Slideshow Image 2

AUGUST NAM-UP

PYILAN:- Myenmung kata lam shanut nga ai gaw ram ram na wa sai. Ya hte grup yin kaw hkan gawan pyen hkawm yu yang hkye la she laja rai grau shanut wa nga magang sai. Myen asuya gaw KIO hpe aten kadun hta shamyit kau lu na matu nhti nhtang gwi manya zawn rai hkan gawa nga ai ten hta Rohingya ni hpe mung kalang ta tsep kawp gan shamyit kau na matu ladat gan shaw ai nga yang Muslim mungkan kaw na nsen kaba hte jawm garu wa ai hta n-ga, USD wan tsa lam hku nna Rohingya ni hpe garum wa nga masai. Ya chyawm gaw prat chyanat shamyit yang n mat hkraw ai amyu ni zingri hkrum jin nna sharang n dang sai majaw kapaw pru wa na mara ai.
Pa layang na Myen ni mung myu hkum sumhpa roi rip katut ai hpe n dang hkam sharang sai majaw garu wa nga masai. Maw lanyet ai hpaji hte shalen la katut ai hpe dum hprang wa ai ABSDF ni mung grai ga-un nga masai hte maren gap hkat jahkring tawn sai uhpung nkau mung bai gasat hpang wa magang sai. Thein Sein gaw mungdan simsa sai nga nna ndau nga ai ten hta asuya shangwang kaw mung, hpyen dap shangwang kaw mung marung marang byin nga ai hta n-ga, asuya hte hpyendap lapran kaw mung shada matsun jaw ai hpe madat mara ai lam n nga sai lam maigan kaw nna jawm mu wa nga masai. Sinpraw de machyu mayu ai ni hte sinna de machyu mayu ai ni a lapran kaw mung zang ayai wa nga masai. Laklai ai shiga langai pru wa ai gaw, sumtsan mungdan kaba langai gaw KIO hte Myen asuya she myit hkrum ai rai yang lapran kaw shang tsap nna aten galu sanglang nlu ai manghkang hpe shanhte a mungdan kaw saw shaga la nna woi hparan ya mayu ai lam shiga na dat ai. La ma KIO myit hkrum ya timung Myen asuya gaw tsep kawp myit hkrum ya na n rai nga ai. Shing rai dai mungdan kaba rai jang, baw ja ai ni gaw KIO nrai. Nanhte she rai madai nga nna Myen asuya hpe ahkre wa na mara ai. Aga, ngai jahta ai grai law wa sai. Salang nan na wa ai shiga mung naw jahta dan yu marit le.
LAGANG:- Kade nna ai laman asuya nlawm ai sha, mungdan ting na uhpung amyu myu lawm ai zuphpawng kaba hpe UNFC kaw nna woi awn nhtawm galaw na ma ai da. Asuya hpe ninghkap ai n-gun grau kaba wa na masa nga ai. Kaga maga de rai jang Myen asuya gaw Ma Kaw jan hpe ahkaw ahkang grau kaba ai arawng aya ni jat jaw wa magang sai da. Ndai zawn re ai ten kaw Yungwi shadang Dau Lum gaw Myen balik ni hte pawng nna Wunpawng Myusha ni hpe hkan zingri nna gumhpraw nyap sha hkawm nga ai da. Ndai zawn re ai mabyin masa ni a ntsa e Salang Prangtai gaw gara hku lachyum hta ai kun, ngu ai hpe naw sang lang dan rit.
PRANGTAI:- Satan gaw Wunpawng Myusha ni hpe shamyit kau dan ai hte Myenmung ting na masha ni yawng  a shagri hpe abrep mani kau ya lu na sai nga nna shadik shatup sa wa nga ai hpe Yehowa n ra sharawng ai rai nna, Rohingya manghkang hpe shalat ya dat sai. Satan gaw prat chyanat hta Rohingya ni hpe dang sha wa yu sai hte maren, ndai lang gaw amani rai shakre kau na ten du sai nga nna myit la na nu ai. Raitimung, Rohingya ni gaw lai wa sai ten ni hta mahkawng wa ai mara ni a ntsa matai htang ai hku nna satan hpe dam ari jaw na aten du sai. Ndai gaw mau hpa langai rai sai. Matut nna Yehowa gaw mau hpa amyu myu naw madun na re ngu kam let kyu hpyi nga ga.
Kaja sha nga yang sumtsan mungdan langai gaw KIO hte Myen lapran kaw simsa lam bawngban na matu janghtung tai ya mayu ai lam tsun shapraw wa sai. Dai hpe ahkyak shatai la ai rai yang rawt malan hpung ni a matu laknak kaba byin wa mai na re. Masha ni a shawng lam gara hku galai shai wa na lam maram ai hta shanhte a hkam la ai akyang hpe npawt nhpang tawn nna maram ai gaw pru wa na mahtai hpe tau mu lu ai lam rai nga ai. Shing re ai masa hta hkan nna dai ni na ten hta Myen a akyang gaw mai kaja ai de galai shai wa sai she rai yang, Ma Kaw jan hpe arawng aya shagrau sha-a ai a mahtai gaw mungdan ngwi pyaw simsa ai de galai shai wa na re. Raitimung, Anorahta prat kaw nna dai ni du hkra makawp maga wa ai Myen a akyang gaw dai ni na ten hta mung galai shai ai lam rai n nga ai rai yang gaw, Ma Kaw jan hpe aten langai hta arawng aya jaw let asung gan jashawn la nhtawm, "Rai Sai" ngu ai hte Ma Kaw a shawng lam gaw kalang ta grit nem ai maga de galai shai wa na re.


