Slideshow Image 2

SHARE SHAGAN SUMHKA BRANG JA (MU SHABRANG)

Wunpawng Mungdan Shanglawt Asuya, Dap Ba (3), Dung (27) uphkang ginra kaw grai magrau grang apnawng lai wa sai, Share Shagan Sumhka Brang Ja a lam hpe Chyurum Wunpawng myu sha ni yawng hpang de, jawm myit dum shingran shagrau sha-a nga ga ngu nna tang madun dat nngai law.
Share shagan Sumhka Brang Ja gaw Mung Hkawng Je Sawn mare kaw na rai nna, Madu jan gaw, Jan Chyauchyi Hkawn Jan ngu ai re, Kasha  la 2, Num 3 a kawa rai lu ai. Shi gaw Dung 27 kaw shang lawm shamu shamawt nga ai, Mung shawa hpyen la rai lu ai. Lai wa sai 2011 ning June shata 9 ya, majan byin hpang wa ai kaw nna, Manmaw, Man Je, Kai Htik, Mung Hkawng, Nam Lim, Je-u grup yin hku nna lung wa ai Myen tai hpyen ni a hpyen Mawdaw nawng nawng hkap kapaw sat kau ya ya re hta, grai ningtawn ai bawm hkam sara (တကိုယ္ေတာ္) gasat ninghkring wa rai lu ai da. Shi hkam sat kau ai myen hpyen ni gaw n law htum (200) jan rai sai lam hpe mung na chye lu ai.
Shi hpe "Muq Shabrang" ngu amying shingteng masat shagrau ya ai lam gaw, Bawm hpe hpun ntsa hkan e mung hkam da da rai nna nat kapaw bun dat dat re majaw, Myen ni gaw Mu achye ai she shadu du rai malu ai da, dai kaw nna "Muq Shabrang"  ngu mying gumhkawng lai wa sai re. Myen ni mung ram ram hkrit let shagri brep mat ma nna, Mu Shabrang wa a lam shiga sha hkan sagawn let, lu rim la hkra ngu ladat amyu myu hte  hkan tam nga ai ten hta e.
Lai wa sai 2012 May shata praw (1) ya jahpawt (8:00am) hta, Myen ni gaw madu jan hpe ja gumhpraw hte hkalem la nna, Gumhpraw sen (8) mung gun, sinat M-20 lahkawng mung matep lang rai, Cycle hte kasha (1) mi hpe htaw nna myen dap shawng hku lai wa ai kaw hkap rim la kau hkrum ai lam shiga na chye lu ai. Lu rim la kau ngut jang myen ni gaw, gumhpraw sen (8) kaw, seng (2) she bai jat, Sen (10) hpe madu jan kasha ni matsan mayan ngu nna, Kasha hkan nu ni hpe bai sa ap ya ma ai nga nna mung tsun dan ma ai. Ya yang madu jan hkan nu ni gaw, Nawngtau Yang Lu hpyen yen dabang kaw nga nga ma ai lam chye lu ai.
Lu rim la ai hte kalang dat zingri bang mat wa ai gaw, bawm hkam ai lata ngu nna tawk di kau ya nhtawm, shi a magyin shan kadoi la nna mung ju jaw rai, zingri sat kau ai lam na chye lu ai. Raitim mung madu jan hte dum nta masha ni gaw, ya du hkra si ai, hkrung ai n lu sagawn ai sha mau nga ma ai lam tsun dan ma ai.

14 comments:

Anonymous said...

myen ni hkalem ai ai hpa na gadawng mat ai kun gaw. anhte jinghpaw ni wa ya du hkra myen hpe hpa na kam sham bu ma ai kun le. myen ngu ai ni gaw tsa dan she re. tsa dan hpe kam yang gaw yawm wa, hten wa ai baw re le. raitim mu shabrang wa sat kau ai myen 200 jan rai sai nga nna, grai arawng la ai lo. shi ap nawng ai lam hpe KK shaman ya u ga. ngam nga ai nta masha ni hpe mung KK shaman ya u ga.

Anonymous said...

MAGRAU GRANG AI MYUTSAW MUNGTSAW SHARE SHAGAN SUMHKA BRANG JA AQ dum nta masha ni hpe myit ngunjaw nna ra rawng ai lam hta jawm madi shadaw garum la ya jang grai htaphtup na re ai ngu mu mada ai..

