A'HKYING A'TEN HTE ANNAU NI

Nga yawng nga pra kinding n tsa, Hkrung mahkrung, Pra mapra ma hkra gaw ahkying aten a kata kaw asak ngu ai htenga ai hkrai rai nga ai. Ahkying aten hpe gang hting nut kadun la mung nmai, Gang garawt galu kau mung nmai, Gang jahkring shingdang tawn mung nmai re ai n-gun ja dik htum mung shi rai nga ai.

Shinggyim masha langai mi a sak hkrung lam hta ahkying aten hpe n chye jailang kau dat yang dai masha wa a hkrat sum lam gaw htani htana rai nga ai. Ga shadawn yi sun hkau na galaw sha ai wa hkau na htu ten hta hkau na htu ra ai, Mam hkai ten hta mam hkai ra ai, Mam dan ten hta mam dan shula ra ai. Hpa baw magam bungli hta rai tim shi a aten hte shi galaw ra ai ten hta galaw yang she akyu lu hkam sha mai nga ai.

Dai hte maren daini na Annau ni a Rawt Malan sak hkrung lam hta mung ya ndai aten hta hpa baw galaw ra ai ten re ngu ai hpe chye ra saga ai. Dawdan ra sai. Dai majaw tsaw ra ai Chyurum Wunpawng sha ni hte KIO/KIA ningbaw ningla ni e, Pang Lung ga sadi n-nga mat sai ngu nna myit kau saga, Pang Lung ga sadi hpe atsawm sha shakram kau da saga. Federal ngu ai hpe mung hkum myit mada saga. Mam dan shula na aten she rai sai. Hkau na mung htu ngut sai, mam mung hkai ngut sai, Ya gaw mam dan aten she rai sai. Tsun mayu ai gaw myen asuya ni hku nna Pang Lung Ga Sadi hpe n hkap la hkraw ai re majaw 1994 ning hta gap gasat jahkring nna jet ai federal (self determination) hpe jawm gawgap  sa wa na matu shaning 17 ning la yu saga ai. Myen asuya tsun ai gaw, Anhte gaw hpyen asuya she re mungmasha asuya byin pru wa ai shani she mungmasha asuya hte mungmasa hku jahkrup bawngban jahkrup la mu nga nna tsun ai majaw Annau ni shagri pyi madawn na daram hkam sharang lai wa yu sai. Gap gasat jahkring tawn ai aten hta hta Annau ni hpe majoi wa htim sat sharu kau ya tim hpyen asuya re ai majaw rai na re ngu chye na ya yu saga ai. Mungmasha asuya byin pru wa jang gaw mungmasa manghkang hpe mungmasa hte numdaw hte numdaw, ninggam hte ninggam hparan la lu mat wa na re ngu myit mada taw nga yang, 2011 ning jun 09 ya shani kaw nna gaw Thein Sein  woi awn ai mungmasha asuya gaw Annau ni hpe amyu shamyit masing hte nan htim ganaw gasat hpang wa sai re majaw laga law law myit ung ang nga na lam nnga sai.Awm Dawm de madaw tawk hprut daw dan ra ai aten she rai mat sai. Ndai A'HKYING A'TEN hta Annau ni lama awm dawm n dawdan kau dat yang Annau ni a hkrat sum machyi lam gaw htani htana sum machyi mat wa na re.

Gara asuya mi galai lai myen amyu ni a pale palau maw lanyet pandung gaw langai sha re. Maw lanyet ladat hpan n bung tim shanhte a yaw shada ai pandung gaw langai sha rai malu ai. Ndai ya na Thein Sein asuya a ladat gaw n ru n ra byin taw nga ai shanhte myen amyu shada shawng gahkyin gumdin la nna myanmar democracy gawgap na, Dai hpang laknak lang rawt malan taw nga ai myu bawsang ni a laknak ni hpe gau ngwi ngwi dawm kau ya lu na matu maw lanyet ladat shaw taw nga ai masing sha rai malu ai. Myen amyu re nga jang gaw, Yesu hpe lu la sai wa re nga tim SUMSING MUNGDAN KAW PYI N KAM MU NA ZAWN SHE NGA WA SAI.

Daini Annau ni tsaw htum ai Karai Kasang (Yesu) hpe lu la sai Amyu ni rai saga ai majaw, Myi hpaw sai, Na na sai, Kung kyang wa sai, Singkaw kung sai, N-gun ja sai, annau ni a lagaw hta Annau ni tsap ngang lu sai, Annau ni a mungdan hpe Annau ni makawp maga lu ai n-gun atsam nga sai, Annau ni a mungdan hpe Up hkang lu ai hpa ji byeng ya nga sai, Annau ni shada pawnba hkat lu ai shaman chye ju ni lu sai. Hpa majaw myen satan hte naw jawm pawng nga na law? Mungkan kaw nna yu tim daini Annau ni gaw mungdan asuya langai mi hte maren tinang a mungdan hpe tinang woi awn lu ai n-gun atsam nyan hpa ji nga sai ni rai ga ai.

Kun dinghku langai hta sha raitim A'HKYING A'TEN du wa, Tinang a lagaw hta tinang tsap wa lu jang gaw hting bran pru ai re. Dai majaw ndai hkying aten hta gaw Annau ni munghpawm myen mungdan kaw nna hting bran pru na matu dawdan mat wa saga.

Sau Nan Du
08/09/2012