Slideshow Image 2

MYIT DA TING GA

Masha ni zim wa jang n'lung ni shaga wa na re, maling hpun ni madai wa na. Myen she zim nga yang annau ni mung hpa majaw zim nga ai ta? Myen zim ai ten annau ni htu gasat n'na sakse madun ra ai re, ya gaw myen mung hte seng ai UN rapdaw Salang sa du nga yang annau ni myen tara n'lang ai shinggyim ahkaw ahkang ginlut hkrum nga ai hpe sakse hku gap madun dan ra ai hte, hpyen yen tsin ni a matu n'ji n'gu tang mi adu gasat madun dan ra ai re.
Annau ni a mung masa gaw, ja mung n'rai kya mung n'rai, katsi mung n'rai, lumnai re dum ladum hka yawng ai zawn re masa hta bai tsap madun ai gaw myit da ting dik nna kamhpa shakut nga ai myu sha ni a matu saiwan ka-up shamawng ya ai masa byin nga ai. Ngai sawn mu ai gaw myen shayawm tim annau ni ja ja tang mi adu htu matsut dan yang she mungkan na ahkyak la ai, makau grup yin a shaning 60 ning hkawt mau tau tau maw langyet kaw na kam hkalut ai maumwi dingsa kaw na lawt pru dan ra na re. Annau ni a pan dung gaw hpa ta?
Tara n'lang dip gamyet, laknak hte jahkrit shama tara jeyang ai tara kanu a n'tsa kaw up hkang sha ai ni hpe n'ra ai jaw, sak ap nawng nna dai zawn re kaw na lawt pru na matu gumlang rawt malang ai. Shinggyim ahkaw ahkang maren mara lu na, tara rap ra ai hte up hkang na, shimlum ai shinggyim nauna myit shinggyim uhpawng tai lu na matu shanglawt ngu ai ga si pru wa ai re. Dai ni annau ni rawt malan hkrun lam gaw masa hpe yu nna shagrin ai mung masa kun? Tara hpe yu nna shanglawt gasat ai kun? Democracy lu ra ai majaw gasat ai kun? Myu Sha langai mi lu gin lu-ang ai ahkaw ahkang a majaw kun? Tinang myu htunghking ga hte tinang buga hpe tara rapra ai hte magam myit hte annau ni up hkang lu na matu kun?

Dai ni myen ni gaw shanhte shara shim lum hkra, shanhte shada gaw dang lu ai daram chyawm madi shadaw n'na myen re myu kaba re hpe madun lu ai daram madun nna garum hkat ai ten re. 8,8,88 ni 24 ning hpring lamang galaw na lam hta myen asuya ni nan ja gum hpraw garum nna galaw shangun ai, moi gaw hpyen ya gaw sai ga shaga nna ahkyat hta madi shadaw ai re hte Aung San Su Kyi mung annau ni lam hpe kachyi mi mung myi n'mu na n'tu ma a, zawn galaw dan ai, hte myen media ni shi laika shi htawn dap ni gaw Myitkyina kaw annau ni ninghkap ai n'gun madun ai zawn re hpe ahkyak n'la ai hte moi myen shada ninghkap n'gun madun na maigan mungdan hkan shanu nga ai myen ni yawng mung dai ni gaw myen a myu kaba ladat hpe mayun madi shadaw ai hkra re. 8,8,88 jawngma hpung hpe gaw annau ni myit n'tsen ai hte myi n'kyen n'da de yu maram ra dik ai hpung re, myen a lagaw lata myi kaba na kaba shatai nga ai hpe dum ra sai.
Madu mungdan ahkaw ahkang hpyi ai rawt malan lam hta annau ni gaw shinggan kaw nga nna laknak hte gasat nna hpyi ai ni re hpe ja ja dum ga, kya nga n'mai ai, annau ni gaw shinggan kaw nna mung masa munglu gasat ai majan hte gasat nna madu awmdawm shanglawt ahkaw ahkang hpyi ai ni re majaw mazut ra ai ja ra ai. Annau ni grau n'mazut yang hpyen wa gaw wa nyem u nyem roi hku grau mazut nna gasat chyalu re, dai ni na majan hpe laning mi maram wa yu yang hkap gasat sha rai nga ai, moi na hte hpa n'shai ai hpyen zai ladat shai nga ai, dai ni annau ni n'htang htu htim gasat re ladat hpe zai ladat jaw jaw lang ra ai. Myen zim tim annau ni ya ten n'mai zim ai, myen zim ai kaw nna gaw annau ni hpe pahkam hkam tawn chyalu re. N'sim n'sa maidang dung ten pyi n'lu hkra myen hpe yup n'lu sha n'lu hkra ladat hkum hkum hte gasat ra ai. Myo kata mare kaba ni hkan rawt malan shiga ni law shabra ra ai hte media hku na mung ja ja gasat ra ai, maigan mungdan shagu de mung sumtang laika shadu shakut ra ai, shani shagu shawng lam du nga ai myen ni hpe shatsang shalau ra ai.
Myen galaw nga ai hpaga masa yawng hpe ten hpring shatsang ra ai, Miwa hte galaw ai hpaga lam yawng ja ja jahten dan ra ai, yenan, gas n'mai lai hkra jahten gasat kau ra ai shaloi she myen hte hpaga pawng galaw mayu ai ni myit ung ang ai hte kamhpa lam hkalut na re. Annau ni a tengman lawt lam hta ladat hkum hkra lamang hkum hkra hte myen zim tim annau ni n'mai zim ai. Moi mung chyinghkrang ya mung chyinghkrang hpawt ni mung chyinghkrang shatmai sha sha dan na kun? Ninghtoi du jang shani, ningsin sin jang shana, yup ngut jang rawt sha rai nna sumri sumroi sumdan shinggyim myu sha prat hpe shalai kau na kun? Loi sha ra sai, naw dating ga, yi ngam ngut na shakre na rai sai naw shakut ga, n'htoi htoi nna u goi wa ra ai, naw sharang dating n'gun awai n'gun ningnan ban la nna ja ja mazut zut gasat shamyit la na ten du sai. N'lung gawdin htawng dan na, zai bru sumri rit dan na, Kala sum pyi dum dan na.

