Slideshow Image 2

BAREN DINGHKUNG NTSA NA MANAU SHADUNG (Daw 3)

Anhte Chyurum Jinghpaw Wunpawng Amyu Sha ni a dan dawng dan hkung, laklai dik ai masat dingsat dazik gaw, Manau Shadung rai mali ai ngu yang, yawng hkap la na re, ngu kam ai. Ya ten Manau Shadung hpe mungkan mungdan shara shagu hkan e mu lu tim, langai hte langai gaw, bung hkat ra ai lam rai nga ai. Dazik masat kumla ngu ai gaw yawng maren sha bung pre hkat ra ai.

Anhte Myitkyina-Shatapru Manau Wang na Manau Shadung gaw, mungkan ting chyam bra nga ai Jinghpaw Wunpawng sha ni yawng a npawt gindai kasi kumla manau shadung nan rai nga mali ai. Buga ginra tsan gang hkat tim, uphkang ai mungdan asuya shai hkat nga tim, htunghking langai hta jawm gindun nga ai amyu sha ni rai ga ai majaw, manau shadung mung yawng maren sha rai ra nga ga ai.

Raitim ya ten hta jiwoi jiwa ni a htunghking hkringhtawng n hkan ai sha, baren lapu shingma hta jung tawn ai manau shadung ni nga wa ai hpe mu lu ga ai. Baren lapu ngu ai gaw, Satan nat (Anti-Christ) rai nga ai lam Chyum Laika hta adan aleng mu lu nga ai. Anhte amyu sha ni gaw, moi ji jaw nat jaw naw rai nga ai aten aprat ni hta pyi, baren lapu hpe grai hkrit matsat ga ai re. N hkru n kaja ai rai; mayak mahkak dingbai dingna, sharu shatsang, jahten sharun agung alau shabyin ai Satan nat re, ngu ai hku she hkam la ga ai. Dai sha n-ga, baren lapu hpe hkungga shagrau jaw jau ai lam mung n galaw ga ai.

Moi nat jaw prat na manau shadung hpe baren dinghkung hta n jung ga ai. A.D 300 grupyin Hkrang Hku Majoi e nga pra lai wa ai aten hta Ja Wa Rum Ja gaw, shawng nnan langai lang ngu na Sut Manau dum hpang sai. (1977-300 = 1677) ning du hkra manau dum let nga pra hkrat wa ai amyu ni rai saga ai. Matut nna, (2012 - 1976 = 36) ning laman gaw, Hkristan manau dum saga ai. 1976 ning hta Kahtawlik Sasana 100 Ning Jubeli Manau, 1977 ning hta Hkalup Sasana 100 Ning Jaw Masat Manau galaw ai kaw nna, Jinghpaw Wunpawng sha ni a ji jaw nat jaw prat na manau hpe Hkristan jashawn la nhtawm, Hkristan Manau hku galaw hpang wa sai re. Mungkan hta kajai gumhkawng ai arawng sadang kaba hkam la saga ai re.

Dai Hkristan manau galaw hpang wa yang, manau shadung hpe baren dinghkung ntsa hta n jung ga ai. Baren lapu hpe akyu jashawn lang ai lam n nga ga ai. Baren lapu gaw Satan nat (Anti-Christ) re lam Chyum Laika hta adan aleng asan brang ka madun da ai hpe mu lu ga ai. Lawu na chyum Mungga ni hpe hti yu yang, grau nna dan dan leng leng chye lu nga ai. Baren, lapu, hkanghkyi re ai ni gaw, Satan nat, masu magaw, hkalem hkalau, jahten sharun, agung alau, n hkru n kaja ai amu magam a hkringmang ni rai nga ai hpe she mu mada lu ga ai.

(1) Shingran Laika 12:3, 9; 3:2.
(2) Yoba Laika 2:4-5.
(3) Amo Laika 3: 8, 12.
(4) Daniela Laika 7:1-4.
(5) Shakawn Kungdawn laika 22:13.
(6) Mahte Laika 4:6
(7) Marku Laika 4:15.
(8) Luka Laika 4:6-8; 13:16.
(9) Yawhan Laika 8:44, 12:31, 13:2, 27.
(10) II Korinhtu Laika 2:11, 11:14.
(11) II Petru Laika 5:8

Satan baren lapu (Anti-Christ) a jahtum aten a lam hpe mung mu hti lu nga ai.

(1) Nahte 25:41,
(2) Marku 3:27,
(3) Yawhan 12:31, 16:11.
(4) Rom 16:20.

Madi madun na Chyum ga ni law law naw nga ai re. Daini na aten hta manau shadung hpe baren sumla a dinghkung ntsa e jung sharawt ai magam galaw gyin shapraw dat ai gaw, shut ai lam rai saga ai. Laiza Muklum Sinpraw Majoi Manau Pa na Manau Shadung gaw, yawng a shawng numshawn hku nna baren dinghkung ntsa hta jung sharawt da nga ai. Baren dinghkung ntsa na nambat langai ngu na manau shadung rai sai. Nbapa mare na manau shadung mung, baren dinghkung ntsa e jung sharawt da ai hpe mu lu ga ai re.

