Mung hpawm myen mung hpe up sha nga ai myen asuya gara hpung ni mi galai tim, myen mungdan gyi ayai mat nmai na lam, amyu baw sang yawng myit hkrum ra na lam, mungdan daru magam ngang grin nga na lam ngu ai mung masa lashum (motto) ni hpe chyu manat lang nna ban hte ban up hkang sha mat wa ai hpe mu lu na ga ai. Dai lashum ga ni hte shanhte hkrang gran galaw taw nga ai lam ni hpe lachyum shaw, mahtai shapraw yu ga yang;1). Munghpawm myen mungdan gyi ayai mat nmai ai lam: Munghpawm mungdan gyi ayai mat wa hkra galaw taw nga ai gaw shan hte myen hpyen asuya ni madaw nrai ni? Munghpawm mungdan ngu ai hpe, shanhte hte myen ni hte maren arang bang nna jawm gaw de da ai amyu Jinghpaw Wunpawng ni hpe gaw nyet kau nna, shanhte ra ai hku kam mara uphkang sha taw nga ma ai nrai ni?
Munghpawm a spirit ngu ai maren mara akyu hkam la lu ra lam, tinang myu sha ni a kam maka hpe ti nang myu sha ni sha gyin shachyaw la ra na ngu ai ru di ahkaw ahkang ma hkra hpe nyet kau, nhtan shai ai hku galaw, jahten shabyak lam galaw taw nga ai gaw kadai ni madaw rai kun?
Jinghpaw Wunpawng ni myen amyu ni hte shang lawt arau la mat wa ai hpang kaw nna shanhte hpe dik hkra myit machyi hpa, tsep kawp kam hpa nmai mat sai lam sakse ni hpe 2011, June shata e shanhte maga na htim gasat taw nga ai majan ni gaw myi chyaw sakse rai sai. Majan mabyin ni gaw Jinghpaw Wunpawng myu sha ni ladaw hta galoi nhkrum yu ai sawng dik ai majan tsin yam rai nga ai.
Munghpawm myit, jinghku myit kachyi mung nnga masai, shing gyim nau na myit mung kata, masha arawn alai nlang matse labye re du sat lai ladat hte gasat shamyit taw nga ai lam ni gaw tsep kawp arau nga nmai sai sakse ni rai sai. N’tara ai dai zawn dang sha ai lam hpe gara amyu masha rai tim hkam sharang lu na nre.
Dai zawn galaw ai lam ni gaw munghpawm hpe daw ayai mat hkra jahten shabyak galaw ai lam rai nga ai. Shanhte galaw ai zawn anhte myu sha ni galaw nga ga ai kun? N’tara ai lam, njaw ai lam hte, nteng man ai lam ni galaw ai Hparishe ni, tara agyi ni hpe Madu Yesu gaw ningdang/ding lun nga lam hte, nbung ai kandang hkum jawm hpai mu nga nna Karai a mungga chyum laika hta mu lu na ga ai.
Bai nna Awng San Kaw mung Pang Lung Spirit ngu ai gaw munghpawm kaw nna di garan mat ai lam nre ai, myit hkrum ra ai lam ni re nga nna hkam la nga lu ai. Myen hte kaga amyu bawng sang yawng gaw mung masa lam hta mi rai rai, sut masa lam hta mi rai rai, hpaji lam hta mi rai rai, hkamja lam hta mi rai rai makam masham lam hta mi rai rai maren mara re ai akyu hkam sha lu ai, tara rap ra ai hku nna uphkang ai lam ni she Panglung Spirit re ngu tsun mai na nrai i?
2). Amyu bawsang yawng myit hkrum ra na lam: Myen nre ai kaga amyu bawsang ni yawng gaw amyu langai hte langai a mungdaw ni hta shang madu up sha ya ai lam nnga ai, shada gasat hkat ai lam n’galaw ai hta n’ga jet ai mung hpawm bai byin wa na matu jawm gaw gap shakut taw nga ai re.
Myit n’hkrum ai lam nga ai gaw shanhte myen amyu masha ni rai na nhten! Hpa majaw ngu yang shanhte amyu bung ai shada mung masa lam yen hta ningmu/ makam, pandung nrum ai majaw shada adawt hkat, uhpung law daw bra rai nga ai hta n’ga kaga amyu baw sang ni a ntsa e tawn da ai mung masa policy ni mung nrum jawng re mang hkang ni nga ai hpe mu lu na ga ai.
3). Daru magam ahkang aya ngang grin nga na lam ngu ai hta; Ndai lam hpe Laika ka ai wa a mu jut gaw munghpawm mungdan hpe lu madu up sha lu nga ai myen asuya gaw prat tup mung hpawm a tsaw dik ai daru magam (power) tsaw dik htum shara ni hta jum madu da nga lu na, kam ai hku galaw lu na ngu ai masa re ngu mu lu ai. Hpa majaw ngu yang akyu rawng ai mundan a shadip jahprang up hkang tara (rule of law) ngang grin ra ai ngu tsep kawp ntsun da nga ma ai.
Jet ai democracy mungdan ni hta up hkang magam gun masha yawng gaw mung masha ni hte jawm gaw de tawn ai mungdan a up hkang tara (state constitution law) hpe manu shadan let hkan shatup up hkang ai lam nga nga ai. Mungdan a up hkang rip kawp tara (state constitution law) gaw mungdan a tsaw dik htum ai daru magam rai nna, de ntsa hta Karai Kasang sha nga ra ai. Maga mi hku nna tsun ga nga yang democracy ngu ai gaw rule of law nga ra ai lam re. Ntara ai joi si hpe Karai Kasang matsat nga ai lam, rip kawp tara a ntsa kadai ma nnga lu ai (no one is above of the law) nga nna Karai mung ga chyum lai ka hta mung rawng nga ai.
Mung hpawm myen mung ngu hpe jawm gaw de dat ai kawn ya dai ni du hkra amyu Jinghpaw ni (mung masha) hte kaga amyu bawsang ni gaw mungdan a up hkang hkrang rip kawp tara ni hpe gaw de ai lam hta shang lawm lu ai lam nnga yu nga ai. Tinang a mungdaw hta tinang myu sha ni ra sharawng ai hku, htap htuk manu na hku nna mungdaw a up hkang rip kawp tara (state constitution) hpe pi nmai galaw la nga ga ai nrai ni?
Ga dim; Nkau mi ya ten democracy lu sai ngu nna kabu ai ni nga n’hten!, ASSK amat tai wa lu sai majaw kabu ai ni mung nga na re. Ndai democracy gaw myen amyu bawsang ni matu sha re, anhte amyu Jinghpaw ni matu kabu hpa lam hpa nan nmu lu shi nga ai. Hpanda madu Karai Kasang anhte amyu Jinghpaw ni hpe hpan shalat dat ai hte ap jaw tawn da ai SHANGLAWT ai myu masha ahkaw ahkang, Shanglawt Ai Hku Nga Pra Lu Ai Mungdan hpe bai madu la lu ai shaloi she kabu aw law na lam nga na re law.
Zau Hkum
April 9,2012
0 comments:
Post a Comment