- THEIN SEIN GAW A’RAWNG LA
- AWNG SAN SUU KYI GAW KUMHPA LA
- KIO/KIA GAW MUNGDAN LA
Tsaw ra ai chyurum Kachin Wunpawng Sha ni e daini gaw Annau ni a shadip jahpang Wunpawng Mungdan hpe daidaw la na A’TEN DU SAI re. Annau ni gaw Karai Kasang lata la hkrum ai amyu ni rai ga ai. Daini Karai Kasang lata la ai Israel amyu ni hpe yu yu ga, Sipraw sinna, Dingdung dingda, grup grup yin yin Muslim mungdan ni hkrai shinggrup da ai ka-ang kaw Karai Kasang lata la ai Israel amyu ni hpe yu nna n-gun la ga, Chye na hkamla ga, Israel amyu ni hpe mungkan ga ntsa kaw nna shamyit shamat shapai kau na matu Germany Hitla hte Muslim mungkan kawn kade jawm gasat tim nmai dang ai. Ndai gaw mungkan shinggyim masha ni hpe chye na mu ga nga nna Karai Kasang shi nan madi madun dan taw nga ai sakse re.
Dai majaw tsaw ra ai chyurum Wunpawng sha ni hte ta tut woi awn taw nga ai KIO/KIA ningbaw ningla kaji kaba ni yawng hpe n-gun jawsha-tsam dat mayu ngai law. Daini Karai Kasang gaw Buddha mungdan ni rai nga ai myen, miwa, gala a lapran kaw Annau ni hpe shi a hpungshingkang shadan jahkung nna ngang grin hkik hkam ai Amyu Kaba byin tai wa na matu lata la sai re. Karai Kasang lata la sai amyu hpe mungkan shinggyim masha ni gadai mung n shamyit lu ai, nmai dang lu ai. Ra ai n-gun atsam, nyan hpaji, machye machyang, ja gumhpraw sinli wunli hte sinat laknak ni ma hkra mung Karai Kasang kaw akyu hpyi apnawng nna shakut sa wa ga. Annau ni teng sha Awmdawm Shanglawt lu na re.
(1) N’teng nman ai hku A’RAWNG LA AI Thein Sein gaw hpawtni gaya hkrum na ra ai. Hpa majaw nga yang Wunpawng Mungdan Shanglawt Suya KIO/KIA hku nna tengman ai mungmasa shawng jahta na matu hpyi shawn ai raitim, Thein Sein asuya gaw gap gasat shawng jahkring na chyu tsun ai. Lachyum gaw gap gasat shawng jahkring mayu ai ladat gaw myit magaw rawng taw nga ai re lam grai dandawng nga ai. Kaja wa tengman ai myit rawng kaja wa nan jet ai simsa lam hpe ra sharawng ai rai yang mungmasa shawng jahta ai gaw jaw dik rai nga ai. Gap gasat shawng jahkring nna mungmasa bawngban ga ngu ai gaw Annau ni maga asum san san sha rai nna, Myen asuya maga gaw amyat san san sha rai nga ai. Dai re majaw KIO/KIA hku nna myen asuya hpe asan sha adingtawk tsun ra sai ngu mu mada ai. Gap gasat shawng jahkring na hku rai yang gaw bai hkrum na lam nnga sai. Mungmasa shawng jahta na hku rai yang gaw galoi mung chyinghka hpaw da chyalu re lam tsun ra na re. Mungmasa jahta let byin ai majan gaw grai sawng ai majan nmai byin ai. Gap gasat shawng jahkring nna bai byin wa ai majan gaw grau kaba sawng ai majan hkrai re. Ndai ga hpe Thein Sein asuya hkap la yang gaw gaya nhkrum na, Nhkap la yang gaw gaya hkrum na.
(2) Annau ni hpe myiprwi jahkrat tawn nna AWNG SAN SUU KYI SA LA AI KUMHPA a yubak gaw myen asuya a ntsa e dik wa na ra ai.
