Slideshow Image 2

HTIM GANAW MAJAN HPE HTIM GANAW MAJAN HTE

 Wunpawng Mungdan Shanglawt Asuya KIO/KIA ningbaw ningla, Du salang ni, Hpyen Du, Hpyenla kaji/kaba hte tsaw ra ai chyurum Kachin Wunpawng sha ni yawng hpang de ngai mu ai ningmu hpe tang shawn dat n-ngai. Shut ai lam nga yang mung shading sharai la hkat ga ngu lajin dat ai.
1994 ning hta myit hkrum tawn da ai gap gasat jahkring myit hkrum lam hpe, Mungmasha Asuya  rai ga ai  nga nna tsun masu ai Thein Sien asuya (hpyen asuya) gaw 2011/06/09  ya shani kaw nna daini du hkra htim ganaw gasat taw nga ai myen asuya ni a ladat ni hpe yu maram yu yang....,
(1) Annau ni a n-tsa e shinggyim nauna myit tsep kawp nrawng mat sai.
(2) Annau ni hpe maigan hpyen hku nan masat kau mat sai kumla pru ai.
(3) Shanhte gaw masha jahpan grau law ai re majaw, Myusha majan gale kau dat mayu ai masa pru ai.

Ndai lahta na ginlam ga ngau ga hkum (3) ni gaw shanhte myen ni a myit kaw ya ya sha byin pru wa ai lam ni nre. Moi jau jau myen mungdan hpe shanglawt jawm la ai shani kaw nna rawng hkrat wa ai matse labye myit ni rai nga malu ai. Ndai zawn re matse labye myit ni hpe Annau ni daini chye kau ya ai majaw Annau ni hpe grau n-ju ndawng wa ai lam grau dandawng pru wa sai hku re. Dai zawn re myit jasat rawng ai myen asuya hte gaw tengman ai mung masa lu jahta na matu nloi nga ai. La ma mi gap gasat bai jahkring tawn lu tim, gara hku bai naw matut masu lu na matu ladat shaw taw nga na sha re. Shanhte kaw tengman ai mungmasa mungga madat ai baw na ntu ai. Shanhte kaw tu ai na gaw lagut na sha tu ai.
Dai majaw daini  Annau ni tengtup hpan (2) hpe kalangta jailang ra na re ngu mu mada ai.
(1) Sinat laknak hte htim gasat ai majan.
(2) Mungmasa hpe n-gup aga (laika media) gasat ai majan.
Annau ni a pandung shadaw de du lu n matu gaw ndai lahkawng kaw na gara hpe mung nmai shayawm ai. Dai majaw ndai ten hta Sinat laknak hte mungmasa laknak hpe rau kalangta jailang nna htim gasat ra ai ten nan rai sai ngu nna mu mada ai. Tsun mayu ai gaw myen asuya ni, Annau ni a Ginjaw Laiza hpe htim gasat taw nga ai zawn Annau ni mung, myen asuya ni a mungmasa ginjaw hpe htim gasat ra ai. Nepyidaw, Mandalay, Rangoon hpe tsun ai nre. Myen asuya ni hkrit tsang dik ai mungmasa ginjaw langai sha nga ai. Dai ginjaw gaw laga nre, myen mungdan kata kaw laknak lang rawt malan taw nga ai Amyu bawsang ni ga garan pru mat na (pyi htawng tsu mapyu koi ye) hpe hkrit dik htum rai nga malu ai.
Dai majaw KIO/KIA hku nna ya hkyak hkyak  UNFC hte jahkrup dawdan ra sai. Lai wa sai 10/06/2012 ya shani hpang jahtum tawn nna myen asuya a htu ganaw gasat taw nga ai majan hpe UNFC ni hku nna maram dinglik dawdan mat wa na matu ndau shabra tawn sai hte maren……,
Wunpawng Mungdan Shanglawt Asuya KIO/KIA  gaw Awmdawm Shanglawt ai pandung shadaw de madaw tsap sana re lam ndau shabra dat ra sai.
(1) Pang Lung ga shaka hpe nhkap la sai re majaw Kachin State gaw Burma ngu ai myen mungdan kata kaw nmai lawm mat sai.
(2) 09/06/2011 ya shani mara kata htim ganaw gasat hpang wa ai majan gaw maigan hpyen hku nan masat nna gasat ai majan re.
(3) La ma mi KIO/KIA ni hku nna nlu hkap ninghkap kau dat yang amyu shamyit majan hku nan yaw shada ai majan re.
(4) Awmdawm de sa ai hkrun lam hta Federal de sa ai hkrunlam gaw grau hkyemsa kun? Ngu nna tsun na lam hpa nnga ai. Lam lapran kaw zingri zingrat hkrum ai lam gaw maren sha re.
(5) La ma mi shanhte myen asuya ni jet ai Federal munghpawm mungdan hpe gawgap mayu ai rai yang majan pyi n-gasat ra ai re.
(6) KIO/KIA gaw shanhte myen ni a shara de sa shang tawt lai gasat ya ai ni nre.
(7) Myen asuya gaw gara asuya mi galai lai maren sha re, shanhte myen amyu ni up ai mungdan (Myanmar Democracy) gaw gap na matu sha re.
(8) Mungdan laga ga rai mat sai re majaw Kachin mungdan (Kachin Land) a Shadip jahpang tara (Constitution) hpe Kachin Wunpawng Myusha ni hte laga rudi Wunpawng (Kachin mungdan kata kaw shanu nga ai myen, Sam, Miwa, Kala) ni yawng hte htap htuk manu ai hku ka lajang la mat wa sana.
(9) Tawt lai shang ganaw bang da ai myen hpyen dap mahkra hpe aten masat tawn da ai laman hta dawm la mat wa ya ra na.
Asan sha tsun ginghka kau nna shakut sa wa yang gaw gade daram jamjau tim myit dik myit pyaw ai hte n-gun nnan bai dating la la rai lu na re.Annau ni yawng a myit hta raitim Awmdawm Shanglawt nlu nmai rai sai ngu ai myit akri rawng wa nare. Ndai ten hta KIO/KIA gaw Wunpawng Mungdan kata kaw nga ai mung masha kaji/kaba yawng a madi shadaw ai lam hpe tsaw dik ai shara kaw lu la tawn ga ai ten re. Mungkan kaw nna mung aten tup yu azi taw nga sai aten mung re. Myen asuya ni nbungli lang wa tim hpa n tsang ra ai. Annau ni hpang maga tsap wa ai mungdan kaba ni nga wa chyalu sha re. USA ni annau ni maga tsap wa chyalu sha re. Kaba ai wan hkru wa jang she wan je ai masha ni yan sa wa na re. Wan sa je garum ai masha ni gaw tara ai ni maga tsap chyalu sha re. Ya ya nan ntsun ginghka kau yang hpang hkrat wa na masa nga wa sai. Thein Sein asuya gaw mying kaja lu wa nna, KIO/KIA madaw nhtang hku mying hten wa na masa de gale wa ngaai. Hpa majaw nga yang, Mungkan kaw nna myen mungdan a ntsa e chye na ai gaw myen hpyen asuya a majaw shinggyim ahkaw ahkang hkrat sum taw nga ai hte matsan chyaren mat wa ai dai hpe sha madung chye nga ma ai. Hpa majaw KIO/KIA hte gap gasat nmai jahkring ai a lachyum hpe gaw nchye nna, KIO/KIA gaw simsa lam nra ai majaw gap gasat nkam jahkring ai ni re ngu ai maga de gale wa nga ai.
Annau ni Awmdawm ndau shabra dat jang she, myen asuya a kyang laban ai lam ni yawng dan dawng pru wa na ra ai. Dai shaloi she mungkan a man kaw tara shang ku ntsa kaw lu hparan la na re. Ndai gaw myen asuya a ginjaw hpe htim ganaw gasat ai mungmasa laknak kaba nan rai sai. Dai majaw HTIM GANAW  MAJAN  hpe  HTIM  GANAW  MAJAN  hte……
Daini nan dai ten hta gaw Annau ni a kashu kasha prat, Shu mashi shu masha prat, ban hte ban, prat hte prat, Htani htana a matu, Myit ung ang ai lam tsep kawp nrawng ai sha gwi gwi dawdan ra sai ten re. Hkrit myit tsep kawp nmai rawng ai. Hpan Wa Madu Yehowa Karai Kasang a Awng Padang Ninglaw gaw annau ni a ntsa e shadik shatup lu u ga.

