai lata la na sha re. Rai yang Jinghpaw Wunpawng sha ni a matu hpa baw akyu nga na i? ngu san yang, “anhte gaw mung masha ni lata tawn ai dat kasa ni re majaw” ngu ai ga hpe kahtap htap nna tsun nga ai ni, anhte myu sha ni a matu dai ni hpa lu galaw nga ma ni? Ngu ai gaw mahtai rai na re. Jinghpaw Mungdaw a ninghkring ni re nga nna, myen wa a makau kaw tsap, baw gum nna, tsun ai yawng hpe yau, myen mai dang gumhpuk ya nna she shat lu sha nga na rai yang, n dai ra lata poi gaw anhte myu sha ni a matu hpa lachyum n pru ai. Ra lata me bang tim n bang tim anhte matu, akyu n pru ai sha n ga akyu naw yawm na re. Hpa majaw nga yang, anhte matu hpa n shai tim, myen wa galaw ai hpe madi shadaw ya ai hku re majaw, shi gaw amyat lu ai. Myen wa myi man lu na hpe ra ai ni rai yang bang mai ai.

Anhte Jinghpaw Wunpawng myu sha ni a matu gaw, kaga hpa rai n ra ai. Awng dawm ahkaw ahkang lu na sha ahkyak nga ai. Hpa majaw? Madu a Du hte madu a magam hte rai nga pra hkrat wa ai amyu sha ni re. Myen hpe hpyen sum nna, myen a kata dip sha hkrum nga ai ni nre. Munghpawm galaw ga ngu nna, masu hkrum ai majaw she myen a kata myen dip sha hkrum nga ai ni re majaw, shingyim masha langai a awng dawm ahkaw ahkang, myu sha langai a awng dawm ahkaw ahkang hpe anhte lu nan lu ra ai. Ndai ahkaw ahkang ni lu na matu n ra sharawng nna dingbai dingna jaw ai kadai hpe mung anhte hpyen hku masat nna, gasat nan gasat kau ra ai. Jinghpaw wunpawng mungdan hpe Jinghpaw Wunpawng sha ni up ai gaw mara n re. Kanu kawa myit rawng ai zawn zawn rai, mungkan de gaw simsa lam grai ra nna shakut nga ai zawn galaw, kata lam kaw gaw myu shamat masing hte sat nat zingri nga ai ni, gade lang bawng tim hkrum na lam nnga, n hkrum hkra nan galaw nga ai ni, simsa lam galaw ga, yawng wa marit mi a nga masu tim, sharaw hpyi hpun nna wa shaga ai hpa rai nga ai. Tsaw ra myit ngu ai kachyi mi pyi n lawm ai. Hkungga ging ai Jinghpaw Wunpawng myu sha ni e lai wa sai ten na hpe yu yu nna, du na ten hta dum hprang ra sai. Kalang mi bai masu n hkrum na matu sadi kaba hte sadi ra sai. Kalang sha masu hkrum ai shaning kru shi ning jan tsin yam htawng kaw na n mai lawt nga ai. Kalang bai masu hkrum jang gaw shu mashi ban de she du mat wa na re.

Kaga myu sha ni myen hte yawng simsa lam la ma wa masai, Hpa majaw? Shinggan kaw na yu yang she anya la ai zawn rai tim, shat sha ai hkrai re majaw, nau gaw n hpyang na ma ai. Kadai wa mi sharaw hte jinghku hku mayu na rai ta? Hprawng pru mai na hkat gaw ngam da na ma ai. Ya simsa lam la hpang wa nga ai SSA ni mung mai dang lahkum kaw pyi rai n lu dung yang, bai gaphkat ra wa masai. Kade a majaw rai? Hkun Htun Oo tsun yang mung myen hpe n mai kam ai lam, grai myit yu nna she kanawn ra na re lam tsun nga ai. Kayin ningbaw ni mung myu langai hpe sha simsa lam la nna, kaga ni hpe gasat na ngu ai gaw hkap la hpa n re, Simsa ai rai jang yawng hte simsa ra ai nga nga ma ai. Shaning kru shi jan shari yu sai re majaw, mala la U shoi shoi nna dun lu na daram re myu sha gaw myen mung hta nnga na sai.