Yungwi Dau Lum hpe mara shagun na malai, grai she na matsan dum sai wa re. Wunpawng Myusha shada zang ayai hkat wa na matu satan wa a gat lawk tam nga ai kaw asung jashawn katut kau nu ai. Shi a asak lawt lu na matu gaw satan wa shangun ai hte maren hkan galaw ra mat nu ai. Shi hkan jahkrit la lu ai gumhpraw gaw shi a matu pyek mi pyi n lawm na re. Satan ni a sumbu kaw she ashang mat na sai. Anhte Wunpawng Myusha ni shada chye na myit tau ya hkat ai lam n nga ai rai yang, shi a shawng lam gaw myit mada shara n nga sai.


Mungdan kaba langai myit la ai hta satan gaw shi a lata na hka re nga nna hkam la ai lam nga wa na sai. Raitimung dai ni na ten hta dai mungdan gaw satan a lata na hka de gale wa sai. Dai majaw sum mat ai sali wunli hpe bai htang la lu na matu gaw satan wa shangun ai hte maren satan wa gasat nga ai majan dang la lu na matu jawm jahkrit shama ai lit hpe hkan shadik shatup ra ai madang de du mat ai rai na sai ngu nna maram mai nga ai. Dai ni na majan gaw Myenmung kaw hpang jahtum hkru ai sharaw wan rai nna ngwi pyaw simsa lam lu wa na matu ginchyum dat ai majan rai sai. Asak ap nawng mat wa ai share shagan ni yawng gaw Yehowa sharawng awng ai sumsing lamu mungdan kaw htani htana agrin nga lu mu ga.

Tengman ai lam tsun ai, ngu ai gaw, htingbu htingbyen nkau a matu kabu ai ni nga ai zawn, na pawt na ga-un ai ni mung nga chye ai. Raitim ndai zawn re dinglik maram ai lam gaw ngai tsun mayu la nna tsun ai gaw n rai na re. Salang LAGANG hpyi shawn ai marang e, loi li tsun shapraw dat ai she rai na sai. Madat n manu dum ai hpu shawng hpu ba ni a matu ngai hku nna dinglik maram ai ga si ga ngau a ntsa mara raw ya na hpe tau nna hpyi nem dat nngai law.


Puk Dun
17/8/2012

5 comments:

Larin said...
This comment has been removed by the author.
Larin said...

Dai mungdan gaw kaja wa n-dai lam hta ahkyak tawn ai hte myit lawm ai wa re kun? KIO ni n-dai hpe ahkyak la nna hkrum na matu grai shakut ra sai. Myen ni myit n-hkrum tim kaja hkrum tim kaja...raitim n-dai kaw KIO kawn 'positive respond' ahkyak re.

Anonymous said...

Myitsu ai MUNGDAN KABA ni dai ni byin nga ai SYRIA MANGHKANG ngut jang MYEN MUNG hte J.P. AN HPU AN NAU a MANGHKANG ni hpe mung hparan garum sa na ma ai.MYEN MUNG simsa jang she, SHANHTE galaw mayu ai hpaga lam hte kaga investments ni shang galaw na matu yu dinglik nga ai aten ladaw rai nga ai. W.P.BRANG.

Anonymous said...

K.K gaw mu kaba kalaw hkyen yang shi hpe kam na matu hpyen wa hpe myit grau shalut ya nhtawm jahtum e she atsai awoi sat kau kau re ladat lang chye ai.Dai majaw ya myen wa gaw ning-gam 3 lang ngu na n-gun kaba de htim sai majaw ndai lang myen grau si na matu K.K shi hpung shingkang shaw na nu ai.Anhte jinghpaw ni mung maigan ni shang shaga wa na matu hkrsitan hpe grai roi rip ai hku mung kan hpe grau nna htawng madun dat yang gaw mungkan de na hkristan ni garu wa yang myen nlu hkam jan na shadu ai.gara hku rai?

bu hkawm brang said...

Kasat gala jahkraw galu wa ai ten, woi awn ai ni ladat amyu myu shaw sa wa na lam hta, ndai zawn re mai gan mung dan kaji kaba ni hpe woi shang bang lu ai mung, Yehowa lam woi la ai lam ngu hkam sha lu ai. Ndai mahkrun byin mai na matu n loi na re. rai tim byin hkra jawm galaw mai nga ai. Woi awn ai ni ladat amyu myu shaw ai ten hta hpang hkan ai ni mung hkam sharang, chye na, shakut shaja ding yang, akyu hpyi ding yang rai nga na matu n gun jaw dat n ngai. Dang di lu na zawn n nga wa sai ngu hkam sha wa ai ten hta Karai nang hte rau rai nga ai hpe n malap ga. Galaw nang galaw ra ai bungli re, satan hpe gasat ai lam re ai n dai pangdung hpe mat hkra galaw nga ai satan a mau lanyet de n shang mat ga. Aten galu magang anhte hpe masha ni chye wa magang rai sai. Yehowa awng padang rai nga ai law.

Post a Comment