RAWT SAGA

Rawt u ahpre ale awu asin matsat shabat yawng tinang dangpa kaw kap chyap nga ai n'hpu hte rau ahpu jahkrat kau nna n'gun dating myit nden shaja myit marai shading nna, ya jang rawt saga, hkum hkring hkum yup nga, hkum ung ang nga, hpa rai manu dan dik ai hpu dik ai ten hpe ali ahti, angawk angak yupsu yupma n'dum shami nga shalai kau yang kyindut hkiba jamjau ai nsin kaba gaw du nyi magang wa nga ai, asak naw hkrung nga yang n'sin grai n'du shi yang myi kaba hpaw u, Na latsun su u, myit marai n'gun nden shaja nna yajang rawt saga. Padang dip la saga.

Chyahtum chyalai n'gun rawng ai Yehowa hte rau rai nga yang hpa myit tsang ra nga ta? Teng man ding hpring san seng ai Yehowa hte rau hkawm saga ai majaw lam yawng hta annau ni Yehowa ra awng sharawng ai hku hkawn sa na grai ahkyak ai, n'teng n'man ai, n'jaw n'ang ai, ntara ai, nding hpring ai yawng hpe koi kau ra nga ga ai mungkan na myi ju na zawn re ai mabyin, mahkyen masing hpe ja ja koi kau ra nga ga ai, EU UN shinggyin ahkaw ahkang yu hparen dap kaw nna, sak nhpring ai hpyen ma lahkawn ai hpe grai karu tsun madi madun wa nga ai, annau ni a hpaji chye ai janmau gup sai ni hpe mung shara jaw jai lang chye na grai ahkyak nga ga ai.

Tsaban kaang hkup lai di wa sai annau ni a rawt malan hkrun lam galu gaw chyinghkraw grai galu wa sai dinghku majan re majaw myit masam sa ai lam mung masa hpyen masa masam sa hkra hpyen man kaba hpaw nna n'gun dating htim gasat, zing gasat ai de majan je ai de lachyum shapraw masing jahkrat sa wa yang mungkan a madi shadaw ai mungkan a ahkyak la ai hkrum na re, shaning grai galu ai hkrun lam hpe yu nna mungkan mungdan law law gaw annau ni a hkrang gran sa nga ai mung masa hpyen masa hpe asan nmu gwi ai zawn poi yu ai masha zawn rai nga ai,lachyum pru ai, lachyum pru ai lamang jaw ai hta she masha ni ga kaba, n'gun kaba dat na re, dai majaw Putao U zawn re myen hpyen a hkawm sa yak ai, matut makai yak ai mare kaba ni hpe langai hpang langai zing madu ai de hpyen man yawng ra sai, dai nrai yang shaning 60 ning a lagaw hkang mung masa hpyen masa chyinghka hpe kalang naw ja ja li li sung sung hpaw yu ga. Kam hpa hkalut ai kaw na lawt sa wa saga, chyurum ai annau ni hpa rai naw mau nga, ung ang nga na ta? Yehowa hte rau Zing madu htim gasat ai madang hpe shatsaw nna gasat yang mungkan mungdan law law mung anhte hte rau rai na re..... Rawt u htoi u... Na maidang na nhpu hpe ahpu kau nna rawt saga.

Libra (Libya, Siriya) ni hpe kasi hku tawn nna masing jahkrat ga, teng man ai hte ja ja gwi gwi sit sa ai a jaw UN hte mungkan mungdan law law a madi shadaw ai, ya annau ni ndai hta grau naw shaja sit sa yang gaw hpyen yen ni hpe grau garum wa na hta n'ga, annau ni Di jang kaba dun tawn nna la na sha rai sai, Myigyina hpe jahpawt shat sa shadu sha nna annau ni a awmdawm dawng hkawn hpe jung kalai na ten rai sai, Rawt saga…

Democracy hpung ni Amerikan EU UN Asean ni hte shinggyin ahkaw ahkang hpung ni kata lam shamu shamawt gang ashun nga yang annau ni mung n'sim n'sa nut ga. Zim nga nmai sai zim nga yang lamu ga hte n'lung ni ngoi garu wa na rai sai. Hpang lam nmai hting nut n'mai n'htang sai, simsa lam galoi nmai la ai, mung masa hte tinang mungdan lamu ga hpe annau ni nan nlu up dingsa galoi simsa lam ga baw nmai tam ai, dai ga baw dat ai hte rau mayam rai sai ngu myit la ra sai. Dai ni na annau ni a ningbaw ningla ni a ga hkaw mi gaw yawng mayawng hpe ngwi pyaw shangun lu ai zawn yawng mayawng hpe duhka jaw shangun lu nga ai hpe ja ja myit dum ga.

Nga ngam, shat ngam shamat ai ni ntai saga. Myu a matu galoi mung rawt na jin jin di tawn ga, Sekhkwi rawt saga, Awng Padang Yehowa hte rau----- Rawt.

Baren Numraw