Sau Nan Du
12/08/2012

11 comments:

Ma Tin said...

Sau Nan Du wa nang na ningmu ni kaja ai,ngai na ningmu gaw ,ya du hkra AWM DAWM KUN? ,Munghpawn kun? grai nlu daw dan ai majaw asan sha nlu ndau shi ai ngu mu mada ai galoi du naw la alet dudaw sai hkaw na kun? ngu myit puba let akyu hpyi nga ga ai lawan dawdan lu mu ga

Sau pyaw la said...

Dai daram ram an hte jinghpaw ni hpe sat shamyit na sai nga mungkan ting chye taw sai hpa rai aten garawt taw ai kun ? ngai gaw awm dawm yaw AWM DAWM mungkan ting na jinghpaw ramma ni yawng wa manit ngu aming jaw dat manu law

Myu Sai said...

Shang Lawt KIO/KIA gaw AWM DAWM SHANGLAWT AI WUNPAWNG MUNGDAN hpe yaw shada ai gaw rai na re. Dai majaw mung KNO/UKA hte langai sha shabawn kau ai lam rai nga ai, ngu chye na ai.

Rai tim Munghpawm Myen Mungdan ngu ai ningmu hku yu yang, Federal Democracy Kachin State hpe tsun shakut ai gaw, mungmasa hku hkap la lu na ga hpe tsun shaga nga ai rai na re. Awm Dawm ngu ndau shana dat jang, Myen shawa yawng Hpyen Asuya hte myit mang bai hkrum mat nna n-gun bai shajat ya ai tai na tsang sam ma ai.

