(16) LANG NA USA KACHIN CHRISTIAN FAMILY CAMP

June (9) bat Kru

Karai Kasang a Chyeju majaw 16 Lang na USA Jinghpaw Hkristan Dinghku Dabang hpe grai awng dang ai hku May 25-28 laman Linwood, Nebraska, Camp Moses Merrill kaw galaw shangut la lu sai.
Du sa ai ni yawng 260 daram rai nna America kaw galaw ai Jinghpaw Hkristan Dinghku Dabang ni hta shang lawm ai masha law dik dabang mung rai sai.
 

Hkrum zup ai aten laman:
- Jinghpaw Wunpawng buga ginra hte myu sha ni yawng a matu hkying hkum 48 nsim nsa akyu hpyi ai lam hpe mung galaw la lu sai. KK gaw anhte Jinghpaw Wunpawng myu sha ni yawng a hkrap ngu hkrap ngwoi yawn madai ai nsen, shara shagu kaw na akyu hpyi jahtau ai nsen ni yawng hpe madat hkap la nna shaman ya sai hpe kam nga ga ai

.  
-Jinghpaw Wunpawng buga ginra hte roi rip hkrum nga ai JW myu sha yawng a lawt lu lam hta US nga myu sha ni grau nna masan sa ai hku shang lawm shamu shamawt sa wa lu na matu Kachin Alliance ngu ai Executive Committee hpe mung du sa ai shawa masha ni yawng madi shadaw let hpaw ning htan dat lu sai. Ndai Executive Committee hta magam gun ninghkring marai 5 hpe lata san da lu sai. Kachin Alliance gaw anhte Jinghpaw Wunpawng myu sha ni yawng a nsen tai ya na matu yaw shada let hpaw ning htan dat ai rai nga ai.

    
-KAA (Kachin American Association) ningbaw ningla n nan ni hpe mung shawa ni yawng myit hkrum myit ra let lata san da lu saga ai. Du sa ai Jinghpaw Wunpawng myu sha ni law law gaw anhte a hkungga ai Sara Rev. Lahpai Zau Ya hpe KAA a ningbaw hku nna ra lata ai hte maren yawng myit hkrum myit ra let mu gun nnan ni a matu Karai Kasang kaw akyu hpyi apnawng ai lam mung galaw la lu sai. Sara hte rau magam gun ap nawng na mu gun manang ni gaw Ningtau Ningbaw hku nna Sara Sumlut Tang Awng, Amu Madu gaw Sara Sumhka Seng Nan hte Ningtau Amu Madu Sarama Htawshe Nu Hkawn ni rai sai.

-US mungdaw shagu de na KAA representative ni hpe mung shawa a man hta shachyen shaga masat masa galaw let shagrin ai lam galaw la lu sai. Ndai mu gun numdaw hta lata la hkrum ai KAA representative grau law wa sai hpe mu mada ai majaw grai n gun lu hpa rai nga ai.

Ndai Hkristan Dinghku Dabang byin tai wa hkra anhte yawng hpe lam madun woi awn ai Karai Wa hpe shawng nnan chyeju dum shakawn nma rai nga ga ai. Ja gumhpraw alu hte garum la ai buga hpung ni yawng, langai hkrai hku nna alu jaw ya ai ni, tsawra myit hte sharin achyin ya ai Sara Saranum ni yawng, ti nang a n gun atsam aten ahkying machye machyang hte ap nawng dawjau ai nu wa hpu nau ni yawng hpe Camp shabyin shatai committee Kachin American Association ningbaw ningla ni hku nna grai chyeju dum ai lam shana dat ga ai law. Chyu rum ai Jinghpaw Wunpawng amyu sha ni yawng hpe Hpan Wa Karai Kasang lam woi bau sin makawp maga ya nga u ga.