N dai lam hpe hpu nau n kau mi tsun dan mi nga lajin ai majaw, dang ai made tang madun ai re. Laiwa sai 1946 ning August (15) ya hta, Myitkyina Manhkring mare, lawu tsang jawng wang e, Jinghpaw Mung Myitkyina, Manmaw, Sinli na Du (100) hpe Mr. Stevenson hte Mr. North wa Myen hte rau Shanglawt hkum la, la jang Jinghpaw ni hpe dip sha na lam tsun ngut ai hpang, 1946 November (15-18) ya hta Myitkyina, Manmaw, Mungmyit Sinli na Du Salang (2,000) daram Wunpawng Jinghpaw ni mung myen mung Shanglawt a lam hta gara hku shang lawm na matu, Myitkyina Shatapru Manau pa e du zup ma ai. Bai nna, mung masha (5,000) jan lawm ai padang manau mung ka manau masai.
Dai Du Salang ni hta n kau mi gaw, myen hte Shanglawt rau la ga nga ai, n kau mi gaw English kaw a ding tawk hpyi ga nga ai ni mung nga ma ai. Sama Duwa kachyi mung n hkraw ai. Dai ten Jinghpaw ni hta BA awng ai gaw, Duwa Shan Lum hte Duwa Hkun Nawng sha re ai lam chye lu ai. Sama Duwa mung English hpe sa shaga na ngu ai gaw, nyau a du de dingsi noi shangun ai yu hpa rai nga ai. 1942 daram hta, Japan Kamaing Bumdu byin ai pyi English n ra ai majaw sha re. Dai majaw hpang jahtum e, myen hte Shanglawt rau la na, raitim, Shanglawt lu jang Jinghpaw ni hkrai san, Gumsan Magam Mungdan (သီးျခားကခ်င္သမၼတႏုိင္ငံ) galaw la na yawng myit hkrum daw dan masai.
1946 November (27) ya hta, General Aung San wa Myitkyina mare de du lung wa nna, Mr. Stevenson lung yang lawm ai Jinghpaw Du (100) hpe bai shaga let Manghkring kaw zuphpawng galaw sai. Shaloi shawng e Jinghpaw Du ni dawdan da ai myen hte Shanglawt gaw rau la na ngu ai laika hpe tang masai. Aung San wa mung laika hpe grai myit lawm let azi yu ngut ai hpang, myen hte Shanglawt rau la na nga ai grai kaja sai, raitim nanhte Jinghpaw ni hkrai lak san Gumsan Magam gaw de la na nga ai gaw nanhte Jinghpaw ni hkrai san mung n gun n rawng ai, yawng lawm ai Gumsan Magam Mungdan gaw de sa wa ga nga ai.
Shaloi Jinghpaw Du Salang ni gaw, anhte gaw masha n law ai bum masha re. Nang (Hpa-Sa-Pa-La) hpe lit hkam ai i? ngu san dat mu ai. Shaloi Aung San mung (Hp-Sa-Pa-La) ningbaw re. Tsun yu yang n hkraw jang gaw, nanhte Jinghpaw ni tsun ai de tsap mat na n ngai. Ningbaw shara na mung pru mat na n ngai, nga hkam tahka nga ai majaw Du Salang ni 1947 February (12) hta Panglong zuphpawng lung ai re. Dai hpawng hta myen hte shara magup madang maren sha rai na, shara magup hta Democracy ahkaw ahkang hkam sha lu na, Shanglawt lu ai hpang n tara dip sha wa jang anhte a du manat wa jang lamat na, mung hpawng myen mungdan na anhte pru mayu ai shaloi pru na ngu dawdan da ai re.
Raitim myen gaw, 1947 Panglong Agreement hpe n hkrut lapran na hka mat di kau ai majaw, Munghpawm myit n rawng ai myen hpe gasat ra ai re.
Duwa maran Zau Awng (USA)
3 comments:
Dai hkru nga jang ya dai nyi ah the jing hpaw wung pawn mung Dan ngu NA bai gaw de sa wa yang gaw n mai ai i taw?
Jing paw mung the Sam mung na king paw ni nga ai shara n kaw mi hpe zing la n htawm United Kachin ngu NA bai gaw gat la ga le taw,,
Zau bung du
Ya an hte nkau mi tsun nga ai hta Jing hpaw Jing hpaw nga ai grai law wa nga ai... ndai lam hpe kachyi myit yu yang hkrak ai... Jing hpaw ngu na hta an hte Wunpawng sha ni ngu yang grau hkrak na re... Jing hpaw nga jang gaw nkau Maru (Law Waw), Lashi (Lachik), Azi, Rawang, Lisu ni gaw nlawm wa sai zawn nga hkam sha ai... chye na ai ni nga ai zawn nchye na ai ni ma grai naw nga ai re majaw Jing hpaw ngu na hta,, Wunpawng sha ni ngu yang gaw grau hkrak na re.
Wunpawng ngu ai hpe ngai n ra ai. Wunpawng ngu ai ga si galoi byin wa, kadai shamying, hpa majaw shamying ai hpe a tsawm chye ai wa gaw dai hku nga na n re. Mungdan lu wa ai ten, Jinghpaw mungdan sha re. Ngai gaw wunpawng mungdan ngu ai n ra ai. Lachyum n rawng ai. kachinnet.net kaw Jinghpaw hte Wunpawng a lam sa hti la mu. Wunpawng hpe ra ai ni gaw myit garan ai kumla re. Tsan tsan n myit yu nna tsun ai ga ni re.
Post a Comment