Slideshow Image 2

MYEN HTE BAWNGBAN AI LAM SHUT NGA AI HPE MU SAI N RAI NI?

Myen hte galoi mung n mai bawngban ai lam, myitsu salang ni law law wa lang hte lang tsun shadum nga dingyang re. Shanhte tsun shadum ai ga ni gaw, Karai wenyi shung ai myihtoi ga re, ngu tim n shut na shadu ai. Myen ngu ai ni gaw, Jinghpaw Wunpawng sha ni hte sha n-ga, htingbu htingbyen maigan mungdan gara hte mung, labau prat dingsa dingman hpraw san ai lam galoi n nga ai hpe mu lu ai. Daini ten na Jinghpaw Wunpawng sha ni a mabyin sat lawat hpe yu dat yang, Myen ni hte bawngban shagu grau grau sum machyi ai lam hkrai sha byin pru wa ai hpe mu lu ai.

Lai wa sai bat, March shata 8-10 ya laman, Myen hte Shanglawt ni simsa lam bawngban hkat ai hpe radio, TV, shi laika ni hta matut manoi mu lu, na lu, chye lu saga ai re. Ya ten na sat lawat gaw, Myen ni mahtang, hpyen luksuk n-gun, laknak n-gun myu magup hte anhte hpe dip gamyet roi rip dang sha nga ai ten rai nga ai. Jinghpaw Wunpawng sha ni chyawm gaw, tengman ai maga tsap let, Yehowa Karai Kasang hta sha shamyet shanat kamhpa nna, ninghkap gasat nga ai lam re.

Myen hte sa bawngban ai gaw, Karai Kasang karum la na hpe n kam ai myit a npawt re. Asan tsun ga nga yang, Satan gunglau hkrum ai lam re. Israela amyu sha ni hpe Egutu mung kaw na Mawshe woi shaw la na du sa yang, amyu sha ni law law wa Yehowa a atsam hpe n kam nna, Mawshe hpe dingbai dingna jaw lai wa sai re. Egutu mung na woi pru la lu ai hpang e mung, shawng lam de gaw, Nawnghkyeng hka pat taw nga; shingdu de gaw Hpara-u a hpyen leng ni shachyut nang wa yang, amyu sha ni law law wa Mawshe hpe mara shagun lai wa sai re.

Ya daini gaw, maga mi de simsa lam bawngban masu nna, maga mi de hpyen n-gun kaba hte htim ganaw tik tik rai nga ai hpe gwi du hkra mu chye nga sai re. Anhte n sum na ga ai. N hkrit n tsang kamsham ai myit hte gasat adawt ga. KIO hta lai nna anhte a hpa-awn shaje kaga n nga sai. Jinghpaw Wunpawng Mungdan hpe makawp maga na hta lai nna anhte a labau lit shaje kaga n nga sai. Yehowa Karai Kasang hta lai nna anhte a Madu shaje kaga n nga sai.

Mungkan ting chyam bra nga ai Jinghpaw Wunpawng sha ni yawng hte e, Myen wa gaw, anhte hpe myu shamyit masing hte gasat taw nga sai majaw, yawng nsen langai, manawng langai, myit mang shabawn langai, n-gun lagaw langai, myit hkrum ai lam langai, kamsham ai lam langai hta kahkyin gumdin saga law. Ngai hte n seng ai; ngai kaw n du ai nga nna n myit saga. Kadai mung kadai tinang hta rawng ai n-gun atsam ahkying aten, nyan hpaji, ja gumhpraw myu magup hte shang lawm daw jau saga. Karai Kasang Yehowa wa a padang dawnhkawn hpai let shawng de shanang sa saga law.

Dai re majaw, anhte a myit hkrum lam hpe lawu na ga baw masum hta maju jung shangang shakang da ga ngu saw lajin dat ai law.
1. Myen hte galoi mung bawngban ai lam n galaw na ga ai.
2. Yehowa Karai Kasang chyu sha anhte hpe karum lu ai Madu rai nga ai.
3. Anhte gaw awmdawm lu la ai shani du hkra gasat sa wa na ga ai.

Sumlut Naw
20/3/2012

5 comments:

Mau Jin mau Jin said...