Dai ni anhte myen hte simsa lam a matu bawngban nga ga ai. Hpa majaw? Majan hpe bawngban nna jasim ai lam gaw nnga ai. Raitim Mung masa bawngban ai majaw majan sim ai lam rai nga ai. Dai majaw myen hte n bawngban yang n mai ai i? Mai gaw mai ai raitim, myen gaw simsa lam grai ra ai hku nna, mungkan de madun mayu nga ai hta, anhte n bawngban mayu ai ngu ai hku nmai nga ai. N bawngban mayu ai ni hpe mungkan hku yu jang gaw, majan hpe ra sharawng ai ni, jahten sharun mayu ai ni, simsa lam hpe n ra ai ni ngu nna sawn la wa na re majaw, shanhte bawng ga nga jang gaw, bawng lawm ra ai. Bawng lawm ai gaw asum jaw na matu n re. Dai ni Wunpawng Mungdan Shanglawt Asuya woi awn nga ai lam hta Ninggawn mung masa ngu ai policy nga chyalu re ngu ai hpe chye na ai. Kade lang mi bawng tim dai Ninggawn mung masa hte hkrak bawngban sa wa ai hku rai jang, annau ni a matu hpa tsang na lam nnga na re hpe mu mada ai. Simsa lam Komiti ni a (three step) daw masum bawngban na hkrang gaw grai htuk manu ai hkrang rai sai ngu mu mada ai. Ndai hpe n shayawm kau ai sha ja ja manat let n dai hpe lu hkra bawngban sa wa jang gaw anhte myu sha ni a matu, awng dang ai lam kaba rai na sai. Raitim dai ni na myen gumshem a ladat gaw “lu wa ai hpe gaw jawm sha, wa ra ai hpe gaw kaga ga” nga ai ladat rai nga ai. Laika ka ai wa hku nna, shawng de “madu lahkawng rawng ai lungpu” ngu ai ga baw hte kalang shadum lai wa sai. Ya myen mung kaw atsu ya lahkawng rai nga ai hpe asan sha mu lu ai. Thein Sein gaw mung an a gumrawng gumtsa lu ai wa nga tim, law malawng gaw mung masa, maigan hte hku hkau matut mahkai lam, mungdan a galu kaba lam, mungchying sha lam ni kaw sha up hkang ai power nga nna, hpyen dap de gaw shi power nnga nga lu ai. Dai majaw, Shanglawt hpe n gasat na matu matsun ai, myu sha ni hpe simsa lam la na matu bawng ginrat ai lam ni galaw nga ai rai tim, hpyen dap kaw na shi tsun ai hpe n madat ai. Jinghpaw mung de hpyen n gun htu dik dik re, Sam mung de simsa lam la tim hpyen dap hku nna shara maden ai, Sam ni the bai gasat wa ai. Ndai zawn re lam ni a majaw, thing tsing atsu ya hte bawngban jahkrup lu ai rai tim, hpyen dap ni ra sharawng ai lam n rai yang gaw, gade lang bawng, gade yak nna bawng ai rai tim, aten shama, n bung shama sha rai na n hten? Ngu hpaji jaw mayu ai. Ya simsa la mat wa nga ai myu sha ni yawng mung anhte zawn katut sha nna, lani mi bai n htang wa na mara ai. Dai shani myen hte kachyi mi pyi n bawng ai sha, myen mung nga ai myu sha yawng hte myit gahkyin la nna, n gun kaba langai, myit mang langai ban dung langai hte myen hpyen hpe jawm gasat agrawp dat jang n dang na lam nnga ai. Dang nan dang nna, amyu sha ni yawng hpe Jinghpaw Wunpawng sha ni woi awn zinlum, kahpu kawa tai nna, ngwi pyaw dik ai munghpawm mungdan hpe gaw de sa wa na re. Dai shaloi myen gaw tai yin ta kaw n lawm ai majaw, mung hpawm ngu ai kaw mung n lawm mat sai. Shi maigan masha (foreigner) kaw lawm mat sana. Dai re majaw, “Kachin Kaley Nan Htai Ma Aye” n dai ga dik wa na re.

Myu sha ni yawng hpe hkung ga let
Agu Namti