HKRI KABA NI MARAI MANGA HPANG DE

Goi law e hku hkau dik ai Hkri Kaba ni e nanhte a shi ga hpe shagawng tsa ba na ai shaloi, Ma kaba hte mau mat nngai le. Hkri kaba ni hte shagawng Tsa Ba ni le rau mare, rau buga kaw rau nga, rau sha , Hka htung langai kaw sha hka rau ja lu, rau jawng lung, rau sha gasup rai kaba wa ai rai ga ai le i ? Naw kaji ai ten hta gaw, kaba wa ai shani Wunpawng myu sha ni a matu, hpaawn kaja, kasi kaja tai na ngu myit n gun da ting let shakut wa saga ai le i ? Aten ni na mat wa ai hte  hkri kaba ni a myit mung galai shai mat wa sai kun ?. Masha myu ni a lakung lakap tai na malai, tinang a myu a matu lakung lakap tai ai gaw grai htap htuk ai lam rai na re law. Hpa majaw, Chyan hput hpung a dum su tai hkyen nga ai ta ?. Mungdaw hpe up hkang ai ningbaw ningla jan ni rai ma ai ngu shagawng tsa ba hte myu sha ni yawng gaw, grai arawng la nga ga ai le.

Hpa majaw amyu kasha sari raw kabai kau da nna  Wunpawng  myu sha ni a hpyen wa hpang de htim dumbre shang mat wa na hkyen nga mani? Nanhte woi awn nna, nanhte hpang masha law law hkan nang ya na hkum shadu. E nanhte a shingnip machyu nna sask hkrung nga ai ni chyawm gaw, shat madu hpe myiman yu nna, myit n lawm tim hkan nang na ma ai. Kaga manaw manang ni hkan nang na hkum myit mada. Madu a sai hpe kadai n nyet ai.Hkum myit shut mu bai wa marit lu. Dai masu magaw zingri zingrat re amyu ni hpe kam nna hkum tak kaba taw. Nang hpe garum na, nanghpe hkye na, nanghpe matsan tim lu su tim tsaw ra lakawn nga na, nang hpe shagrau shatsaw nga na, na a maga de galoi mung tsap ya nga na gaw, na a amyu, na a sai na a jinghku ni rai nga ai Wunpawng sha ni sha re ngu ai hpe galoi mung dum nna, du ai shara kaw na lawan bai n htang wa rit. July 28 ya hta galaw hkyen ai lam ma hkra hpe, galaw shangun ai ni hpe mahtang gabai sharut kau da nna, shagawng tsa ba ni hpang de lawan bai gagat wa rit. 

Dai galaw ai majaw, myu sha ni a matu hpa mi yawm wa ai lam gaw nnga ai rai tim, sa wa hpyen wa gaw, anhkri antsa amyu shada hpe sai garan ya lu ai majaw, sida adup nna kabu nga na sha re. Hkri kaba ni maga hku na gaw, amyu sha ni a hkung ga lara ai lam n lu mat na. ( na htingbu jan pyi nanghpe mani dan tim myit kata na gaw nanghpe n ju mat sai) .Myu sha labau hta labau n tsawm ai kap taw na. Myu sha ni a n tsa sai hka kap nga mat na. Ndai gawmai gawsha gaw hkri kaba ni a prat hta galoi mung shaprai kau n mai, ahkut kau n mai ai shingna kaba zawn hkan nang taw nga na hpe shagawn tsa ba grai tsang ai. Hpa majaw masha ni a akyu a matu jai lang hkam ya na i ?. Ndai zawn ngu ai gaw jahkrit ai n re yaw. Shari sadang kaba la ai nye hkri ni hpe tsaw ra myit kaba hte sha shadum ai she re chye na na shadu ai.Anhkri Antsa ni gaw masha a matu jai lang hkam na amyu ni n re. Mayam amyu n re gaw. Jiwoi Jiwa ni a  prat kaw na kade amyu ni a kata mung ntaw, kadai ni kaw mung mayam n yam ai sha, kade a shawng e mung baw n gum ra ai Magam ngu nna nga hkrat wa ai wunpawng sha ni she re yaw. Sai hkum kaji . Ndai zawn re magam amyu ni she re majaw, tinang a amyu hpe maigan wa man e n nyet kau ga. Lu ai manu hte dut kau na n myit ga.

Na a sai ni re. Na a shan nan re majaw, hkri kaba ni e pawn ba la  marit.lam madun la marit grai kam ga ai. Nanhte galaw mayu nna galaw ai nre hpe yawng chye ai. July 6 ya shani, anhte hpung masha ni , anhte hpung sara ni galaw ai hpe ninghkap shangun ai  lam san san sha re. Anhte kam hpa shara gaw anhte hpung sara ni sha re. Anhte hpe awngdawm ahkaw ahkang woi la na gaw anhte a shanglawt ni sha re. Dai ni hpe nang dingbai dingna hkum jaw mayu.Ndai ni hpe dingbai dingna jaw ai gaw, Jinhpaw Wunpawng myu sha yawng hpe dingbai dingna jaw ai re ngu masat ra na re. Hpyen wa hpe n htu n hku hkum ladawn yaw. Moi na zawn anhte shagawng bumga kaw rau lu rausha, rau nga rau pra nna apyaw sha she bai rau wa nga ga. Hpyen wa a masu hkalem nga ai ningsin krung kaw na bai n htang wa rit ngu tsaw ra n ja n hpra let,

Tsa Ji Namti