MYU A N'GANG

Madu dai daw buga hte myu sha yawng a sak sumri hpe makawp maga ya nga ai chyumrum ai myu tsaw share shagan ninghkring kaba ni yawng hpe ten hpring myit masin kraw lawang kata kaw nna myit dum kyu hpyi hkungga n gun jaw shatsam, tsaw htum ai Karai Wa  makawp maga ya u ga.

Madi manyap puba hkiba ai hpe hkam sharang, n'tara dik ai chyamsam matse labye hpyen hpe hkum sai yawng hte gasat shamyit, shawng lam majan pa hta sinda hpe n'gang shatai atsam htum, myu tsaw sai hkyet na daram gasat shamyit, tinang myu sha yawng a matu matai htang, tara ai lam hta padang dawng hkawn sharawt, myu tsaw sari shatsaw, n'sin n'htoi, n'yup n'sha, sadi maja, myu tsaw n'gun kaba gun, padang hkrun lam masing lit kaba gun, myu sha yawng a sak sumri gun, sali wunli yawng hpe makawp ya ai myu tsaw share shagan ninghkring ni yawng hpe kam hpa dik nga ga ai.

Padang hkrun lam masing padang dip la lu na matu nang ngai yawng a atsam madun na ten du nga sai, mungkan shara shagu chyam bra nga ai, chyurum ai hpunau ni e, dai ni nang hpe Jinghpaw mung hte Nu Wa jinghku ni yawng myit n'gun kaba hte la nga ga ai. Ganang ga du tim ganing re ten tim hkum malap, nang tatut shakut lawm yang she lakung kamai di mala hkum na re.

Nang hpe  shangai shaprat ai buga, nang hpe shangai shaprat  bau maka ya ai  Nuwa jing hku yawng, myi she n'grip n'htoi hti nna la nga ga ai. Jang kyu hpyi ya rit. Nang lu lawm ai arung arai ja gumhpraw hte ya hkyak hkyak garum madi shadaw la na, Buga hte Nuwa jinghku ni myit mada dik nga ga ai. Rau rau chyawm shakut n'gun kaba dat saga law. Lawan garum la saga, Nuwa ni kyu hpyi madai nga sai, ma ni hkrap nga ai, maling hkra u dusat dumyang yawng nang hpe la nga ai.

Myu tsaw salu salat pru, labu mi waw waw, palawng mi je je, kawsi hpang gara tim yawng a matu shakut ya nga ai. Share shagan ni hpe tsaw ra myit madun shagrau atsam madun n'gun chyawm dat ga.

Baren Numraw