Slideshow Image 2

JAPAN DU MYU SHA NI HPYEN YEN TSIM YAM NI A MATU ALU TAM

August (7) bat Lahkawng
Japan Mungdan Tokyo mare, Jinghpaw Wunpawng Hkristan Sim Sa Nawku Hpung (Kachin Christian Peace Church / KCPC) Ramma ni hku nna, Kanu mungdan kata kaw myit hki lit li bu ba jamjau hkurm shajang nga ai Padang Hkrun lam hpyen yen tsin-yam amyu sha ni a matu myit yaw shada let, 2012 ning August (5) Laban shana de, Nawku zuphpawng ngut ai hpang, Jinghpaw Wunpawng shat shatmai malu masha hpan amyu myu, Gyinshau si, lu hpa amyu myu ni hpe dut garan jaw ai lai hte amyu sha lam yan hta myit hkrum mang-rum n-gun mi alu, alu tam lamang hta shang lawm shakut lai mat wa masai lam chye lu ai. Dai hte maren Tokyo Jinghpaw Wunpawng Hkalup Hpung (Tokyo Kachin Baptist Church / TKBC) ni mung lai mat wa sai ten ni hta hpyen yen tsin-yam amyu sha ni a matu alu tam myit sharawt ai lam ni galaw lai mat wa masai lam chye lu ai.

Du na ra ai 2012 ning August (11) bat kru ya shani mung, Japan du Jinghpaw Wunpawng Laili Laika hte Htunghking Hpung ni hku nna woi awn ai hte, Japan du amyu sha ni hku nna Panglai hkin-gau de Ginhtawng n-gun awai ai hte hpawn, Padang hkrun lam Hpyen yen sai rum amyu sha ni a matu alu tam lamang galaw na re lam mung chye lu ai. Lai mat wa sai ten hta mung (Kraw dung sai ga shing-ni pinra) lamang hte Hpyen yen tsin-yam sai rum amyu sha ni a matu alu tam ai lamang hpe galaw lai mat wa masai lam chye lu ai.

Japan du mung masa wuhpung ni hku nna mung, kanu mungdan hpyen yen tsin-yam amyu sha ni hte Padang hkrun lam kaw ta tut shang lawm shakut shaja nga ai ningbaw ningla share shagan ni a matu, dang di lu ai maga hku nna ap nawng shakut lai mat wa masai hte maren, matut nna mung hkum dek shang lawm lu hkra mahkrun amyu myu shaw let myit sharawt shakut nga dingngam re lam mung chye lu ai. 

Ya ten hta Kanu mungdan kaw sha n-ga, mungkan mungdan (22) kaw chyam bra shajang nga ai Chyurum Wunpawng amyu sha ni yawng ndai Padang hkrun lam majan kaba a majaw, Padang Madu Yehowa hpe grau nna kamhpa manoi lu ai Wenyi makam, hkumhkrang kaga rai shajang nga ga timung, myu tsaw mung tsaw myit gaw moi na hta grau n-gun ja wa lu ai gaw, manu byat n dang lu ai amyat kaba mahkrum madup nan nan rai nga mali ai law.

3 comments:

Jatawng Naw said...

Grai mai kaja ai lam rai nga ai law. N daw n hta jaw ya ga. Lam sha gu hta garum shingtau la ga. Tinang hte seng ai ni hpe tinang a hkum hte maren tsaw ra nga ga..
"Jaw ya ai wa gaw grau lu jat wa na ra ai".. Karai Kasang Wa kaw na ndaw nhta ai shaman chyeju ni hpe matut hkam la lu u ga law..

mukchyit said...

Anhte W.P myu sha ni wa gara kaw she du tim pu dun sin machyi hkat nga ai hpe mu lu ai shaloi grai myit pyaw myit dik ai. N dai zawn tsawra myit madun let shakut shaja taw nga ai Japan kaw na Jinghpaw W.P myu sha ni hpe K.K grau n'na shaman ya u ga...

mukchyit said...

Anhte W.P myu sha ni wa gara kaw she du tim pu dun sin machyi hkat nga ai hpe mu lu ai shaloi grai myit pyaw myit dik ai. N dai zawn tsawra myit madun let shakut shaja taw nga ai Japan kaw na Jinghpaw W.P myu sha ni hpe K.K grau n'na shaman ya u ga...

Post a Comment