May (1) bat Lahkawng
2012 ning April (30) bat langai ya shani (11:00 am - 3:00 pm) lapran hta, Tokyo mare Takadanobaba (Mali Hka) lu sha seng kaw, Jinghpaw Wunpawng Laili Laika hte Htunghking Hpung (Japan) kaw nna woi awn ai hte, Japan du Jinghpaw Wunpawng Rapdaw Salang Amyu sha ni hpe, Japan Mungdan kaw du nga ai KIO Ninggawn Amu Madu Du Kaba Dr. Lahkyen La Ja kaw nna, Kanu Mungdan kata kaw hkyak hkyak byin hkrum hkra nga ai mabyin masa ni, Japan Mungdan de du sa wa ai yaw shada ai lam ni hte UNFC (United Nationalilties Federal Council / Myit hkrum Mungchying Amyu sha Federal Kaungsi) a lam ni, Japan Mungdan Asuya Maigan Hkringmang Dap hte Lahta tsang Rapdaw kaw na seng ang a myitsu Du Salang ni hte hkrum shaga bawngban ai lam ni hte Kaga masing masa lam ni hpe asan sha azin ayang tsang hte tsang tsun sanglang hpaji jaw lai wa sai lam chye lu ai.
Dai hpang Rapdaw shagu de na seng ang ai myitsu Salang ni hte shawa masha ni kaw nna San Htai lamang ni hpe galaw la lu masai hte Amyu sha lam yan ni hta myit hkrum mang-rum let lam shagu mahkrun shaw shang lawm shakut shaja sa wa ra saga ai labau lit kandang ni hpe grau nna chye na hkawn hkrang myit n-gun lu la masai lam mung chye lu ai.
Lamang ni yawng ngut ai hpang Jinghpaw Wunpawng malu masha ni hte shani shat jawm sha n-gun awai la lu masai hte Amyu sha lam yan gamung ni jawm jahta bawngban lai wa lu masai lam chye lu ai. Dai hpang shana daw de Du Kaba Dr. Lahkyen La Ja hte kaga manam ni hpe (JLH) ni hku nna lit la let, Tokyo mare na mying kajai gumhkawng ai shara nkau mi de sa du woi hkawn lai mat wa masai. Sa du shang lawm madat hkam la shajang ai myu tsaw mung tsaw share shagan ni yawng marai (45) re lam mung chye lu ai.
0 comments:
Post a Comment