HPYEN KYEP DIN N PU KATA

Myen hpyen gumshem kyep din n pu kara kaw mazang n rin, dip kabye apyet anut ayai katut ai annau ni, shaning galu rawng tawn ai u zawn shadawn kawk kata kaw, lahpan kata na hka zawn ra ai ten dusat zawn sharen hkrum ai, n'sun n'ang ai hku jahkrit shama sharu shatsang dip roi zingri hkrum ai, tsaban ka-ang hkup she lai mat wa sai. Shinggyim ahkaw ahkang ginlut hkrum ai gaw n'tsun ja she rai mat sai, dai ni myu shamyit shamat ai masa she du pru hkra annau ni mazang n rin hkam lai saga ai, myen hte matut kanawn na kumla masa n pru sai ngu mu ai. Shanhte a myu kaba masa gaw galoi lai na n're, laknak hte awmdawm shanglawt lu hkra ninghkap gasat sha mai sai.

1-Hpyen gumshem ladat hte up hkang ai masa grai n'galai shai shi ai.
2-Ra lata galaw ngut nna rapdaw dung ai langai mi ladu she hkrum lai sai tim anhte matu mung masa hpyen masa galai shai lam n'mu ai.
3-Myu ga garan hkra bawsang myu sha yawng ga garan hkra galaw ai.
4-Myen mungdan myen myu langai sha up hkang lu hkra galaw ai.
5-Tara up hkang je yang hkrang galai shai ai masa n'nga ai.

Annau ni hte bawsang ni hpe madu mungdaw up hkang shangun mayu ai masa kachyi mi pyi n'mu ai. Mungdan kata teng simsa ngwi pyaw ai ra yang, tara je yang ai lam tengman ra ai, ya gaw Sumlut Roi Bu a mabyin hpe maram yu nna chye mai ai zawn dai ni annau ni hpe n'tara dik ai majan je gasat nna dusat hta grau, roi rip sat shamyit ai, n'ta nat ai, yamnga sat shamyit ai, lu malu mu mamu yawng jahten ai, la kau ya ai, dai gaw simsa mayu ai masa kun?

Tengman ai tara je yang ai tara hkrang n'nga ai kaw annau ni mung masa lam bawngban yang hpa tara hte shen nna dawdan hparan na ta? 2008 ning gawda ai tara n'galai ai kaw kaning rai mung masa manaw shapraw nna bawngban sa na ta? Dai ni hpe yu nna annau ni hpe hkalem masu tawn ai masa sha pru nga ai.

1-Mungdan simsa lam hte mungdaw up hkang ahkaw ahkang jaw mayu ai teng yang,
{A}Mungkan de tara shang simsa lam n'dau shabra ra ai.
{B}Gap hkat jahkring na tara shang n'dau shabra ra ai.
{C}Rawt malan ai hpung yawng hpe N'Tara ai hpung, gasu kabrawng hpung ngu nna n'dau tawn ai hpe Tara shang jahkring n'dau shaprai ra ai. 22 ning tup ma chyai chyai ai zawn masu lai wa sai hpe chye nga ninglen myit galu galang sharen nna shinggyim nauna myit hte rapdaw shang nna mung masa bawngban lu hkra hte dai ni jet ai simsa lam lu na matu kahtet dik ai myiman hpe shingdu tawn kau bawngban yu nga saga ai. Myit san seng ai hte mung masa bawngban shangut nna jaw ai mahtai jawm tam hparan na masa manaw n'sam n'pru nga ai kaw n'bung kata ga laban shaga ai hte sha bung nga ai. Teng simsa lam n'ra ai hpe chye mai ai.

2-Munghpawm masa
Munghpawm mungdan langai hku masing hkrang jahkrat nna galaw sa wa ai lam kachyi mi mung n'mu ai, myu kaba hku tsaban kaang hkup tup up hkang ai ladat n'lai ai.
[a] Bawsang shamyit shamat masing jahkrat nna hkrang shapraw ai.
[b]Myu kaba ladat hpe hpyen gumshem up hkang tara ladat hte matut up hkang shagrin la ai.
[c]Myen mungdan hku hkrang shapraw n'dau ai. Munghpawm masa n'nga hkra galaw ai.
[d]Myu kaba ladat hte lachyen ginhka garan up hkang ai, bawsang ni hpe ahkaw ahkang njaw ai.
[e]Panglung ga sadi ahkyak n'tawn sai.
Lahta de na lam hpe yu nna munghpawm n'nga sai ngu chye mai ai zawn, lawu de na hpe maram yu nna grau chye mai ai.
[i]Hpaji laili laika shagyip shagyeng ai. Madu myu laika n'mai sharin ai.
[ii]Makam masham shagyip shagyeng ai, wanglu wanglang n'mai nawku daw jau ai. Makam langai sha ngam hkra galaw ai.
[iii]Htunghking shamyit shamat ya ai.
[iv]Bawngring rawt jat lam yawng pat kau ya ai.
[v]Hpaga sut masa yawng pat ai.
Ndai zawn re mabyin masa kaw hpa rai munghpawm ngu naw myit mada nga na ta?