N dai ndau shabra Tawn ai laika gaw, myu sha ting aq matu tengman ai, sak hka hpawk, namuk dara zawn sung ai lachyum rawng nga ai hpe 100 person madi shadaw ai law. Karai hpe chye Ning Len , madu hpe dut sha ai yu da esakarut zawn, kio ni nrai mat ga law.

sheena said...

ur blog is really nice and interesting, You have maintain it so beautifully that I truly like & enjoy it
2000 Chrysler Cirrus AC Compressor

msw langji said...

dear laika hti ai ni,
ngai mu ai ningmu gaw,myen wa simsa lam bawng ban ga nga yang sa nan sa dung ra ai ten re, mungkan pinra ntsa hta kachin ni simsa lam n-ra ai amyu re nga masha ni mu mat na hpe myit yu ra ai,
Tim myen wa hte simsa lam nlu hkra anhte ra ai mung masa Ga baw,Ga si ni sha atsun nga yang kaloi mung simsa na gaw nre dai hku na simsa lam nla ai hku she mai na re,bawngban zuphpwng nsa ai hku tawk-hprut gaw nmai kalaw ai, Bai ndai ten hta K.I.A/K.I.O mung du lung wa ai myen hpyen hpe jau jau kaw na ninghkat kasat ra ai,Ya yang lawu mung de myen hpyen la ni gaw nta sin na ram sha nga taw sai ten hta Yangon,Mandaly hpe laga myusha rawt malan ni hku nna htim zing na matu hpaji jaw ladat shaw sa wa ra ai,bai K.I.A/K.I.O mung ninghkap gasat ai ngu ai Ga si langa nga nhtawm htim kasat ai lam mung kalaw ra ai hpe dum ra ai, M.K.A de nga ai myen hpyen ginjaw de htim kasat ai lam hpe kalang 2 lang ram kalaw dat yang shawng lam de nga ai hpyen ni shindu de ma hkra bai kayin wa na gaw re nga ai law.HPyen man kayin dat ra ai ten du sai. sha ninghkap kasat nga yang anhte marang htu ta du jang manu mana yak mat na ra ai ndai hpe hpyen masa yu maram kasat nga ai ni hte hpaji jaw ai ni ndum nhprang ai hpe gaw mau nma re nga n-ngai.

bu hkawm brang said...

Myen hte bawng sha-gu anhte myu sha ni, sum kaba sum ai lam 100% madi shadaw ai. Hpa na rai a ta? Gara hku galaw ra na ta? Byin mai ai lam 2 nga ai. 1) hkawp myit su ka ai hku myen hte galoi n bawng na. 2) Bawng ban ai shaloi n sum hkra, dang hkra bawng la na. Karai Kasang a mungga hta "Chya-hkyawn ni hpang de dat ai sagu zawn" nga ai lam lawm ai, anhte myu sha ni rai nga ga ai. "myit shing di na, zai byen-ya rawng nga na" matu tsun ai hpe mu ai shaloi, n sum hkra, dang hkra mai galaw ai lam mung nga ai hpe ning mu langai hku tang madun mayu ai. Chya-hkyawn ni hpe hprawng ai, n ga-nawn ai rai yang gara hku byin wa na hpe mungga hta n tsun da ai majaw, mu mada ai teology gaw n hprawng ai htim shang wa ra ai, chya-hkyawn hpe kanawn ra ai ngu ai lam re. Dai ni anhte bawng shagu machyi nga ai lam hpe myit yu yang woi bawng ai ni gara hku bawng nga ga ai kun? Karai Kasang lata ai ningbaw ni kun? shanhte byin dum ram dum nna sa ai ni kun? hpaji jaw ai ni nga ma ai kun? nang dai zawn hpaji chye jaw ai rai yang shanhte hpang de hpaji shalai ya sai kun? dai zawn re hpaji mai shalai ai mahkrun lam nga ai kun? hkap la na ma ai kun? ...??? n dai ni gram ngut sai hpang, chya-hkyawn kata nga ai sagu ni tai wa yu ga. Mungga a shaman ai teng sha hkam la lu na re. Lam amyu myu hku gasat ra ai ten rai sai hpe yawng mu mada saga ai. Sanat latnat hte gasat ai gaw ahkyak kaba dik htum re. Dai zawn sha ahkyak kaba rai nga ai kaga lam ni hte gasat ai n gun ja wa hkra ningbaw ning la ni shakut ra sai. galaw nga ai ngu mung kam ai. Tang du hkra galaw sa wa na matu yawng a lit rai na re.

Lashi Tu said...

Bawng Bang ai ma Kaja ai hku mu mada ai re. Anhte byin mayu ai hpe lu hkra Bawng yu ga! shang hte ni n hkap la jang gaw, Anhte mara n rai sai! Anhte ni WP Mungdan ngu na gawde sa wa mai sai!

Post a Comment