JAPAN MUNG DU WUNPAWNG SHANI MYEN HPYEN NINGHKAP POI GALAW

June (9) bat Kru

2012 ning June (9) ya shani gaw Kanu Wunpawng Mungdan de Thein Sein Asuya a Mung maden Myen hpyen ni Wunpawng Myu sha ni hpe Sat, Nat, Amyu shayi ni hpe Shinggyim Roi rip, Dum n ta Dusat yamnga ni hpe Mya lu Mya sha galaw wa ai  Laning mi ladu hkrum lamang hpe Myit dum Masin Machyi let, Mungshawa Padang hkrunlam masing Woiawn Committee (Japan) Salang ni woiawn let, June (8) ya shani Japan Mungdan, Shinagawa lawk Myen dat kasa Rung shawng kaw Japan Mung du Wunpawng sha ni hte  Hpu nau Mungchying bawsang ni mung shanglawm rai du sa  n gun  (70) jan hte laja lana n gun madun jawm ninghkap lai wa sai lam shiga na chye lu ai. Dai Ninghkap poi hta Madung Gabaw gaw, daini na Wunpawng sha ni a Mung masa hkrun lam hta gara Myen Asuya hpe mahtang Grin ai Asuya ngu masat ra na. Aung San wa hte Ga sadi tawn da ai mung shi si ai hte dai ga sadi lachyum n pru mat ai. Khin Nyunt Prat hta Ga sadi tawn da ai mung Shi rim katut mat ai hte Ga sadi lachyum n pru mai ai. Ya Thein Sein hte Ga sadi tawn da yang mung dai ga sadi  lachyum bai n prum mat na hpe ja ja sadi ra nga ai. dai majaw Mungkan Mungdan kaba langai ngai lapran kaw tsap ya n na shaga hkat ra ga ai hte, Wunpawng Myusha ni a lu ging ai a hkaw a hkang tup hkrak lu la hkra shakut sa wa ra ai lam sanglang dan lai mat wa sai lam shiga na chye lu ai.