NUM SHAWN

Dai ni na ten rawt jat galu kaba lawan dik nga ai mungkan gaw Media hte mungkan hpe up hkang nga ai gaup nga ai masa de shamu shamawt sa nga sai mungkan re. Mungkan hpe up hkang nga ai Tara ritkawp a shawng na n'gam zawn mungdan langai mi a rawt jat galu kaba wa na hte ngang grin wa na, ngwi pyaw simsa wa na a shawng lam yawng hpe shading sharai, matsun shadum nga ai kasa kaba, arang kaba, sara munu kaba the mung bung nga ai.

Tengman ai Tara dawdan gram lajang sharai ya ai tara slg tara agyi zawn mung rai nga ai. Shiga hpe jaw ai n'jaw ai ngam tawn n'mai, mu ai hpe mu ai hte maren, nga ai daram nga ai hpe tsawm ai hpe tsawm ai hku asan apra magap da n'mai, shihtawn shi shabra ya ai ahkyak dik ai jak rung kaba langai hte mung bung ai. Sum tsan myi kaba, na kaba, bawnu kaba hte bung ai.

Media mung masa prat, gum san lata shagrau prat, media ra lata shingjawng prat, media gat lawk, media hpaga ginlen prat, media majan prat she du nga sai. Dai ni chyurum ai annau ni mung media laknak kaba hte ja ja ningmu jawm shaw mahkrun jawm tam lu ai ten hpe manu shadan nna lawan htim gasat shamyit ra sai. Dai ni myen ni shapoi lawm ai kara shiga dap gara nsen htawn shapoi dap mi rai rai, madu myen myu a matu hkra machyi na zawn re hpe shiga ngam kau ya ai. Shiga manai kau ya ai tara masa hta hkra n'hkra re hku manai makai shanut htawn shalai nga ai hpe annau ni hkam sha ra nga ai zawn media majan hta annau ni loi matut shaja ra nga ga ai. Media hta English hku shanhte law law shiga masu lu shabra hkra galaw lu ai, dai ni annau ni tim tinang lu ai shiga ningmu mabyin ni hpe law law, myu hkum hkra lawan ka shabra ra nga ga ai. Annau ni hte seng ai shiga ni hpe ga hkum hkra hku ka shabra len shabra ra nga ga ai, shaloi she mungkan mungdan law law gaw annau ni a lam hpe grau chye wa nna grau madi shadaw wa na re.

Dai ni annau ni a rawt malan hkrun lam a lachyum hpe lawan lawan asan pra mungkan na chye wa lu na re zawn annau ni a mabyin masa hkam sha nga ai hpe asan lawan chye wa na re, dai gaw annau ni hpe mungkan na dai ni na hta grau madi shadaw garum n'gun chyawm dat wa na masa kaba lahkam nan re. Dai ni media majan a majaw annau ni a lam hte mabyin kaja hpe grau chye wa ai zawn tai hpyen wa a nhkru n'shawp ai matse labye tara n'lang hpawdan hpawlam ladat hpe grau chye wa ai zawn myen laika english miwa gala laika ni hte sha n'ga annau ni du nga ai mungdan na laika ni hte law law lu tang madun ka madun mat wa lu yang annau ni a Padang hkrun lam majan gaw lawan awng padang dip la lu na re.

Media majan hte lawan htim gasat ga. Lu ai chye ai atsam yawng hte ya jang n'sim n'sa gasat ga. KNO ni hku nna madung lit la n'gun shadat numshawn woi shaw lu yang gaw majan masam sa na re.

Goi... tsaw ra dik ai ma yan nau ni garen nga ma dawng, hkrap nga ma dawng, Wa, wa na hpe la nga ma dawng.

Masin n'si masin machyi ai oi.... Shanglawt lu ra sai....... RAWT.

Baren Numraw