3-Mung masa.
Mung masa teng bawngban mayu yang hpa rai 22 ning tup ten shama chyai nga na rai ta? Hpa rai masu hkalem nga na rai ta? Dai ni mung hpa rai hpyen masa grau shaja na ta? Ngwi ai pyaw ai masa de yawng ra ai. Hpa rai anhte myu sha ni hpe rapdaw n'mai shang hkra galaw ai. Tsa ban kaang hkup tup hpyen gumshem kyip din npu kaw, ga pyi ja ja nmai shaga hkra hkam sha wa saga ai. Ya mung gasat nga ai majan shaja nga ai, kasu kabrawng hpung nga nna n'dau shabra nga yang annau ni hpa hta yu nna mung masa numshawn shaw sa lu na ta? Roi taw nga ai le. Masha n'sawn tawn nga sai kaw myu sari shayawm kau nna shawng na man hpang tawn kau na kun? Munghpawm lachyum nkam shapraw sai, madu mungdaw up hkang lam gaw hkum tsun mayu sa, BGF nga ladat masu ai, 2008 tara hte masu ai, lachyen lahka garan shapraw nna langai hpang langai simsa lam ga baw dat nna lau la ai hkalem ai, ahtu shabra ai kaw annau ni hpe chyu lachyen ginhka nna dasang gasat ai gaw mung masa bawngban mayu ai ladat nre. Dr. Tu Ja, Jan Bawk Ja ni hpe simsa lam ninghpai nna rawpdaw nlu shang hkra galaw ai.

4-Hpyen masa
[a]Tara n'lang ai maigan mung maden hpyen zawn masa shapraw gasat ai.
[b]Garan shapraw nna anhte hpe hkrai gasat ai.
[c]Roi rip ai, masha sat ai, mare nat ai, lu malu, mu mamu yawng jahten ai, mya la kau ya ai, yamnga sat shamyit sha ai, shinggyin roirip ai, myu shamyit ladat hkrang shapraw ai, gasat ai.
[d]Shinggyim ahkaw ahkang n'yu ai, hpyen yen tsin yam byin hkra singgu krin byin hkra galaw gasat ai.
[e]Maigan hpyen langai hku gasat ai.

Ndai ni hpe yu nna annau ni hpe madu up hkang mungdaw jaw na masa kachyi mi pyi npru ai. Mung shawa rapdaw she rai sai tim hpyen gumshem ntsa tsang du kaba ni daru aya jum nna naw up hkang ai. Democracy nga she marawn nga tim ntsa tsang hpyen du ni n'galai shai ai. Awng San Suu Kyi hte pawng mat nna grau dam lada ai myu kaba lahkam chyawm htawt ai, NLD hpe nmai kam ai. NLD masha kaba ni annau ni lam hta hpa tsun ya yu sata? Ahkyak la nna lit la nna jet ai mung masa numshawn shaw na hku manaw shapraw nga ai kun? Tsang ra ai. Kawa n'ngut kau da ai myu kaba masing hpe Thein Sein asuya hte chyawm gawgap ai lachyum sha re.

Grau nna bawngban na manaw shapraw magang wa nem roi hku grau hpyen man shaja wa ai, manang wa nkam bawngban nga sai kaw annau ni kaya n'su ma wa shabawng hpyi ai hpa byin nga ai. Rapdaw galai hpyi galai tim masa n'galai ai ni hte hpa rai naw bawngban chyai na ta? Sari alu rai nga dan saga, Nu Wa hpu shawng hpuba ni e ja ja li li myit yu ga. Ma chyai chyai nga na kun? Matut bawngban na kun?

Teng mungdan simsa mayu yang
1-Simsa lam n'dau ra ai.
2-Gap hkat majan jahkring n'dau ra ai.
3-N'Tara hpung kasu kabrawng hpung nga n'dau shaprai ra ai.
4-2008 gawda ai tara lai na n'dau ra ai.
Asawng jahpoi nga ai myen hpe mungdan n'lu dingsa gasat sha mai sai.
Gumshem myen hpyen kyep din npu kata kaw na lawt pru saga law.

Baren Numraw