GARA HKU KUN?

LAGANG:-  Ya hte na dat ai shiga ni hta Gumsan Magam Thein Sein gaw KIO ni simsa lam nra sharawng ma ai majaw jahten sharun ai bungli chyu galaw nga ma ai. Dai majaw kaga rawt malan hpung ni hte gap hkat jahkring kau sai raitim KIO ni hpe gaw shamyit kau lu hkra matut gasat nga ai lam tsun nga ai da. Na pawt sai wa re.

Thein Sein gaw maning mung Putao de wa du nna hpu nau Rawang ni hte hkrum ai shaloi tsun wu ai hta, nanhte gaw Wunpawng Myusha ni nre. Myen hpraw she rai myit dai. Dai majaw nanhte hpe KIO ni roi rip wa masai. Hpang de roi rip ai lam n lu galaw hkra nanhte hpe laknak ntaw ntsang jaw na, KIO hpe shagrawt kau mu, nga nna wa shadut ai hpe mung na wa saga ai. Moi ya rai jang KIO hpe kam hkra hkalem la nna KIA hpyen hpung ni ndum shamyi yan lung wa ai shaloi gara hku hkap shingte kau na matu NDAK hpung hpe sharin tawn ai hte maren shadik shatup wa ma ai majaw KIA kaw sum machyi ai lam nga wa sai. Ya hte mung kalang mi dai hpaji sha bai lang dat ma ai shaloi Myutsaw KIA hpyenla marai 7 asak sum machyi wa sai. Satan gaw maza mala re ai akyang hkrai she lu nga a hka!

PRANGTAI:-  Majan ngu ai gaw tai wa hpe shamyit kau lu na matu dangdi dangdep ai nyan hpaji hte n-gun yawng hpe asung jashawn ai lam rai nga ai. Shing re ai hta hkan nna Thein Sein gaw shi hta lit nga ai hte maren galaw nga sai. Raitim KIA myutsaw hpyen hpung maga de mahtang tinang hpe lang hte lang sa shanyam ai hpu nau NDAK hpe kam ai rai nna shi a shingdu kaw satan tsap nga ai hpe ndum maram kau ai gaw hpang de na matu sara kaba rai sai. Kaja sha nga yang KIO gaw rawt malan hpang wa na matu shanhte kaw lit nga ai hte maren tam la lu ai laknak ni, Japan rifle dingsa lau 3, sten gun 2, sinat kadun 3, yawng pawng yang sinat dingsa chyabyap lau 8 re. Dai laknak hpe arang shatai nhtawm rawt malan magam hpe woi shawng wa ai Du Kaba Lahtaw Zau Seng a kanu kawa hte salang nkau gaw matsaw lahta tsang na Yehowa kaw kyu jawm hpyi ya dat ai hte rawt malan lam hta ta tut ahkyak la bang wa masai. Magrau grang ai myutsaw  nkau gaw shanhte kaw lit nga ai hte maren atsam htum hte Yehowa jaw dat ai machye machyang hpe htaphtuk ai ladat hku jai lang dat ai nga yang, aten kadun laman laknak law htam wa lu nna Wunpawng Mungdan ting kaw tai wa hpe ninghkap gasat wa lu ai hpe arawng la ya ai.

Wunpawng Myusha ni gaw magrau grang ai hta n-ga, majan pa kaw myi hprap zawn lawan ladan daw dan nhtawm mungkan majan langai hte lahkawng kaw sinna mungdan hkan e na chying tsaw ai atsam hpe madun wa lu masai. Dai ten na majan ni hta mahkrum madup tsaw sai British ni woi awn ai kaw majan hkan gasat lawm ai marang e mahkrum madup tsaw ai amyu ni byin tai wa lu masai rai nna, dai ni na majan ni hta Wunpawng Myusha ni nan woi awn nna gasat nga masai. Ndai zawn re ai ten hta adum nga na matu gaw, Yehowa jaw da ya ai machye machyang hte tinang lu nga sai mahkrum madup ni hpe gumhpawn dat ai masing rai nga ai. Shing rai tai wa a maw lanyet wa na ladat kaw nsa kadawng bang na matu tau nna myit maram nga let gasat sa wa ai gaw awngdang lam lu wa na mahkrun rai nga ai hpe chye shajang nga sai re.

Mungmasa lam hta bum nga masha ni lu ging ai ahkaw ahkang hte seng nna Thein Sein asuya tsun ai gaw 2008 a gaw da ai tara hpe madi nna seng ang ai amyu ni a laili laika hte htunghking zawn re ai hpe ahkaw ahkang jaw na lam sha tsun wa masai. Raitimung maren madang ahkyak ai mungdaw shagu a uphkang lam hta federal hkrang hte tinang ra sharawng ai uphkang hkrang (self-determination) ahkaw ahkang zawn re ai lam galoi mung ntsun shapraw yu ma ai. Lachyum gaw Anorahta prat (prat-1), Bayinnong prat (prat-2), Alonghpaya prat (prat 3) ni hta bum nga masha ni hpe ra ai shara kaw kade shangun sha wa timung, shanhte a lam hpe galoi mung shadan shadawng ai lam n-galaw ma ai. Bum nga masha ni garum ya nna awngdang wa shagu shanhte ram ai majaw awngdang wa ai lam chyu tsun wa masai. Dai hte maren ndai prat-4 kaw mung shawng de galaw wa sai hte maren bum nga masha ni a amying shingteng hpe shamyit kau nna Myen amyu a mying sha dandawng sa wa lu na matu ladat shaw nga ma ai hpe asan sha jawm mu nga saga ai.