Daini Aung San Suu Kyi lu la ai KUMHPA gaw shanhte myen amyu ni hkraimadi shadaw nna lu ai kumhpa n re. Annau ni hte laga myu bawsang ni law law a hkrap myiprwi hte madi shadaw nna lu ai KUMHPA she re. Dai rai yang daini kumhpa la ai shaloi hpa majaw Annau ni hpe malap kau ai i? Annau ni hkrap myiprwi hte nga taw nga ai re shi nchye ai i? Annau ni hpe hkum tsun sa, laga bawsang ni a lam pyi tsep kawp ntsun shalawm mat sai. Thein Sein hpe sa shakawn ai lam sha na lu ai.Tsun mayu ai gaw anhte myu bawsang ni hpe chyeju nkam dum tim malap gaw nmai malap kau ai. NLD parti gaw Chyant hkaing Hpunt Hpyu Ye parti hte gau ngwi ngwi pawng mat wa na masa re lam dandawng pru wa sai.
(3) KIO/KIA ( Annau Ni ) gaw mungdan la
Annau ni gaw A’RAWNG mung n ra ga ai, KUMHPA mung nra ga ai.Daini Annau ni ra ai gaw Amyu hte mungdan re. Karai Kasang gaw A’RAWNG ra ai wa hpe A’RAWNG jaw na ra ai. KUMHPA ra ai wa hpe KUMHPA jaw na ra ai. Annau ni hpe MUNGDAN jaw na ra ai. Dai majaw Annau ni myit hkrum ai hte Karai Kasang kaw kyu hpyi apnawng nna jawm dawdan sa wa saga law.
Sau Nan Du
20/09/2012
6 comments:
why do we need to so rely on Suu Kyi? It is a time for write our own future.Let's try our best.
AWNG SAN KAW SHA NRE YAW...88MYEN JAWNG MA NI HPE MA SADI RA AI...THEIN SEIN NI, COMMPANY MADU NI SHING DU KAW NNA JAI LANG WA AIZAWN RAI NGA MA AI,EG ..HPAKANT GINRA HPE SHA ALAK MI DI GASAT SHAZIM NA LAM TSUN PRU WA AI HPE YU YANG..
MUNG MASA, HPYEN MASA LAM HTA SENG JANG GARA MYEN HPE MUNG TSEPKAWP NMAI KAM AI.
bumtsit...
Mungdan la ga lo... KK jaw taw sai.
AWM DAWM WUNPAWNG MUNGDAN hpe grai madi shadaw nngai law. Ndai lam hpe bai malap mali rai wa nga ga ai. Hkrak nga yang, shawng nnan shanglawt lawt hpang wa yang,hpang jahtum na yaw shada lam gaw Awm Dawm Lawt Lu Ai Wunpawng Gumrawng Gumtsa Mungdan lu na lam rai nga ai. Dai majaw rawt malan ai wuhpung mying hpe "Shanglawt" (Independence) ngu ai shalawm nna Wunpawng Mungdan Shanglawt Hpung (Kachin Independence Organization), Wunpawng Mungdan Shanglawt Hpyen Dap (Kachin Independence Army) ngu nna dai ni du hkra shamying ai rai nga ai. Ndai hpe alak mi annau ni bai n bawng la ra na re. Myi moi woi hpang ai ni a yaw shada myit shingran hpe galoi n mai malap ai. Myit kata bang da nna an nau ni bandung du hkra gasat anut sa wa ra na ga ai.
Myit su ni e a tsawm sha she myit yu ga law.. Anhte a bandung du hkra gasat na ngu ai gaw grai myit yu hpa gasi re ai yaw.Hpa majaw nga yang anhte mungdan lu na matu myen hpe gasat na nga, ya gaw dai hku masa hte gasat taw ai n re yaw.Anhte a ginjaw de annau ni a sha ra hpe, myen ni mathang she wa sha chyut taw ai kaw anhte ninghkap taw ai ninghkap majan she re ai lu yaw.Galoi ten du hkra lu dahpran da lu na ngu ai gaw anhte a karai kasang kaw anhte kade ram kam hpa nna kyu hpyi nga ai hta she karai kasang a chyeju hta hkan na sai yaw..
Nanhte ni Awng San Su Kyi hpe naw kam taw yang gaw moi na zawn bai masu sha katut hkyen ai ga re..Shang lawt lu mayu yang gaw Awng San Su Kyi hte hpa seng a ta? Mau sa..Awng San Su Kyi na lam hpa jahta taw na lam n nga ai..Jinghpaw gaw Jinghpaw, Myen gaw Myen...sha re..Nang Pang Lung agreement hpe naw asak bang mayu taw nga yang gaw Jinghpaw Wunpawng mung dan ngu ai galoi mung paw pru wa na nre sai...Lat sha si taw mu...
JB
Post a Comment