NU A KASHA

An Nuwa ni a dawhpum shadaw kaw shadai lup ya ai, Nu a sindai chyupau chyu nna Nu a lahpyen shingma n'tsa  bau maka kaba wa ai, Nu hkridun Wa a saidun, jinghku yawng a man e jahtawng htu shing teng amying jaw ya ai, Ah Brang hte Ah Hkawn, shadang hte shayi kaba ni hpe Nu ten hpring n'sin, n'htoi myit dun kyu hpyi ya nga n'ngai.
                   
Prat jaw ai labau ginshi, myu jaw ai ru sai sumri hpe rit matut ya ai, len matut ya ai, myu a shawng lam maka yi-ngam hpe atsam htum, n'gun htum, mahkrai matut len shatsawm ya ai. Sak hte rau myu hte mungdan hpe manu shadan, myu a matu hpa mi byin byin, ganing re hpyen hpe mi rai rai, n'gun mi alu, atsam mi alu, gasat adawt shamyit ai. Gahpring gahpran n'rau n'htau, machyu pala maran htu ai lapran, asak hpe lahpaw hte magap tawn nna, matse labye n'shawp n'kap dik ai hpyen kaba hpe gap anut, htu matsut, magra ashin, azat shamyit, tawk manyi, gatawng sharu, masin mi adik, pawt n'gut ai shadik ten hpring gasat je, adawt je, majan pa hta arawng kaba mi alu rai majan hpyen man hta rai hkrut hka shin ten hkum tsun, salu salat gatsut na ten pyi n'lu, sadi maja gap anut, nga ai shawng lam majan pa kaw du nga ai.
                   
Nu a hkri tung tsaw ra dik ai myu tsaw mung tsaw, share ninghkring kaba chying hkai Nu a shadang shayi, brang zet, hkawn zet ni e, Nu a sindai kraw lawang kata, n'ji n'mu hkam sha dik ai tim Nu n'hkrap ai, Nu arawng la ai, Ma hpe Nu shangai ai arawng la ai, shagrau hkungga kam hpa ai. Nu a lwi pru nga ai myi pwi ni kabu myi prwi she re lu, Myu ting hpe hkye ai, Myu sha yawng a shawng maka a matu n'hkrit n'tsang n'gang tai ya nna lam hpaw ya ai, lam woi ya ai, Nu shangai chying hkai dat ai arawng la dik n'ngai. Karai Wa a shaman chyeju shakawn n'ngai.
                 
Ma hkum hkrit, hkum tsang, hkum myit kaji, Karai Wa hte Nu, makyin jinghku amyu sha ni yawng Ma a makau grup grup rau rai nga ai, n'gun dating u, hkum hting nut, teng man ai, Tara ai majan hta gwi gwi gasat yaw. Nu a sari, Myu a sari, hkum shayawm , kaji kawa, kahpu kanau ni hpe sat ai, Nu num ni hpe roi rip sat ai, ma kaji ni hpe htumrin kata htu sat ai, dum n'ta nat kau ya ai, arung arai yawng jahten la kau ya ai, ja gumhpraw sutgan  yawng gashun la kau ya ai, chyasam sawa ni hpe gasat kau u sat kau u, Nu maroi n'nyi, masin n'si dik ai hte numhtet shagrau atsam jaw dat ai yaw.

Ma hkam kaja u ga, Ma n'gun atsam hpring u ga. Magrau grang ai, sadi dung ai Nu a Ma rai u ga.
                 
Kyu Hpyi Ya Nu….. Ma a chying hkai  NU.....!

Baren Numraw