September 7 ya shani Slg. Thein Sein gaw shanhte lit jaw da ai amyu bawsang hkring mang salang ni hte hkrum shaga ai lam galaw lai wa nu ai. Dai hta, simsa lam lu na matu gap gasat nga ai lam ni hpe shawng jahkring kau ra ai lam, wuhpung langai hkrai hku nna sha bawngban na lam, Lutdaw (parliament) hta bawng ban nna shagrin na lam ni hpe tsun wa sai.
1) Gap gasat nga ai hpe shawng jahkring kau ra ai lam ngu ai hta, KIO/KIA hpe made nna tsun ai lam rai nga ai. KIO/KIA maga nna gaw matut nna alak mi gap hkat jahkring na lam nnga ra sai. Hpa majaw ngu yang dai hte seng nna 1994 ning hta tara shang jawm myit hkrum ngut nna sen htu da ngut nna (17) ning na hkra gap kasat ai lam hpe ngalaw lai wa sai. Ya gasat majan byin taw nga ai lam gaw myen hpyen dap kaw nna myit hkrum ga sadi ni hpe jahten kau nna shawng gasat hpang wa ai majan re majaw shanhte myen hpyen dap kaw nna htim gasat ai lam ngalaw na hte htim jung tawn da ai shanhte myen hpyen dap ni hpe hting nut ya kau ma jang gap kasat hkat na lam nnga sai majaw majan mung sim mat na chyalu re. Myit hkrum da ngut sai lam hpe shaprai kau dat bai bawng dat rai galaw ai asuya gaw gara mungdan e mung nnga ai. Sadi ndung, masu magaw pale palau re galaw nga ai gaw KIO/KIA hpe nsawn nsang yu kaji ai lam rai nga ai.
2) Wuhpung langai hkrai hku nna sha bawngban na ngu ai lam gaw jet ai munghpawm hpe gaw de mayu ai or gaw de lu na nmai byin ai. Amyu jinghpaw wunpawng ni hpe shanhte myen amyu masha ni hte maren mara re mungdan uphkang lam daru magam lam ni hpe jaw da, hpaji lam, sut masa lam, hkamja lam, makam masham, htung hkying lam ni hta tinang a amyu masha ni nan mung hpawm hkring mang shatai nna galaw lu ai upati jaw nna galaw sa wa lu na rai yang jawm myit yu hpa rai nga ai.
3) Lutdaw (parliament) hta sha amyu baw sang ni a lam (or) shing nrai jinghpaw wunpawng myu sha ni hte seng ai mung masa bawng ban daw dan galaw na ngu ai hta; mung shawa lut daw hta mi rai rai, amyu sha lutdaw hta mi rai rai amyu bawsang amat ni galoi mung nlaw nga na re majaw madi shadaw awngdang la lu wa na lam nga na kun? Amyu bawsang ni a ahkaw ahkang lam ni hte seng nna bawng ban daw dan wa ai hta gara myen pati amat ni mi rai rai, myen mung shawa ni mi rai rai madi shadaw lawm na nre hpe myit da ra nga ai. Myen mung masa pati yawng gaw amyu bawsang ni a mung masa ahkaw ahkang lam ni a ntsa policy yawng bung ai hkrai rai nga malu ai majaw paliman kaw nna tinang a amyu sha ahkaw ahkang tang shawn lagin la lu na ngu ai lam gaw byin lu na lam nloi nga ai, dai majaw laksan ahkaw ahkang hte seng ai tara ni hpe masat jaw da ra nga ai.
4) Gap gasat ai lam hkring mat jang, mungdan simsa mat sana ngu ai hta, gasat majan nnga mat jang maigan hpaga masha ni hpe amyu baw sang ni shara de shaga bang nna sut nhprang ni hte hpaga galaw sha lu wa na ngu ai mu jut hte myen mung majing shatai kau ma na ngu ai ladat hte majan galaw taw nga ai lam rai nga malu ai. Amyu baw sang ni a ahkaw ahkang lam hpe mai kaja wa hkra galaw ya ai gara myen pati asuya mung nmu lu nga ai.