Bai nna Awm Dawm gasat na matu shajin ai lam hta lam magup garai n jin ai mung rai nhten. Dai majaw Awm Dawm a matu hkyen lajang ai rai tim shana gaw garai n shana dat ai lam mai byin ai. Jin wa jang gaw shana wa kun, ngu myit mada ala nga nngai. Annau ni arang grai bang sai majaw AWM DAWM de yawng ai lahkam she woi htawt marit, ngu Myu a Ningbaw Ningla yawng hpe lajin dat nngai law.

Anonymous said...

Dai ni na Thein Sein Myen asuya a simsa lam masa hpe tsep kawp nmai hkap la ai ngu mu lu ai. Awng Min wa woi awn nga ai simsa hpung ni gaw maigan gumhpraw (USD) shang wa na hkyen ai lachyum sha rai nga ai. Daini Norway Asuya woi awn ai peace fund gaw Yangon kaw nga ai Thein Sein Asuya quasi-civil society rai nga ai Myanmar Egress ni sha akyu hkam sha wa ra re ngu mu mada ai. Lachyum gaw Myen amyu ni sha re. Dai majaw KIO/KIA hte simsa lam bawngban ai hpawng hta Myanmar Engress na masha ni hpe nmai hkap la na re ngu shadum dat mayu ai. Myanmar Peace Centre mying hte dollar hkam ai lachyum sha rai na malu ai.

Tsun mayu ai gaw lahta na laika ngau hte comments ni hpe madi shadaw ai lam tsun mayu ai re.

Anonymous said...

Awm dawm shanglawt gaw grau kaja ai lam gaw rai nga ai. Raitim mung masa galaw ai re majaw aten grai jahtuk nna she dawdan ga re lu. Mung masa gaw galang mi galaw shut jang sharai la grai yak ai baw re hpe dum nga ga. Ga shadawn, ya anhte gajai taw nga ai Panglong ga sadi kaw sa lawm dawdan shut kau dat ai majaw daini du hkra du daw sai hkaw hkrum sha nga ga ai re hpe mung dum nga ga. English Asuya ni tsun ai ga hpe lama hkap la dat ai rai yang daini gaw Kachinland nga nna san san nga na hpe Myen Amyu Aung San wa a hkalem ai ga mung masa nkung ai, mung masa salang ni daw dan shut kau ai majaw re. Gara Myen hpe mung nmai kam ai. Aung San Suu Kyi hpe mung nmai kam ai. Shi mung myen sha re.

christopher said...

Dai ni annau ni myen a baw nu gara hku gayin maw nga ai ngu ai hpe tau na chye ra na prat mung du sai.bai nna chye nga ning len hpa nmai galaw ai yup dip dip nga ai zawn byin taw nga sai.1961 kaw na 1975 ning ram du hkra ntsun saga,1980 ning e shangai shaprat wa ai ni ya gaw sak 30 pyi jan mat sai.1980 ram kaw na SHANGLAWT she lu yang gaw dai ni annau ni a WP MUNGDAN garai galu kaba sai ngu sawn mu ai.SHANGLAWT nga ai majaw mung dai ni du hkra WP myusha ni naw nga taw ai rai nga ai.

wild ones said...

Mungdan shara shagu kaw nga nga ai..jinghpaw wunpawng sha ni e.shawnglam de nga ai myu tsaw share shagan ni yawng a matu shani shagu a hkying a ten shagu ja ja kyu hpyi ya nga ga law...

Anonymous said...

yawng a ni mu grai hkrat ai

Khao Leam said...

Lahta na Myitsu wa a HTIM KANAW MAJAN HPE HTIM KANAW MAJAN HTE ningmu hpe (100%) madi shadaw nngai.

Anonymous said...

Sau Nan Du a tang madun ai ningmu laika gasi ga ngau ni yawng hte comment jaw ai myit manaw manang ni yawng hpe madi shadaw nngai,n-gun jaw nngai.daini na annau ni a matu Ahkyak dik ai mahtai,jaw dik ai myusha ni a lawt lam kaja dik ai mahkrun hta hkawm sa lu na matu anhte yawng matut shakut ga.ANHTE A AWNG PADANG YEHOWA KARAI KASANG hta manoi manat let tinang gun hpai ang ai myusha lawt lam magam lit hpe matut shakut shaja nga ga.N-GUN DA TING GA.

Anonymous said...

Lahta na HPUNAU NI yawng hpe aja awa madi shadaw dat ai.Dai ni SATAN wa up hkang ai MIWA MUNG,KALA MUNG hte DEMOCRACY mying lang masu ai THEIN SEIN MYEN ASUYA ni ANHTE J.WUNPAWNG SHA ni hpe shamyit shamat kau nna KARAI KASANG jaw tawn da ai mungdaw mungdan hpe garan hpyak sha na masing hpe KARAI KASANG kaw na atsam marai hte matut nhkap sa wa yang TARA RAP RA ai lam hpe ra sharawng ai MUNGDAN KABA ni mu mada let ,AN HPU AN NAU ni maga de shang tsap ya chyalu re,myit kaji na lam n nga ai,AN HPU AN NAU ni myit hkrum na sha ahkyak ai yaw. W.P.BRANG.

Post a Comment