GWI DAM NSEN

                            Yaw ai madu n nga ai gwi,
                            Kam ai hku wau di swi;
                                             Pangwa manghkang sanglang ai,
                                             KIO salang ni wa rai-------------da.
                            Dai laika shabra ai wa,
                            Myen a mayam teng rai na;
                                             Rudi ruhpang n nga ai,
                                             Wunpawng sai jet n rai ndai;
                            Gwi lagut daru ai---------da,
                            Nra lapau htim magra;
                                             Gwi a lam loi tsun mayu,
                                             Atsawm matsing da ga lu!
                            " Gwi maigaw uhtoiroi graw,
                            Bai la kau yang – mi na raw;
                                             Gwi kaja gaw hki n sha,
                                             Gwi mana gaw hkan kawa;
                            Agwi a nrung shamat,
                            Shantau mu jang mai kangat;
                                             Gwi wa gwi sa lagaw shapu,
                                             N chye yang hkum ka malu;
                        Gwi hte lanyau zawn hkum rai,
                         Manang wa hpe hkum jahpai;
                                             Gwi manawn ningpau karau,
                                             Wa manawn numhkaw shalau;
                            Gwi mung hkraw nna nyang taw,
                            Masha mung hkraw nna hpyen maw;
                                             Gwi a hki mata n tsai,
                                             N teng ai ga hkum shalai;"
                            Ndai ram nga jang matsing nu,
                            Myu tsaw myit she shagreng u;
                                             Ya hpang de laika ka jang,
                                             Ningka mying mung she ka bang;
                            Shanglawt Tsing zawn leng leng ka,
                            Manai makai hkum shaga;
                                             Madang tsaw ai laika ngau,
                                             Myu a matu manu grau;
                            Lachyum maka hkawn hkrang hkra,
                            Hti shawa hpe hkungga ra;
                                             Nang agwi n rai teng yang,
                                             Gwi nsen gaw n pru ang;
                            Myen a mayam hkum tai yaw,
                            Wunpawng asai manu tsaw;
                                             Myit malai nu hpunau wa,
                                             Kahkyin gumdin ga yaw ya--------.

                                                                                      Shanglawt Tsing
                                                                                      29.5.2012

Matsing ;          ;"Miwa kaw na KIA hpe gap ai Myen, Miwa n re." Ngu ai ga baw hte ka shabra   ai laika chyalam a Ninghkan, Shanglawt Tsing shagawp dat ai Ga Shagawp re.