Anonymous said...

Myen sat ai pyi nrai re nga ai le,madu jan sat ai she rai re nga ai le... sen matsat hte madu wa hpe sat kau re nga ai le. ngai gaw dai hku chye na ai le... ndai laika ngau hpe hti yang...

Larin said...

atsawm n-chye na ai...."Lai wa sai 2012 May shata praw (1) ya jahpawt (8:00am) hta, Myen ni gaw madu jan hpe ja gumhpraw hte hkalem la nna, Gumhpraw sen (8) mung gun, sinat M-20 lahkawng mung matep lang rai, Cycle hte kasha (1) mi hpe htaw nna ......" nga ai, dai gumhpraw madu jan kawn madu wa hpe jaw ai i? myen ni dai gumhpraw gun na lung wa ai i? clear n-byin ai.....

Anonymous said...

Nawng Tau Yang Lu hpyen yen dabang kaw nga nga ai gaw nga.. madu jan hkan ni si ai kun hkrung ai kun nchye ai gaw nga.. nchye na nga ai le.. ndai laika ngau gaw..????

sammung ramma said...

gumhpraw pyi la ngut sai me nchye ai gaw madan jan sat mung kau mu madu la a matu sha shut ai re myu ting a matu shut mat ai re sat kau....mat ten

Jatawng Naw said...

Sumhka Brang hpe hkungga jaw sha grau ai law. N dai hpu shawng wa zawn rai magrau grang ai Hpyen du/la ni 1000 ram sha pi nga yang gaw ... An hte Pawng yawng myu ni hpawt ni nan shanglawt lu sa na re..Ndai hpyen ningtawn slg wa a lam hpe yu yang Tai hpyen ninghkap majan hte dinghku a lit hpe kapyawn gun hpai ra ai majaw hkrat sum mat ai hpe lahpawt dik rai nga ai law. . Ma grau grang ai hpu nau ni a dinghku masha ni hpe bau rem makawp maga ya na matu mung anhte KIO/A ni hte Pawngyawng myu sha ni yawng hta grai lit nga ga ai law.
Karai Kasang Wa hpyen du/ hpyen ma yawng hte Mungshawa hpyen hpung ni ntsa tut bau sin makawp maga u ga law.

nawsan said...

Mu-Shabrang Sumhka Brangja hpe hkung ga jaw dat n ngai!!!!!!!!!

Anonymous said...

Ngai hti yang story nau nchye na ai,jinghpaw laika hpe atsawm nchye hti na wa re kun? ka dan ai wa a Ga si nhti-nhtang re majaw kun gaw nchye sai.Grai shagrau ging ai share shagan she re nga ai law

Anonymous said...

Grai nchye na hkra ka da ai le.

Machyu Bum said...

jinghpaw kasa e nang tsun mayu ai lam asan nga nchye na ga ai...Mungkan tingna WP myu sha ni hti ai re majaw, ya na zawn nga shiga hpe asan sha rai ka lu yang grai n gun lu na re.....

lamunglubu said...

Shiga yawng hpe chye na hkra mabyin hpe kalang bai ka mara ya rit, chyeju hte.

lu lu said...

Tsaw ra ai share shagan ni e, bungli kaba galaw ai ngau ai hta awng dang wa lu na matu gaw akyu ja ja gari hpyi ra ai re, tinang baw tawn yup hpang wa ai hten hta, rup rawt wa ai hte rau, hkawm sa wa shana rai jang lagaw lahkam htawt hpang wa ai hte rau rai galoi mung hpan da ai madu hpe kamhpa ai myit mahkra hte shi hpang de ap ya let akyu hpyi let hkawm sa shamu shamaw ra ga ai re lani mi hta kalang mi sha hpyi ai mung nlaw ai galaw sa wa ai amu magam lam shagu hta K.K hpe myit dum ai rai yang lam shagu hta awng dang wa na re. akyu hpyi shaja let sha hkawm sa shamu shamawt nga ga.

Anonymous said...

Anhte a mung hta myen gumhpraw sen matsat pyi nnga mat sai kun?

Post a Comment