Slideshow Image 2

IDP CAMP HTA LADU HKRUM KYUHPYI HPAWNG GALAW

June (9) bat Kru
2012 June (9) ya shani ni Wunpawng Mungdan Sinpraw maga Sadung Ginwang K.I.O up hkang ginra rai nga ai Mungga Zup/Zai Awng hpyen yen dabang hta majan byin laning mi ladu hkrum lusha gam kyuhpyi hpawng lamang hpe galaw nga ai lam na chye lu ai. Ndai kyuhpyi hpawng hta makam masham hpung shagu na shang lawm ai lam, Ndai kyuhpyi hpawng lamang hta Hkalup Hpung, Catholic Hpung, Lisu Hkalup Hpung, AG Hpung hte kaga law law shang lawm nga ai nga ai lam na chye lu ai.

Kyu hpyi ai lamang ni gaw,
1. 9 June 2011 – 9 June 2012 du hkra Awng Padang law law jaw ya ai Karai Kasang hpe chyeju dum ai lam.
2. Shawnglam majan hpyen man hta tsap nga ai magam gun ni
I. Asak ap nawng sai share shagan ni hte ngam nga dum nta masha ni a matu,
II. Shawng lam bungli hta machyi makaw hkala, daw hten nkung mat ai ni a matu, 
III. Ta tut shawnglam tsap nga ai ni hpe Karai Kasang bau sin na matu hte Awng Padang matut jaw ya lu na matu.
3. Mung masa lam hta woi awn ning shawng nga ai K.I.O ningbaw yawng hpe Karai Kasang lam woi ya ai hte Awm Dawm lu hkra woi shakut lu na matu.
4. Hpyen majan hta woi awn nga ai Dap Awn daju hte Hpyen Dap hkring mang ni yawng hpe Karaing Kasang lam woi ya na matu.
5. W.P Mungdan Shanglawt magam lam hta jai lang ra nga ai gumhpraw, arung arai, lakung lakap hpe Karai Kasang jaw ya na matu.
6. Nteng nman ai hku up sha nga ai Myen ningbaw ni hpe Karaing Kasang myit shagrit galai kau ya lu na matu.
7. W.P Mungdan hta shanu nga ai W.P Myu hte Mungdan sha ni myit hkrum ai hte ntara ai lam yawng hpe jawm gasat ai lam hta Karai Kasang lawm ya na matu.
8. Maigan mungdan shara shagu hta chyam bra nga ai W.P Myu Sha ni lata gindun let Padang ninglaw lu hkra Karai Kasang lam woi ya na matu.
9. Hpyen yen tsin yam ni hpe lam magup hku garum ya nga ai mungdan kata, shinggan na hpunau kanu kawa ni yawng hpe Karai Kasang shaman ya u ga matu hte matut garum lu u ga matu.
10. Myu W.P Sha ni hpe hpaji sharawng awng chyeju hte hpaji chye ai ningbaw law law matut jaw ya u ga matu.
11. W.P Mungdan kata nanghpam lu sha hkoi mat hkra jawm gasat lu na matu hte bai lu sha jat ai ni n nga hkra Karai Kasang lam woi ya na matu.
12. Amyu W.PSha ni hpe Karai Kasang sharawng awng ai hte law htam mayat maya asak galu ngwi pyaw gan ga ai chyeju jaw ya u ga matu. 
Ndai hpan (12) hpe Karai Kasang kaw kyuhpyi nga ai lam re. Kyuhpyi hpawng hpe shana de hkying 6:00 PM hta jahkring na re lam matut na chye lu ai.

0 comments:

Post a Comment