Dai rai yang ya hkyak hkyak aten ladaw hta, baren, lapu, hkanghkyi ni anhte amyu sha ni hpe hpyen tai taw nga ai lam gaw, baren dinghkung ntsa hta manau shadung jung nna, baren hpe shagrau sha-a ai majaw rai sai kun? Sung sung myit yu nna bai gram la ga ngu, hpaji jaw mayu ai.

Moi nat jaw prat ni hta pyi n galaw yu ai zawn, Hkristan prat hta mung n galaw ga ai. Htawm hpang prat hta mung, galoi mung, kanang e rai timunsg baren dinghkung ntsa hta manau shadung jung sharawt ai magam hpe n galaw yang she mai na ga ai. Shaloi she Karai Kasang kaw na shaman chyeju wunli hkam la lu na ga ai. Baren dinghkung ntsa hta manau shadung jung sharawt ai lam gara labau hta mung n rawng ai. Hkrai Naw yan Hkrai Gam baren shayi la ai maumwi gaw, manau shadung hte n mai kapyawn kau na ga ai. Maumwi law law nga mali ai. Maumwi shagu a lam hpe manau shadung hta she shalawm yang, naura pa pyi n shang mat na rai nga ai zawn, shalawm ginchya shakap la ai baw mung n rai nga ai.

Baren lapu gaw Satan nat (Anti-Christ) rai nga ai majaw, dai hpe shagrau hkungga aw law ai rai yang, Karai Kasang hpe shut kau ai amyu ni anhte rai sana re. Karai Kasang a man e yubak dingnye hkrum sha wa na re. Madum sumpyi chying bau shupsheng ni dum let, yungwi mahkawn hte ka manawt let, manau nau let Karai Kasang hpe shagrau sha-a na lam Chyum Laika hta law law mu lu nga ai. Baren lapu gaw jahten sharun agung alau re ai Satan nat rai nga ai lam mung Chyum Laika hta mu lu saga ai. Dai rai yang shut ai lam hpe myit malai shading sharai tawngban sit shang yang, grau nna mai kaja nga ai. “ANHTE A AWNG PADANG YEHOWA KARAI KASANG” nga tsun nhtawm, Karai Kasang hte nhtan shai ai Satan a kumla hpe aw law shagrau hkungga ai gaw, hkrit tsang ra dik ai lam rai nga ai. Jet ai awng padang manau hpe mung Chyum Laika hta lawu na hte maren mu lu nga ai.

(1) Express joy in victory:- - - - - I Samuela 18:6-7.
(2) Rejoice in the Lord:- - - - - - -II Samuela 6:14-16.
(3) Religeous exercise:- - - - - - - I Hkawhkam Labau 15:25-29.
(4) Time to dance:-- - - - - - - - - Hpaji Ningli 3:4.
(5) Sacred processions:- - - - - - I Hkawhkam Labau 13:6-8.
(6) Victory celebration:- - - - - - Pru Mat 15:20-21.

Karai Kasang hpe shut kau ai mara n galaw hkrup hkra sadi sahka let, amyu sha hte mungdan hpe pawn ba ga. Woi awn ga. Sharawt ga. Teng sha awng dang lu na re.

Nhpan Ja Ra

2 comments:

msw langji said...

Sarama Kaba Nhpan Ja Ra madi madun ai ndai lam gaw grai nan myit yu ahkyak la let,anhte myusha ningbaw ningla ni gwi gwi daw dan sa wa ai hpan re.Shin gyim masha manaw manang ni u hpung u hpawng myi man kayin kau na hta K.K hpan madu anhte myusha ni ntsa kaw na myiman kayin mat na gaw hkrit kaba nan re hpe dum ra nga ai law.Ndai ya byin nga ai majan mung K.K kaw manoi ai ningbaw ningla nkau myi hte kamsham ai mung shawa kyuhpyi ai majaw sha awng dan na lam naw mu hkam sha ga ai.lama na Baren hpe aw law ai ningbaw ni sha ap nawng woi awn taw yang gaw dai ni anhte myusha maka gaw hkrit hpa kaba re nga ai.Dai majaw ndai Baren lapu lawm ai manau shadung hpe a grawp kabai kau ging nga ai law..

padang yesu said...

SARAMA KABA Nhpan Ja Ra madi madun ai hpe anhte W.P sai rum ni myit yu ga.CHYEWA NING CHYANG K K hpe she manoi manat kam sham nga sai wa,ya hpa rai lapu baren hpe me shagrau ai zawn npawt tawn ai zawn myit masa ni nhtan de bai kayin wa nga ai.Ya jang la kau ga.shing nrai yang K K A ari dagam kau ai myu ni tai wa chye ai baw re.dan re na rai nga ai AUNG DAWM de ndu hkraw nga ai.nla hpawt ga la gun kau ai hte gaw AUNG DAWM PADANG HKRAK lu na re.

Post a Comment