Baren Numraw
7/8/2012

5 comments:

Larin said...

Myen zim ai gaw n-mu nna ga ai...Majan bai hpang wa ai shani kaw nan "bawngban taw ai lam" nga ai nga KIO she zim ya zim ya nga na lu ai...dai shaloi myen ni bai htim gasat ai. Ning re ai gaw ya ya bai taw nga ai. Dai majaw myen gaw zim na re ngu jahta ai baw pyi n-re ai....zim ya zim ya re ai tinang asuya hpe she ya shadum ya shadum di na ahkyak rai sai.

Myujet said...

Teng dik sai,an nau ni moi kaw nna myen a maw langyat ai hkrai hkrum sha ai,myen ni hku nna simsa lam bawng shaku ntsa du taw tim gasat ra ai,nmai sha yawm ai,.ya na ten mung shawa daw tsa myit ngun hte shang lawm gasat ai KIO/A ni akyu chye ja shawn lang ra ai.hpyen ngun shawa daw tsa ngun hte gasat yang padang dip la na gaw lamu ga lahtum n shut na re,

Machyu Bum said...

Tsawra ai myitrum ni e..ya du hkra lahkawng maga zim ai lam gaw nnga shi ai hku re,KIO/A ni hku nna mung, lam shagu hta zai ladat rawng let, Myu sha yawng a gam maka hte shawng lam hpe woi awn nga ma ai law..ladat myu hkum hkra hte Myen hpe gasat na gaw, KIO/A a lit sha nrai nga law,,lam magup hku nna,WP myu sha yawng, mungdan shagu hta Myu sha lam yan hta shanglawm na gaw ra ahkyak dik htum rai nga sai, yawng n-gun naw da ting let....shawng lam de.....

Uyen Sinwa said...

Myen n zim ai gaw shiga kaw ayan ka bang nga ai. Raitim Shang Lawt shawng lam de nga ai hpyen la ni tinang a post de Myen dai daram law nna htim sa wa ai hpe shiga pyi n lu la ai nga pyaw a-jawng nga ai shaloi ma ja htim gasat ai ngu ai (Sadung, Lu Htawng Post htim ai shiga) nan ya jang sharai ra ai lai sat lawat ni rai nga ai law.

Moi gap jahkring ai 17 ning laman na lungseng, ja hte hpun shalai ai lauban ni kaw na hta da ai hkan se gumhpraw ni gaw gara de rai ma sai kun? Mung kata hte mung shinggan e ayak ahkak rai nna shingbyi hkawm nga ai (Mungkan mungdan law law de refugees tai nga ai Wunpawng sha ni, law malawng sha na pyi law n law she re madang hta mayam zawn kaga ni na kam galaw ai nyem dik ai bungli ni sha galaw nna kan bau nga ai ni re.)kaw na karum gumhpraw hte sha majan gasat jarik kam na nga ai mung dang law na n rai nga ai.

