KA-NI PALA

Chyu-rum Wunpawng myu ni hpe
Tai hpyen wa laknak hpan hkum hte
Hpai hka shayawn
Shingte masat tawn

Gumli shamyit ladat
Jut magup hkrau gasat
Sinat laknak sha nrai
Nang hpam Ka-ni hpe pala shatai

Nsim nsa gap jung
Mi na hta htam (7) lung
Dai re majaw, KIO Asuya gaw
Mungshawa a gawng malai
Myu sha yawng hpe hkye mawai
Nang hpam Ka-ni hte
Myen tai hpyen hpe
Wunpawng ni a hpyen madung langai
Lahkawng yan hpa n shai
Masat da sai
Gasat nga ding yang rai nga ai
Myen Asuya a baw nu
Wunpawng ni hpe gasat na myit ru
Sinat hte gasat n dang
Ka-ni hpe kasa sha-ang

Htim lung wa ai Ka-ni hpyen
Si Du re nga shachyen
Ka-ni pala dai
Wunpawng ni kaw chyam sai

Ka-ni hpen a majaw
Wunpawng myu sha htinggaw
Chying Ring dinghku bya
Myen wa she gaida hta

Sak prat naw ram ai
Mahkawn, Shabrang hkrai
Ka-ni yin ya kap
Lup wa mahka tsap

Dingla raitim, myit nsu
Manang a rung rai lagu
Hkrit gaya nchye
Nlu lu yang htim ahkre

Kanu yan kawa na
Ka-ni sai hkra
Kashu kasha dai
Ya hkyi sha bai tai
Kade prat shachyaw

Ka-ni hkring htawng dagraw
Hkum gawng sat li,
Hpa rat mung hpa ndi
Myu sha lam mung n myit
Shawa bungli yit
Myit hkrum lam hta pat
Kahkyin gumdin chyat

Shawng de ngu yang hting nut
Hpang hkan nga jang dumhprut
Mahkun n’hku
Masha chyabu
Byin mat na hpe
Myen hpyen wa she
Maw lanyet shachyai

Shabra dat nga ai
Hkai, dut, mari hpaga
Lu sha ai masha
Yawng gaw hpyen matse
Gasat kau na re

Nhtum hka yan rau chyu
Nhkyet hka htung rau lu
Myu baw Wunpawng
Anhte yawng
Myit hkrum rap-ra
Ta gindun nna

Myen tai hpyen hte
Ka-ni Nang Hpam hpe
Gasat shamyit ga
Hkum kanyin sa
Ka-ni hpyen hpe gaw
Mungkan ting nra ai majaw
Shaning shagu
June shata du
(26) ya shaloi
Nang Hpam Ka-ni Ninghkap Ninghtoi

Dai shani du shagu
Ka-ni gasat na matu
Shawa daw tsa shaga
Zuphpawng galaw nna
Lit nga ai myit su salang
Matsun hpaji jaw ding yang
Dai mungga hkam la
Myit kraw e chye na
Myu shamyit hpyen hpe
Masin nsi ai myit hte
Wunpawng ginra hta
Ka-ni hpyen tsai hkra gasat sa wa ga..

Gauri Myi