RAWANG LAILI LAIKA HTE HTUNGHKING HPUNG NINGBAW LATA

June (29) bat Manga

Putao mare kaw Rawang Laili Laika hte Htunghking Hpung a Ningbaw hte Amu madu hpe June (12) ya shani lata san ai lam na chye lu ai. Ndai Ningbaw lata zuphpaw hpe hkanghkyi hpung ni hte Tanggu Tang hpung woi awn galaw ai re lam hpe mung na chye lu ai. Kahtawng shagu na shanhte a masha ni hpe lata shaga la nna galaw sa wa ai re lam hpe mung chye lu ai. Rawang Laili Laika hte Htunghking Hpung a gawda ai tara hta mung masa Party kaw shang lawm ai ni ra lata na lam tsep kawp n mai ai ngu nna tara jahkrat da chyalu re hpe mung chye lu ai. Rawang Laili Laika hte Htunghking Hpung a Ningbaw gaw Tanggu Tang rai nna Amu Madu gaw Hpungri Min re lam hpe chye lu ai. 

Myitsu Salang langai tsun wa ai hta Tanggu Tang gaw 2012 ning ra lata poi hta shang lawm lai wa sai sha n ga, tatut Rawang hpyen hpung hpaw nna laknak lang ai ningbaw wa re, Hpungri Min gaw Putao ninghtawn na hkanghkri hpung a ninghtawn amu madu kaba re lam hte 2010 ni ra lata poi hta mung shawng lawm lai wa sai lam tsun shana wa ai. Matut tsun shana ai hta, "n dai zawn Rawang Laili Laika hte Htunghking Ginjaw a gaw da tara hpe manu n shadan ai, mung shawa daw tsa kawn myit hkrum jahrakt da ai tara hpe ahkyak n shatai ai sha hkrup mara aglaw ai gaw n htuk ai re lam, Amyu sha ni  a ginjaw gaw da tara hpe n hkungga ai ni gaw Amyu sha ningbaw gara hku tai na, madu nan tara hpe n hkan nang yang myu sha ni hpe gara hku woi awn na? grai myit yu ra ai ten du wa sai" nga tsun dan wa ai.

Bai n dai ra lata ai lam gaw Rawang myu sha ni tsep kawp n chye lawm ai hte madi shadaw ai lam mung tsep kawp n nga ai lam, gara hku n mai hkap la ai lam na chye lu ai. Democracy masa hte hkrak Rawang amyu sha ni hkum hkum ra ra shaga zuphpawng nna ra lata poi kaba galaw ai rai yang Tanggu Tang hte Hpungri Min gaw Rawang Laili Laika hte Htunghking hpung a Ningbaw hte Amu Madu tai wa na lam n nga ai nga nna lahta na myit su wa sha gahtap tsun wa ai. 2010 ning hta Tanggu Tang hte Hpungri Min tinang dai daw ginra hta ra lata poi shang lai wa ai rai tim awng dang ai lam n lu ai yen re lam hpe matut na chye lu ai.