Dai majaw, ya KIO/KIA hpe woi awn nga ai ningbaw ningla hpa-awn kaji kaba yawng hte shawng lam majan pa kaw nga nna majan shang nga ai hpyen du hpyen la share ninghkring ni gaw ndai majan hta ahkyak htum rai nga ai law.

Sumtsan mungdan du nga sai kaw na Wunpawng buga de wa nna majan wa gasat karum na, ngu ai mung hpang hkrat na sai. Bungli nhti nhtang rai daw dan ai lam nhti nhtang re ai lachyum sha re.

Dai majaw ya gasat nga ai ni tang du dik ai hku gara hku gasat na hpe myit let majan poi shang mu. Ningbaw ningla ni mung Gumsan Thein Sein a majan hkum htim, nga ai aming mungga hpe pyi hpyen dap gaw n madat ya ai hpe yu nna dum chye ra ai lam gaw, dai gumsan Thein Sein wa a simsa ga baw hte bawng ai lam gaw sen htu hkat hkra rai tim kaja sha simsa na matu pahkam (ama hkam) n nga ai hpe dum ra ai. Hpyen dap hpe ga pyi n kang ai Thein Sein hte hpa rai bawng hkam nga myit ta? Thein Sein hte bawng nna gap jahkring sen htu ngut tim, Myen hpyen dap gaw grau she gasat anut na re hpe dum ga. Gap jahkring sen htu ai hte rau ma ja gasat shamyit kau na, ngu ai masing re ai hpe tau hkrau n mu ma ai kun?

Majan zai ladat shaw nna kyin nga na ningbaw ni wa ya gaw, Myen e jaw ai htani htana simsa bawngban ga baw hte kyin mat shajang nna, majan zai ladat shaw na n dum, shani shana n rau n htau hpyen zai ladat shaw nga na bawnu ni gaw simsa lam bawng ban na hta hpa wa tsun na myit taw nga mat sana re majaw majan ladat shaw ai de tang n du mat wa ai kumla hpe mu mada lu ai majaw simsa bawng ban nga ai hpyen de na ningbaw ningla du kaba ni hpe shadum dat nngai law.

Myen ni gaw Srilanka mungdan asuya ni, Tamil Tiger shang lawt hpung hpe UN lapran salang Nambiah hpe lapran e ginhkrang shangun masu nna, dai hpe kam nna gap jahkring simsa sen htu na sa wa ai lam kaw (black area, majan operation zone kaw naw rai nga ai kaw)lam e hpyen dap e dai Tamil Tiger rawt malan ningbaw ni yawng hpe gap sat sharu kau ai re. Dai hpe asuya ni hpyen dap de shiga jaw ai rai tim, shawng lam de shiga lawan n du hpang hkrat mat ai majaw byin ai re, ngu htai kau nna shangut kau manu ai re. Dai hpang shata mi na jang, Srilanka asuya hpyen dap na dap awn daju wa Myen mung de sa chyai ai hpe Myen ni san la nna ya na zawn an nau ni hpe bai di wa ai lam rai nga ai. Ndai majan gaw the same model re hpe dum sadi ga.

KIO/KIA hte bawng shagu Myen hpyen n-gun jat nna KIA post ni makau shani jahkrat da ai gaw myit lagut rawng ai hpe mu lu ai. KIO/KIA ni gap jahkring sen htu ai hte tinang shawng lam de nga ai hpyen la ni hpe sanat hkum gap manu, ngu aming jaw dat ai hte rau, nayi hkum mi hkum lahkawng lapran laman (kadai pyi n chye kau dat ai sha) an nau ni a dap ni hpe hpya ayai kau na lachyum myit lagut ladat rai nga malu ai. Dai gaw Srilanka Tamil Tiger ni hpe shamyit ai strategy model nan rai sai.

Dai majaw Myen hpyen ni hpe an nau ni a post hte grai naw tsan nga yang shalau shanut, shabya ra na re. Hkyen sa wa ai masha n-gun, hpyen plan masing bungli n byin mat hkra tsan tsan e naw rai nga yang jahten kau ya ra na re. N rai jang tsang ra na re. Hpa garai n byin ai ten ndai zawn dum sadi na matu myu tsaw shawang myit kaba hte shadum dat nngai law.

Anonymous said...

Awngdawm gumsan mung dan lu sai ngu kam ai.anhte mung anhte a amyu anhte a gumhpraw anhte a jawng anhte a rit kaw Tara hpe Karai kasang jaw sai.ha le lu ya..................

Post a Comment