Shing re ai hta hkan nna ra sharawng ai lam hta bung pre ai bum nga masha ni gaw kadai mung kade a lagaw ngangkang hkra shakut ai hta n-ga, yawng hpawngchyawm ai n-gun ngangkang hkra shakut ra nga ma ai. Dai shaloi shanhte myusha ni yawng pawng ai mungdan nnan gaw-gap la nna mungdan a mying hpe mung shanhte yawng jawm ra sharawng ai mying hpe shalat la mai na ma ai. Dai shaloi shanhte ra sharawng ai amyu htunghking, laili laika hte jet ai federal hkrang a npu e mungdaw shagu kaw tinang ra sharawng ai uphkang hkrang hpe na chying arawng la ai hte uphkang sa wa lu na ma ai. Dai shaloi myusha ni yawng gaw awmdawm ahkaw ahkang lu ai mungdan nnan hpe gaw-gap la lu ai shani rai wa na re.

PYILAN:-  Salang Prangtai sanglang ai kaw Wunpawng myusha ni hte seng ai sha n rai, kaga hpu nau myu bawsang yawng a matu mung hkrawm sai ngu hkam la ai. Dai ningmu ni hta hkan nna hpu nau myusha nkau dumhprang wa nga masai. Mungmasa gaw grai dam lada ai majaw ganawn sa wa ai hta shada a lapran kaw mung, kaga hpu nau bawsang ni hte mung, maigan masha ni hte mung dam lada ai jasat lang ra nga ma ai. Shing re ai majaw KIO salang ni gaw mungdan kata kaw mung, maigan hkan e mung dep lu ai daram hkan shachyen ai lam galaw nga masai. Ra wa yang na matu lai wa sai June shata hta KIO kasa langai gaw Ma Kaw jan hpe hku hku hkau hkau hkrum shaga let mungmasa lam hte seng nna ningmu garan kachyan galaw wa sai. Shing rai hkrum shaga hkat ai shaloi gara de mung n shanang ai sha shi tsun ai ga manaw hte shi a kraw kaw rawng ai lachyum gaw kade bung pre nga ai hpe maram la ai hte du na ra ai ten ni hta gade daram kam hkat mai n mai ngu ai hpe maram ai lam rai nga ai.

Satan wa a maumwi mausa hpe hkaja yu yang, moi Anoratha prat kaw nna dai ni du hkra hkam la ai jasat ni galai shai wa ai hpe rai n mu yu ai. U Nu a lakhtak hta democracy asuya ngu ai mying lang timung, ta tut kaw gaw hpyen jaubu hkrang hte uphkang wa ai majaw Wunpawng Mungdan a adaw achyen rai nga ai Hpyimaw, Gawlan, Kamhpang zawn re ai ni Miwa asuya lata de di ya kau ai hta n-ga, Myenmung hpe mung Buddha mungdan hku nna masat wa sai. Shing re jasat hta hkan nna dai ni na ten hta simsa lam tam committee hte policy kade lang galai timung laika kaw sha galai ai rai nna ta tut kaw rai n galai ai majaw simsa lam bawngban ai gaw lachyum pru na n re. Satan a yaw shada ai gaw zuphpawng kaw sumla ni dem la nna shanhte gaw mungdan simsa wa hkra kade shakut nga ai lam, KIO gaw baw ja nga ai majaw bawngban ai hta awngdang lam nlu wa ai lam mungkan ting de ndau shabra na matu sha rai nga ai hpe mu wa saga ai.

Ban Ki-Moon hte hpawn maigan masha kaba ni gaw KIO hpe gasat nga ai lam jahkring kau na matu jut shagu kaw na shadut nga sai hte maren Thein Sein mung shi a hpyen hpung ni hpang de lang hte lang matut matsun dat nu ai. Tau nna jahkrup tawn magang sai hte maren myen hpyen hpung ni gaw hpyen masa, media masa hte grau grau n-gun jat let gasat nga sai. Ndai zawn rai maw lanyet nga ai a majaw maigan masha ni gaw KIO mahtang satan wa ndau nga ai hte maren baw ja ai ni she rai ma ai hku nna mu wa nga masai. Ndai zawn re ai ten hta KIO mung satan a maw lanyet nga ai hpe maigan chyam jawm chye wa hkra ndau ra na re ngu mu ai.

Maigan hkan e du dep lu ai Wunpawng Myusha shagu gaw shada mara tsun dinglun hkat na malai awngdang wa na hpaji ningmu ni garan kachyan hkat ai gaw yawng a matu mai kaja ai lam rai na re. Maigan masha ni kaw garum ntum hpyi shawn ai hta, Wunpawng Myusha ni gaw shawng de shanhte hpe majan pa kaw kade garum wa sai lam tsun na malai, ndai ten hta Wunpawng Myusha ni hte KIO hpe garum la ai marang e, du na ra ai ten ni hta shanhte gara hku akyu hkam sha mai na re lam, gawai ai hku jahtuk tsun ai gaw awngdang ai lam rai wa na re.

Kalang marang tinang a matu grai kaja sai, grai tengman sai ngu hkam la nna tsun shaga ai shaloi masha wa a matu gaw mai kaja ai lam n rai nga ai. Raitim htap htuk ai ga si ga ngau lang ai marang e lahkawng maga a matu htap htuk ai mahtai lu la wa mai ai. Shing re ai ningmu hpe malen pyen u langai hku nna mu lu ai hpe Wunpawng Myusha ni yawng hpang de mu ai hta jum jat ai hku rai u ga, ngu hkam la ai hpe tang madun dat ai law.

Puk Dun

17/7/2012