DA HKAP

Dai ni na ten myen hte annau ni a mung masa pinra hpe masam maram dat yu yang, shata jan mai ai shagawng shana da hkap hkap chyai ai ma prat hpe grai shingran mu marit ai zawn, moi na annau ni a wanglu wanglang ahkaw ahkang hpring shimlum ai hte myitmu samsi Nu yan Wa a lahpyen hta kaba wa ai hpe grai myit shingran ai. Moi na annau ni a lamu ga dai ni shimlum lam n'nga mat ai gaw kade majaw re hpe yawng chye nga saga ai re jaw, myen galaw wa chye ai, myen galaw lai wa sai hpe tau hkrau nna dahkap hkap ai zawn annau ni mung tau hkrau mu chye nna, tau hkrau shingla shingdang malan kau lu na gaw madung re.

Myen mung madu a daru magam grin nga lu na matu, ladat tam chyalu rai nga ai zawn hpyen majan masing masa hpe mung dai hte maren lajang galaw chyalu re rai yang dai ni ten gaw myen a masu ai mung htum wa na daram rai sai, htum nan htum sai ngu tsun lu sai hte myit htum a jumju galaw nga sai hpe mung annau ni dum chye ra saga ai. N'lu sha ai shan, jit rap rap bun ngu ai hpa, gamu n'dang ai wa a matu shadai kawa ngu ai hpa byin nga. Hpang hpang ai wa chyinghka la ngu ai ladat hte ra mara byin mabyin mara yawng gaw annau ni n'tsa kaw mara kau ya lu hkra mayun shakut nga ai. Maigan ni grau madi shadaw wa hkra annau ni hpe kasu kabrawng hpung ngu ai de grau grau dip madun wa nga ai ten re.

Myen gaw shanhte myu kaba ladat ngang grin hkra bawnu htum hpaji shaw ladat tam nga chyalu re hte dai ni Thein Sein mung Than Shwe hte maren sha re. Madu a daru arawng aya grin hkra madu hte nyi nawn ai ni madu shangun lu ai ni, n'byin tim madu hte rau si na ni hpe she madu gumsan byin nga ai ten ahkyak ai bungli ni hta shatsam nga ai re. Ya dai ni Wunji ni hpe galai shatsam ai ni yawng byin ai ni ninghtawn ai ni n're, madu hte masu magaw bung ai myit rum ni re, kara hku wa nga tim annau ni a matu laklai n'na masa kaja wa galai shai wa lu na n're. Annau ni mung myen a byin chye wa na pahkam mahkyen hpe tau hkrau chye kau lu na hte, myen a shawng, hkaleng a shawng hpungla kaja n'gun ja ai masing hpe tau jahkrat kau ra ai.

Thein Sein hpe Than shwe hta grau tsang ra ai, Thein Sein gaw num daw mi, ja mung n'rai kya mung n'rai lum nai re jaw hkangkawp re ja sha mung mai galun mung mai re re majaw annau ni Thein Sein hpe galoi n'mai kam ai. Myen kata de bawngban sa na galoi n'mai myit ai, myen hpe loi kam sai kaw na gaw sum sai ngu myit la mai ai. Myen a simsa lam gaw hta hkrup ga tsun shing jawng poi hte bung ai. Raitim myen a masing masa kata lam hpe mungkan de htawng madun lu na matu gaw annau ni tengman ai lam hpe grau chye hkra shara grat re kaw galoi mung hkrum ra ai. Shaloi she myen a lam mungkan de grau htawng madun lu na re. Annau ni myen hpe kachyi mi pyi n'hkrit ai lam madun ra ai

1- Thein Sein a gumsan rung kaw n'na mara shaprai n'dau shana wa tim madu a myen myu ni hte maigan ni hpe myi man tam ai hku htawng madun ai masa sha pru ai, kaja nga yang teng simsa lam ra ai teng, mara raw ya ai rai yang grau n'na anhte bawsang ni hpe kasu kabrawng hpung ngu ai kaw na n'dau shaprai  ra ai. Bai myit san seng ai shinggyin nauna myit hte mara raw ya, mara shaprai ai teng yang mungkan de tara shang simsa lam n'dau ra ai.

