* Htani htana agrin agrau let, hpung rawng nna a nga ai Yehowa Karai Kasang Wa e, Nang anhte hpe tsawra matsan dum yu lanu lahku makawp maga let, shaman chyeju hkum sumhpa hti n dang hkra jaw ya nga ndai law. Na a mying ningsang hte Na a mau hpa chyeju hpe shakawn shagrau ga ai law....* Anhte Jinghpaw Wunpawng amyu sha ni hpe Nang Madu shaman jaw ya ai mungdan lamu ga hte dai hta rawng ai nga manga, manu dan nhprang sutgan rai ni yawng a majaw mung chyeju dum shakawn ga ai law...
* Jinghpaw Wunpawng sha ni hpe Na a amyu, Na a wudat na Sagu Hpung shatai la nit dai. Nang hpe mu mada, Nang hpe kamsham ai Hkristan ni tai wa lu ga ai majaw mung chyeju dum shakawn kungdawn ga ai law.....
Mungkan shinggyim masha ni rai nga ga ai majaw, shut shai mara ni mung law law lu ga ai; ra rawng ai lam ni hpe mara raw ya rit. Matsan dum la rit.Hpyi nem tawngban ga ai law.......
* Amyu sha ting a shut hpyit lam dam mat ai mara ni mung hpyi nem tawngban ga ai. Anhte a mara ni yawng hpe raw kau ya rit law.......
* Jinghpaw Wunpawng sha ni hpe Na a lam sharin ya rit. Na a myi man nhtoi jahtoi ya rit. Nang madun dan ai hpe mu lu na myi hpaw ya rit. Nang tsun ai nsen na lu na ahkang jaw rit. Nang shangun ai bungli galaw lu na atsam jaw rit. Nang ra ai lam hta jai lang akyu jashawn rit. Na a lam sakse hkam lu na chyeju jaw rit. Nang hpe nawku kamsham daw jau lu na lam madun ya rit. Satan a agung alau kaw na shatsan shagang la rit. Na a wudat hte Na a Sagu Lawng hta prat dingnawng ningngai nga lu mi ga, matsan dum la rit.......
* Nang chyu sha Jinghpaw Wunpawng sha ni a Karai Kasang rai nga ndai majaw, kaga karai shaje hpe shamyet shanat ai awu asin arawn alai kaw na hkye la rit law.......Haleluyah....
* Anhte hpe jaw da ai mungdan hte sutgan ni a ntsa madu lu na, up sin lu na, makawp maga lu na, hparan lu na ahkang jaw rit......
* Na a hpung shingkang hpe shadan shadawng lu na, sakse hkam lu na, shada da myit hkrum nga lu na hte Na a man e manu dan ai amyu byin tai lu na matu matsan dum la rit...........
* Nang lata la sai Jinghpaw Wunpawng sha ni a matu, shawng lam majan pa tsap nga ai share shagan ni yawng hpe bau sin ya rit. Awng padang jaw ya rit. Tengman ai maga tsap ya rit......
* Nang lata la sai Na a amyu Jinghpaw Wunpawng ngu ai ni, daini tsinyam tsindam yawn madai hkrum nga ga ai. Roi rip nat sat zingri ai hkrum nga ga ai. Madu e Na a hkra lata ladawn ya rit. Mawshe hpe Nang jaw da ai dawhkrawng daini Jinghpaw Wunpawng sha ni hpe naw jaw la rit. Goliat hpe dang kau ai Dawi a lakle daini Jinghpaw Wunpawng sha ni hpe naw jaw la rit. Gedeon hpe hpaw ninghtan ya ai hpyen hpung, daini Jinghpaw Wunpawng sha ni hpe naw hpaw ya rit.......
Jinghpaw Wunpawng sha ni a akyu hpyi ai nsen hpe na ya rit. Hkye Hkrang la ai Madu Yesu Hkristu a mying ningsang hpe gang let akyu ara jawm hpyi ga ai law................ Amen.
14-4-2012
0 comments:
Post a Comment