Slideshow Image 2

TSADAN

Tsadan hkrit ai, Wunpawng hpe hkrai;
Myit daw u ga, Shapau shaja;
Lai hpan hkum hkra, Jahkrit shama.
         Laiza hpe wang, Hpyendap shakang;
         Laiza n lawt, yawng hkra shagrawt;
         Poi kaba shabyin, Mahkekna grup-yin.
Aw- ra- ra ga, Nau pa- pa- ga;
Kabung dum ga, Poi galaw ga;
Tau hkrau shana, Thein Sein a ga.
         Lahtaw Zau Ding, Myit ai n gring;
         Ka manawt shingni, Woi awn sumli;
         Myit M’sin gawngkya, Wunpawng manya.
Raitim kabu, Nhtang hku byin pru;
Nepyidaw mahtang, Poi ginra ang;
Kabu aw law, Anhte sa maw.
        Kabung dum ya, Shanhte hpyi nga,
        Htunghking manawt, Zau Ding woi sawt;
        Hkyen lajang ai, Lachyum rai sai.
        Aw- hka- She!
Htet shana mayu, Wunpawng hpe chyu;
Hpa mi jak lak, Myit masin ahkyak;
Hpawtni jahtum, Nhtoi mi hkrum.
       Myitru myitpu, Hkum rai nga u;
       Namsi hpun hkai, Masin shamai;
       Hkai hpang wa gaw, Myit madang tsaw.
4-5 ning, Namsi ni hpring;
Arang bang da, Kaman n nga;
Di sha lu na, Mahtai Kaja.
       Ahem! Htem lem, Myu tsaw myit dem;
       Wunpawng myit ja, Tai hkrit u ga;
       Shi grau myit chyum, Ladat ni htum.
I ya lak nak, Myit masin ahkyak;
Pye mi hkum yawm, Kyu hpyi shalawm;
“Anhte A Awng Padang, Yehowa Karai Kasang.”
       Awmdawm Shanglawt, Lu na ningpawt;
       Israela, Karai mahta;
       I mung maren, Kyu hpyi sharen.
Mauhpa Chyeju, Tai ni mu lu;
Sharawng shara, Madun dan ga;
Myit marai n tat, Sai jet n sh’mat; rai nga ga lu oi.

Shanglawt Tsing
23/8/2012

2 comments:

Anonymous said...

Hkawp myit su wa ShangLawt Tsing a, Kraw hkrat kadu pru wa ai nsen ni gaw wp myu ni yawng,grau nna gaw an hte ramma ni a matu wan shanan zawn ngu hkam sha ai ... Chye ju ka ba sai .
Dauje.

Agu nam ti said...

Ru yak jam jau Miwa ni gau
Masah myit mung nrawng tsin yam ni hpe grai gawng
Myen hte pawng sha myu sha ni a mtu ju shingna
Kade she dip tim n apyet, wunpawng masin ajet,
Hkam sharang lu na atsam, naw matut ra ai hkrun lam
Myen a ga sadi galoi n ding
Myu masin hpe wan tsi dat ai hta ram dik ai gaw
Shang Lawt Tsing

Post a Comment