MARE MASHA NI HPE HPYEN NINGGANG SHATAI NGA

April (25) bat Masum

Jinghpaw mung hta Myen Asuya  hpyen dap ni gaw, mung shawa mare masha ni hpe hpyen ninggang shatai ai lam galaw nga ma ai lam na chye lu ai. KIA Hpyen Dap ni gaw mung shawa, mare masha ni hpe jahte n tam, makawp maga ai hpe chye ai majaw, mung masha ni nga ai mare hkan, mare masha hpe makawp ninggang shatai nna hkan shingbyi hkawm nga ai lam ni hpe na chye lu ai.

Ndai zawn mare masha ni hpe ninggang shatai ai majaw, (19-4-2012) ya shani, Jinghpaw mung, Na Lung mare makau, Man Mau mare hta gasat gala byin nna, Myen ni gap ai Myawksi pala a majaw, nta (1) hkru hten za mat nna, Jan. E-Lan (ေဒၚေအလွန္း) gaw kan hte lagaw lata hkan e sinat kaba pala ni hkra nna si sum mat nna, Jan. E-Hom (ေဒၚေအဟြမ္) hkra lata lahpum e sinat kaba pala si hkyep hkra hkala nna Laiza tsi rung e tsi tsi nga ai. Ndai Man Mau mare hta Myen hpyen dap ni kaw nna kring mading dap jahkrat nna kaduk htu, laknak kaba ni shadun rai mare hpe ninggang (Human Shield) shatai nna nga nga ai. Mare masha ni hpe mung n pru shangun, matut mahkai phone ni mung la kau ya ai lam na chye lu ai.