Shiga langai mi gaw hpawtni na ten hta maza sumpum kaw kabai bang kau ra ai baw nga ai zawn prat tup matsing tawn ra ai lam nga ai hte labau hta prat tup malap n'mai ai lam ni shapoi shabra nga ai re zawn myu sha langai mi shanglawt lu chye wa ai zawn mungdan langai grin na n'pawt mung byin chye ai. Masha langai mi a labau hte mungdan mabyin gaw matut chye nga ai re, masha langai mi a kaja ai n'kaja ai mi rai rai hpang na ni a matu kasi yu la chye yang kaja dik ai lam ni hpe mu tam lu na re. Kaja ai n'kaja ai shadawn gawk hta bang yu nna mahtai kaja dik ai hpe tam la yu ra ai. Anhte malawng maga gaw hka hpe hka hku sha mu chye nga ga ai tim hka hta namhkan hka, hkadwi, hkanyen, hkashum hkalum, ngu nga ai zawn hka gaw nam nak kade rawng ai kade san ai kade ram kashin jen kau ya lu ai hte kade li ai, shi a atsam gyip nyen tsang ai kade nga ai, n'kaja kaja ai n'bung n'sa kade ram rawng ai ngu hpe maram chye lu yang hka gaw masha hpe kade akyu jaw ai ngu hpe mu chye maram wa lu na re zawn anhte shinggyin masha ni mung madu a matu dinghku mungdan a matu kade ram duhka jaw ai akyu jaw ai ngu hpe sakse hku tawn da ra nga ga ai re.
Mungkan hta kaja tim n'kaja tim kasi yu la ra ai ni, Mother Teresa, Adolf Hitler, Kanbawdia mungdan na Kopaw, myen mungdan na Aung San, Than Shwe, Mosidung re ni labau ginshi ni hpe hti yu na yu nna Nu a N'hkru N'shawp ai kasha ngu laika ngau hpe dawdan maram lu mu ga.
Nu a kasha n'hkru-
Nu e ma myi pwi n'kam pru n'ngai.
Ma le myit n'su gaya n'chye ai manhtat she rai n'ngai.
Ma asak kaba sai tim myalu myasha n'hkru n'shawp sak hkrung nga n'ngai.
Nu ma myi prwi n'kam pru n'ngai.
Nu e Ma le kanu num ni hpe mung shinggyin roirip dusat zawn zingri chye n'ngai.
Masha ni a arawn alai sari sadang ahkaw ahkang hpe mung aging agang jahpoi asawng chye n'ngai.
Ma le tinang n'gun atsam marai arang jahpu n'bang ai de loi loi lu na de lawan sa chye n'ngai.
Nu e ma myi prwi n'kam pru n'ngai.
Matsat shabat n'se n'sa sawle sawke kyincha lasha matsa mawa myit mung hpring nga n'ngai.
Kam hpa gin ai kanu kawa mung n'chye tai n'ngai.
Ma le rai dingsa ni raw sumpum kalai kau nna, yubak mara dingsa ni bai galaw chye chye rai n'ngai.
Nu e ma myi prwi n'kam pru n'ngai.
Masha ni ruyak jamjau yawnhkyen duhka hkrapngu hkrapngoi singgu kyin byin yang she shat hkru chye n'ngai.
Buhpun palawng ningnan chyahkring hkring kalai hpun chye ai zawn yubak mara ningnan ni hpe mung bai galaw chye chye rai nga n'ngai.
Tsa chyaru kani hkayawm nanghpan hkum hkum chye lu bang nna maza n'hkun kaba mung tai nga n'ngai.
Asak hkrung ai ten atang ahpa loi loi namnak n'nga ai hku pa shalaw ten shama lamu ga shali rai nga shalai nga n'ngai.
Karai mungga Tara sharin ai, mungdan dinghku NuWa ni a ritkawp Tara hte sara-sarama kahpu kanau makyin jinghku htingbu htingbye ni a sharin ai hpe kawng n'dum n'ngai.
Nu e ma myi prwi n'kam pru n'ngai.
Mara yubat ni bum zawn sumpum dubaw she lim kabrat mat tim shaning 60 ning shalai kau ai.gaw Nu a myi man kara kaw tawn kau ya na ta?
Nu a kasha n'hkru ngu ai laika ngau hpe hti yu nna myen myu a gumshem magam ni hpe ja ja dinglun nna shawng de mahtai kaba langai lu hkra hte langai sha ngam tim galoi mung gasat shamyit na kawsi jamjau ai gaw annau ni a dawdan n'lu ai arang kaba shatai sa wa ga.
Baren Numraw
23/07/2012
1 comments:
Ga shagawp n dai gaw, nye myit masin kata hta, sharin a chyin la mai ai hkrai re nga ai. Hkamla yin la mayu hkra , dawk dawk rai jaw ai hkrai grai chyeju kaba n ngai. Teng dik ai Gindai Ga shagawp n dai prat tup matsung sumhting da sai. Laikka hte chyimrim ga shadawn hpe ka ai Baren Numraw hta KARAI aq sali wunli lu u ga law. Myen myu ni aq madu myit n rawng ai hpe Du Magam myit hte gasat.
Post a Comment