Slideshow Image 2

TINANG A HPYEN KADAI

LAGANG:- Tinggyeng hpyen mi rai rai, Wunpawng Myusha yawng a hpyen mi rai rai, ladat hkum sumhpa hte anhte hpe gasat shamyit nga ai myen hpyen hpung ni gaw anhte yawng a hpyen majing rai sai.
PYILAN:- Salang Lagang hkam la ai ningmu hpe ngai hku nna mung tsep kawp madi shadaw ai. Myen hpyen hpung ni a daroi darat rai nga ai ana ahkya myu hkum sumhpa mung anhte a asak hpe shamyit nga ai ni rai nna, ana ahkya ni mung anhte a hpyen majing ni re. Dai hta n-ga, manawn chye ai, shatan chye ai akyang gaw tinang a myit kraw lawang hpe zing ri shangun ai rai nna, dai zawn re ai akyang mung tinang a hpyen chyarang kaw lawm nga ai.

PRANGTAI:- Salang nan a ningmu ni gaw manu rawng nna matsing sumhting la mai ai hkrai rai nga ai. Shing re ai majaw matut nna manu grau kaba ai ningmu ni lu wa hkra jawm jahtuk ra na re. Salang nan tsun wa ai hte maren anhte hpe jahten sharun ai hpyen amyu myu nga ai hta na anhte hte ni ai tsan ai hpyen madang ni a ntsa e dinglik maram yu ra na re. Shing rai ni ai tsan ai madang hta hkan nna ninghkap gasat sa wa ai kaw mung ashawng ahpang maram jahtuk nna lahkam langai a hpang langai gasat sa wa ai gaw awngdang wa lu na ladat rai na re.

Anhte hpe jahten sharun nga ai hta na ni dik htum ai hpyen gaw kadai rai ta, ngu ai hpe gara maga de mung n shanang ai sha mabyin masa majing a ntsa ading rai tsap nna dinglik yu dat ai shaloi, tinang gaw tinang nan ra sharawng ai nanghpam malu masha a majaw hten run wa ai majaw tinang hte ni dik htum ai hpyen gaw tinang nan rai nga ai hpe mu lu ai. Nanghpam malu masha n sha n mai nga nna kadai wa sa shagyip shagyeng ai mung n nga ai. Tinang sha mayu ai majaw sha ai hta hkan nna hten run mat wa sai. Dinghku masha ni gaw tinang hpe n ju n dawng byin wa sai majaw dinghku kata na nu wa hpu nau ni gaw nambat lahkawng ni dik htum ai hpyen rai wa nna shinggan na manaw manang law malawng gaw nambat masum hpyen byin tai wa sai. Myen hpyen hpung gaw grau tsan ai nambat mali hpyen she rai nga ai. Kahtawng langai kaw byin wa ai shiga lam tsun ga nga yang, tinang ra sharawng ai nanghpam malu masha a majaw si ai masha marai 39 rai nna myen hpyen hpung ni sat ai majaw si ai gaw marai 4 re, nga ai.

Tinang hte ni htum ai hpyen 1, 2, 3 hpe gara hku gasat dang kau lu na rai ta? Ngang kang ai dawdan lam hta machyu nna mi di chyip rai nanghpam malu masha hpe koi yen ai hte No. 1 hpyen hpe dang kau lu na re. Dai hpang No. 2, 3 hpe matut manoi dang kau lu na rai nna, dai No. 1, 2, 3 hpe kahkyin gumdin la ai n-gun hte No. 4 rai nga ai hpyen hpe teng teng gasat dang kau lu na re, ngu ai hpe shinggyim masha ni gaw teng tup kam nhtawm shadik shatup sa wa ai hte hkam dahka nga ai asak hkrung lam hpe prat tup jaw lup madu lu na ma ai rai.


Puk Dun
24 August 2012

1 comments:

Anonymous said...

an hte wp gam mahka gaw an hte a k.i.a/o nan rai nga ai dai majaw shawng nnan k.i.a/o hku na ndai namhpan malu masha hpe ja ja pat ning kap nna lu sha ai myu sha ni hpe mung mara nngu ai sha rim na sharin sha ga ya ga yawng gaw wp rai nga ai.dan na mai gan shara shagu hkan nga hkawm ai myu sha ni mung wp shada2 nging hka ga yawng gaw wp rai nga ai.shut ai rai mara raw ya mu

Post a Comment