HPYEN MAJAN

Mungkan kaw byin lai wa sai hpyen majan ni hta tara ai, kaja ai, tengman ai lam galoi mung n nga yu ai. Sum ai wa hpe gaw shut ai hku chyu mu nna mara jawm shagun wa masai. Raitimung awngdang ai wa a matu chyawm gaw, tara ai hku jawm mu nna shi gaw shakawn shagrau ai hpe hkam la lu ai.

Adolf Hitler gaw shawng nnan daw hta shi a hpang hkan ni hpe htap htuk ai matsun jaw let woi awn wa ai majaw shakawn madi shadaw ai hpe hkam la lu nna tsaw htum ai madang de woi du wa lu ai raitim, madang langai kaw du ai shaloi grup yin hte jahkrup ai lam n-galaw, hpaji jaw wa ai hpe mung n madat, Jews amyu wan 6 daram hte hpawn masha wan 11 sat kau ai hpang majan shagu kaw sum wa sai. Gram sharai la nlu matut sum mat wa na masa dan dawng wa sai majaw aten galu tsaw ra wa ai sumtsaw jan Eva Braun hte hkung ran la ai hpang lahkawng ya hta shan a asak hpe je yang la ai hte prat hpe ginchyum dat la manu ai.

George Washington gaw 1775 ning hta Commander-in-Chief byin wa sai. Daw dan shut ai majaw majan lang hte lang sum wa yu ai kaw na sharai la ai majaw hpang e awngdang kaba lu wa sai. Shi gaw American mungdan kaw shawng nnan na President byin tai wa nna tsaw htum ai sari sadang lu wa sai. Hkring sa nga ai hpang gumra jawn let sun kaw hkan gawan hkawm nga yang marang madi manyap byin mat ai raitim hpun palawng n galai ai sha yup ai kaw na machyi sawng mat nna 14 December 1799 shani hta asak 67 ning du ai shaloi Madu Yesu hta yup pyaw mat wa sai.

Ndai ningbaw ningla lahkawng a asak hkrung lam hpe hkaja yu ai shaloi masha wunawng uwa a shawng lam matu kasi yu la ging ai yan rai nga ai. Magam bungli hta matut awngdang masan sa na kumla pru timung, KK a hkang da ai tara hpe malap mali rai ai shaloi tinang a asak hpe pyi tinang nan je yang ra ai nhtoi du wa sai. Raitimung KK hkang da ai tara hpe shadik shatup ai wa chyawm gaw hkrat sum na hkinjang kaw du tim awngdang ai lam ningmaw de bai du wa chye ai.

Uphkang dawdan ai mahtai hpe hkaja yu ai shaloi ntsa lam asak hpan 3 shai nga ai hpe mu lu ai.
1. Asak 50 a lahta na ni gaw hpa lam hta mung azin ayang myit sumru yu nna daw dan chye ma ai.
2. Asak 30 - 50 lapran na ni gaw lawan ladan daw dan nhtawm ta tut galaw sa chye ma ai.
3. Asak 30 a lawu na ni gaw shanhte a hkum hpe computer daram ram ai hku hkam la chye ma ai.

Dai zawn re ai masa hta la kap nna nbung ai asak aprat (generation gap) shai nga ai hte maren ningmu hta shai nga ai rai nna daw dan ai hta mung shai wa ai. Shing re ai majaw ahkyak ai bungli daw dan ai hta malawm magawm hpan 1 hte 2 hpawng chyawm nna daw dan ai ladat lang lu yang gaw grau hkum tsup ai mahtai lu wa mai ai. Raitimung majan hte seng nna bawng jahkrup ai shaloi gaw na chying shim ra ai bungli re majaw ta tut lit shang la na ni sha chye mai ai mung nga na re.

Masha ngu ai gaw tinang lu nga sai madang yawm mat na hpe tsang ai ni hkrai re. Dai majaw uhpung 2-3 chyawm hpawng nna jawm galaw ra ai bungli nga wa yang, seng ang ai ni a arawng aya madang hpe makawp maga da lu ai hkam dahka lam nga hkra shawng jahkrup ai ladat gaw bungli awngdang lam lu wa na matu na chying ahkyak ai lamyi rai nga ai. Lai wa sai nhtoi hta marang htu ai hpe aten dep ahkaw ahkang n la kau lu ai hpe lahpawt lama dum ai lam ni n byin hkra tau hkrau myit shalawm ra na re. Lai wa sai mabyin masa lam ni gaw shawng lam hta sharai la na matu mai kaja ai kasi ni rai nga sai. Dai majaw, "Everything happens for the best" ngu hkam la ai gaw madung rai na re.

Hpu nau ni e, sung sung myit yu ga. Salang Kaba Adang, Du Kaba Lasang Awng Wah, KDA, NDAK, KNO, KIO ni laknak hpai nna rawt malan wa ai gaw Wunpawng Myusha ni a lawt lu lam lu wa na matu yaw shada ai pandung langai sha re. Raitimung masa hta hkan nna aten langai kaw n bung ai yi-ngam hta shang tsap ra wa saga ai hpe yawng myit dum nga chyalu rai nga ga ai. Dai zawn rai nbung ai yi-ngam hkan e lit la wa ai majaw mahkrum madup hpaji amyu myu mung lu wa saga ai. Hpang lani mi hta rap ra ai ngwi pyaw simsa lam lu wa na matu dai ni gaw hpu nau ni yawng pyaw tim yak tim rau rai lu na matu bungli kaba hpang dat saga ai.

Ndai zawn re ai ningmu ni garan kachyan galaw hkat na matu na chying shim ra ai hpe yawng myit dum chyalu re. Raitim, ndai lam gaw satan wa yawng asan sha mu chye nga sai majaw kaga mi sha-ip da nra sai. Brang lang tsun shaga nna brang lang ta tut kaw ahkyak la ra saga ai. Myutsaw hpu nau ni e... anhte langai hpra du nga ai shara ni gaw, pa layang bumlang hkaraw panglai maigan mungdan hkan shanu hkawm nga ga ai. Kade tsan gang hkat tim, myit masin hte kraw lawang gaw tinang a mungdan kaw rau rai nga ga ai.

Shada mara shagun hkat ai hpe koi yen kau nna ngangkang ai kahkyin gumdin lam lu wa hkra tinang a hkum hpe tinang nan lit jaw nhtawm shakut sa wa ga. Yehowa gaw anhte hpe n-gup aga hte tsun n dang hkra manu rawng ai mungdan jaw da ya sai. Dai mungdan hpe madu la lu na matu ahkaw ahkang mung shalat ya dat sai. Jaw da ya ai mungdan hpe uphkang sa wa lu hkra kamhpa ai myit hte tutnawng e kyu hpyi let shakut sa wa ga law.  Teng teng awngdang wa na re.

Hpauk Htann