2- Teng mara dat ai mara shaprai ai hte teng simsa mayu yang mungdan ting hpyen majan gasat ai hpe jahkring ra ai simsa lam n'dau ra ai. UNFC hpung yawng hpe ten mi hta sha mai bawng jahkrup ra ai. Ga garan n'na, bawngban nga ai ngu gaw myit n'san seng ai,  teng simsa lam n'ra ai lachyum re. Hpyen masa hta n'tsa kaw lu tsap hkra shakut ai lam re. Dai ni simsa lam la ai hpunau ni grai sadi ra ai ten du nga sai. N'htu n'shan n'tsa tsap ai hte bung nga ai. Annau ni tsap ai hpyen masa mung masa gaw ja dik ai masa pru nga ai.

3- Tara masing hpyendan n'na jahkrat tawn n'na mung masa bawngban sa na n'gam lami laman grai n'shapraw shi ai re jaw myen a shata jan e yup dam dam n'na galaw ai masa bawngban lam hpe n'mai myit shang sha ai. Myen a zawn zawn re masa hta dum ladum hka yawng sayang gaw annau ni grai machyi mat na re. Myen asuya a tara je yang ai lam hpe maram yu n'na annau ni a shawng lam hpe tau masing jahkrat tawn lu ai hte myen a masa hpe tau hkrau mu chye lu ai.

4- Mung Masa bawngban na hpe UN dat kasa, maigan a kasa ni man kaw tara jahkrat n'na Bawngban na n'dau ra ai.

Dai ni myen a bawnu shakri ai lam htum sai. Masu magaw ai mung htum  sai. Moi na zawn loili gap nna, jau gawng ladat hku gasat nga ai hku sha n'mai sai, shara ra kaw atsam mi amu n'gun mi alu htim shagrawt nang ra sai. Myen hpyen la yawng mayam hpyen la hte bung mat sai hte myen hpyen la ni ya ten annau ni hpe grai hkrit kajawng nga sai re, numla dan ai pyi nga ai hte hpyen n'kam gasat ai hpyen du hpyenla grai law nga sai. Myit daw myit ashun myit sadi run nga masai. Ya ten myen a simsa lam bawng ga ngu ai ga baw hpe grai ding lit yu ra ai. Annau ni hta mung masa hpyen masa amyet lu na hpe sung sung myit yu nna she bawngban sa yang kaja ai. Myen shagri brep nga masai. Annau ni kalang jam jau sai gaw naw dating ga, naw jamjau shalai kau nna lachyu pru hkra masa langai de du hkra gasat ra sai. Hpyen zai ladat hpe dai ni na hta grau galai shai ra ai. Hpakant de lung wa ai myen yawng hpe rim shagyen jep ra ai. Ya ten annau ni shara de majan byin nga ai de lung wa ai gaw myen hpyen la hte myen a kaichyan ni myen hpe madi shadaw ai ni sha re. Miwa hte Kala hpe mung grau jep ra ai hte Thai myu ni hpe mung ya hkyak hkyak sadi ra sai. Thai mung e nga ai mugun ningbaw ningla ni grai sadi ra ai. Myen a kaichyan hpe garum nga ai gaw Miwa re majaw Miwa hte hpaga pawng ai miwa hte bawk hti chye ai yawng hpe masam maram sadi ra ai.

Annau ni a mying dan hkung ai share shagan ningbaw ni grai law ai, n'dum mu na n'lu ka bang kau dat tim myit dum myit du nga ai re. Mying kaba ai annau ni a kaji kawa hpushawng hpuba ni hpe grai shagrau n'ngai. Grau nna annau ni hpe myit shimlum dik ai hte lawan shanglawt woi lu mu ga ngu myit mada kamhpa kyu hpyi ai.

Galoi mung gasat na.

Baren Numraw

4/9/2012