5) Mungdan langai hta, mungdan a uphkang hkrang tara kanu (constitution law) gaw ahkyak kaba dik rai nga ai. Amyu bawsang ni hpe gam garan jaw ra nga ai ahkaw ahkang lam yen ni hte seng ai tara ni hpe shawng ka shagrin tawn nna sha paliman hta jawm myit hkrum shagrin ai hku galaw ra ai. Paliman kaw e amyu bawsang ni a ahkaw ahkang lam yen ni bawng ban nna myit hkrum lam lu ngut ai hpang she tara jahkrat shagrin ya na ngu ai lam gaw amyu baw sang ni ra ai ahkaw ahkang ni galoi ma lu na lam nnga ai. Hpa majaw ngu yang amyu baw sang langai gaw mungdaw langai sha lu nga nna dai hta pi myen amyu naw law nga ai, myen ni gaw mungdaw (7) madu da sai ni re majaw myen amyu amat ni grau law taw nga sai, grau law ai amat salang ni myit hkrum ai hpe sha tara shang hkap la shagrin kau wa na nrai ni? Rai yang myen ni zawn masha jahpan nlaw ai anhte myu sha ni gaw anhte ra ai ahkaw ahkang ni hpe paliman e tang shawn nna awng dang la lu na lam nga na ga ai kun?
Munghpawm a uphkang hkrang tara kanu (constitution) hpe amyu baw sang shagu kaw nna maren mara re dat kasa lata san nna bai gawde la ai sha nrai yang, Thein Sein asuya woi lang taw nga ai mungdan uphkang tara kanu (constitution) hte paliman gaw myen amyu ka-up sha taw nga ai democracy sha arai nga na re law.
M Zau Hkum
11/9/2012
5 comments:
myen jaw ai shat sha ai n re. myen naw ai myen a krai gawknu naw ai ni n re ga ai..myenmung ting kalukaba na lam hta jailang ai gumhpraw % law law htum gaw anhte Jinghpaw Wun Pawng shani hpe moi moi kaw na Grau htum Hopan da madu KRAI wa kam ai majaw jaw da ya ai LUNGSENG tawng/LUNGSENG Bum ni dut sha ai kaw na shang wa ai JA gumhpraw ni a jaw re ai. Myen gaw Jinghpaw majaw shaman chyeju lu ai ni re ai.. myen a majaw shaman chyeju lu ai WP a myu n re ai.. Myen ga hpe KIA ni n ra ai. Jinhpaw ga hpe myenni la mayu ai gaw manu grai dan ai JA LUNGSENG ni KIA/O nga ai bum lang hkaraw hkan tup naw re ai.. Myenmung ting hta tsawm dik htum ai, manu dan dik htum ai ga hpe an nau Wunpawng myusha ni lu da ai. ...MATUT NNA MADU TAI MU LO KIA/KIO NI E.. NAT NAW AI MYEN HPYEN NI HPE KAPAW TIK TIK RAI MU LO.
SPELLING CORRECTION
-------------------------------
***GRAU HTUM AI HPAN DA MADU KRAI WA***
THAN SHWE up ai myen hpyen asuya hte ya THEIN SEIN woi awn ai ASUYA gaw grai n kaja ai baw LAPU langai mi tsawp galai mat ai sha re, hpa democrasy mung n re.Dai majaw,ANHTE, hpa mau na lam n nga ai,2008,NATIONAL CONSTITUTION ngu ai gaw,MYEN HPYEN DU KABA ni hte KYAT HPUT kaw lawm ai ni a matu gaw da ai she re,ANHTE AMYU KAJI NI, hkum tsun, shanhte MYEN YAWNG a matu pyi nlawm ai. TSA BA SHAWNG LA.
myen hpyen ni dai ram tsing ri taw nga ma tim myen hpyen ni hte ndaw nhka matut arau nga na myit taw ai wp shalang ni grai naw law nga ai majaw mau nma re law
Re law WP salang ni hpe grai mau sai moi mungkam shut ya mung naw kam mayu nga ma ai...An hte WP sha ni gaw grai kum mai ai ni re.dai hpe dum let kamgring ai nkam gring ai hpe atsawm myit ga WP salang tai ai ni e.................
Post a Comment