Mungkan mungdan ni a tara mahkrun hta masha asak hkrung nga na matu hkrit hpa, tsang hpa lam nga, shim lam nlu mat ai rai yang laknak hte makawp maga la mai ai ahkaw ahkang nga nga ai.Jinghpaw Wunpawng myu sha kaji, kaba, num/la yawng gaw ya ten hta asak hkrung nga pra lu na matu hkrit hpa, tsang hpa hkrai rai nga sai majaw shim lam nlu mat sai amyu tai nga saga ai. 2011 June shata kawn myen hpyen wa gasat shamyit taw nga ai majan gaw masha zawn nsawn hkra gap sat, mu ai shara hta magra rim zingri, roi rip, dum nta ni hpe wan nat kau ya, nawku jawng ni hpe jahten kau ya rai galaw nga ma ai. Dai zawn galaw nga ai majaw ya ten masha anhte amyu sha mun 75000 jan gaw myen hpyen a tsin yam hpe hkrum sha taw nga saga ai. Ndai gaw gara hku mung masu kau nmai ai, malap kau nlu sai sakse ni rai nga ai.
Jinghpaw wunpawng ni munghpawm gaw de wa ai hta bang kau ai arang hpe bai lu na matu shaning 17 ning ting gap gasat ai lam hpe dawm kau hkra di nna si mani ai ladat hte myen hpyen ni galaw ai mung bawng zup hpawng de shang lawm ya ai hte, shanhte ra sharawng ai hku ka ai mungdan up hkang hkrang rip kawp tara hpe mung ngut kye ai du hkra myit galu kalang hte a la ya ai, ahkaw ahkang ni hpe tang shawn sai. Rai tim,Jinghpaw Wunpawng ni hpe hpyen hku nna sha masat tawn da nga ding yang rai nga ma ai. 17 ning gap gasat dawm da ai aten e mung shang lawt hpyen la ni hpe gram sat kau ya ai, buga mare masha ni hte ayai aya byin ma hkra gawt kahkyin ai, lam waw, hpyen dap galaw re amyu myu hku grai zing ri lai wa masai.
Dai majaw sung sung li li myit yu ra hpa gaw, si mani ai ladat hte sha amyu sha ni a ahkaw ahkang hpe bai lu la na rai kun? myu sha ni a asak hkrung lam mung shim naw lu hpa rai na kun?
Kasi la hpa lam; Hpu nau Wa amyu masha ni hta ya ten reng greng ai laknak lu madu da ai majaw myen hpyen asuya gaw hpa nan nhkra gui hkrit nga ai, n’gui roi sha lu masai, shang lawt lu ai mungdan langai zawn nga pra lu nga masai. Wa amyu masha ni hpe moi lai wa sai ten e grit nem ai amyu masha ni re ngu jawm yu kaji lai wa masai re. Ya ten hta reng greng ai lak nak madu da lu ai hte law htam ai hpyen hpung byin lu nga masai. Na lu ai ram nga yang, mana maka tsan ai de gap bun lu ai baw myawk kaba ni, nbungli gap jahkrat kau ya lu ai baw sinat kaba ni, gawt hkawm mai ai baw jak sinat kaba ni hpe madu da lu sai lam na lu nga ai.
Rai yang, hpa majaw jinghpaw wunpawng ni hta, wa hpu nau ni zawn lak nak lam, hpyen masa lam hta nreng lu nga ga ai kun? Karai Kasang hpe shawng hkap la lu ai amyu ni, sut nhprang hpring tup re gin ding aga hpe madu da lu amyu ni, hpaji jan mau gup la lu ai mung law, maigan du ai masha mung law, masha jahpan hku nna nga yang mung grau law na re.
Masha jahpan nlaw la ai Jinghpaw wunpawng myu sha ni shawng lam de matu nna atsawm asak hkrung nga pra lu na matu hte, asak shim lam hta makawp maga na matu gaw hpau nau wa ni zawn reng greng ai laknak lu ra, greng ai hpyen hpung byin wa ra sana re law.
Zau Hkum
0 comments:
Post a Comment