Slideshow Image 2

RAI NA ZAWN ZAWN

Mung Hpawm ngu shamying ai myen mungdan gaw mying hpe madat yang myu sha Wuhpung law law wa myit hkrum gumdin nna gaw de da ai mungdan rai nna, grai simsa pyaw ngawn la ai mungdan rai na zawn zawn, nga ai rai tim, myu baw sang ni hkam sha nga ai gaw, Dip sha, chyup sha, roi sha,n ru n ra, n ji n mu, kashun kashe rai masha ahkaw ahkang Human right ngu ai hpe kachyi sha pyi nlu hkam sha ai mungbawm she rai nga ai.

Thein tsing atsu ya nnan bai lung wa nna, mung masa hpyen masa, sut su masu, masha nga sat nga sa  ni yawng hpe galai shai kau dat sai nga nna, mungkan she gara na daram, gumhkawng mat wa ai wa, maigan ni hta pyi grau simsa sana zawn zawn, mungkan ting na gun rai galaw ai hpaga Company ni, hpaga ga ai company ni, myen mung de htim bang wa ai gaw gahtan she adawt hkat na daram zawn zawn, raitim ndai ni gaw myen e shawu ai lam ni sha re.Mai gan ni gaw myen ni hta grau le ai. Myen masu ai hpe shaning krushi ning jan hkrum sha sai majaw, yawng chye mat sai . myen  tsun ai hpe myen ni nan n kam mat sai.

Rai yang myen a shawu ai hpe kadai kam a ta? Shawng de gap hkat rai n jahkring yu ai myu baw sang n kau mi ( Sam, Karen, Rahkai the Lao zawn re ni ) kam ma ai. Ndai hpung ni gaw lagat jahku zawn dwi la ai myen a ga hpe kaja mi rai kun? Nga myit la nna, kam ai lam rai ma ai. Ndai zawn kam ai majaw aten ladaw langai du ai shaloi manu kaba jaw ra na ma ai. Dai manu kaba gaw myit malai ngu ai sum kaba rai na re. myen a hta wara nyingchan ye nga ai gaw, KIO/KIA the galaw mayu dik ai rai tim n lu galaw ai majaw, KIA/KIO ni shanhte myen hpe bai kam wa hkra lahta de na Wuhpung ni hpe ra galaw, ra hkan nna gap hkat jahkring simsa lam la ai lam sha rai nga ai. Karen ni the masum lang ngu na bawng ban hpawng kaw hpa mahtai mung n lu ai hpe yu yang , gap hkat gan jahkring nna, myen ni shara gaja hpe yawng madu la kau na masing sha rai ma ai. Sam ni the bawng ban hpawng hpe mung n htoi masat ngut ai hpang she rai n hpawng byin ai lam chye lu ai. Ya gau ngwi Karen the sam ni myen a simsa lam gaw tengman ai lam n re ngu ai hpe mu wa nga ma ai. Kaga Wuhpung ni mung myen masu ai chye ai the bai n htang na ni hkrai re. Myen gaw mungkan de simsa lam galaw nga ga ai ngu ai hpe madun nna naw ngam ai section ni hpe hpaw la lu daw the,KIO gaw simsa lam nra ai ni rai ma ai ngu ai hpe mungkan de madun na matu san san sha re.

Raitim Karai Kasang a chyeju majaw mungkan gaw myen ni tsun ai hpe n kam , Wunpawng sha ni tsun ai hpe she madat nga ma ai. Thein tsing lung wa ai hpang KIO/KIA hpe n gasat na matu matsun sai nga ai majaw, Gum san Thein Tsing gaw Wunpawng sha ni a n tsa gaja wa kanu kawa myit rawng ai zawn zawn, Jinghpaw mung gaw mi na hta pyi grau pyaw sana zawn zawn, kabu shut kau ai ni mung law law, kaja wa KIA the majan shazim mayu yang, “Shanglawt hpe shi ya ram the shamyit kau lu ai” nga Indonisaia mungdan zahpawng kaw hpa majw tsun ai i? Npawt hpe gawn u yang KIA hpe htu nga ai kaw na jahkring mu ngu ai gaw, mung masha na pyaw daw, mungkan de shawu na matu sha rai nna, Indonisia kaw tsun ai gaw, myit masin kata kaw rawng ai hpe tsun ai lam rai nga ai. Ndai hpe yu yang myen gaw myen sha re. Hkum kam shut dam.

Mung masa myit myit ai myen gaw , mungdan kata na myen mung, shinggan na myen mung maren, BBC,VOA, RFA, DVB media ni yawng mung moi she asung arung nga tsun jaw hkat tim, ya KIA IDP ni a lam Jinghpaw ni a lam tsun jang gaw grai sharam nna sha tsun ma ai. Myen hpyen la ni a lam mung mara nau nnga ai hku ,KIA the myen hpyen la ni gaw masha ahkaw ahkang tawt lai ai the hpyen yen tsin yam hpe makawp maga ai kaw mung nau n shai ai hku,sha tsun ya ai. Myen a mara hpa na hku grai tsun ai.Myen the shanglawt maren sha rai yang hpa majaw shanglawt uphkang kata de machyu ai hpyen yen ni grau law ma ta? San na lam nga ai. Thein tsing atsu ya gaw masha ahkaw ahkang hpe grai shadik shatup na zawn zawn nga nna, Human Right Cetre ni hpaw,Human Right hpung ni hpaw rai UNHRC ni pyi myen mung de n yu ra sana zawn zawn rai.mungkan de galaw madun tim, dai HRC hpung kaw woi awng ai ni gaw myen sha re majaw, myen myit sha myit ai. HRC ningbaw U sik Myai ngu ai hpung ni Jinghpaw mung de sa nna Idp dap kru hpe sa yu san jep nna, KIA the myen ni masha a hkaw ahkang tawt lai ai repot hpe tang shawn ai shaloi, “myen hpyen la ni mung masha hpe n tsen n rup nna rim jep ai lam ni hta, mala la zingri zingrat galaw nna san jep ai lam nnga ai. Galaw gin ai san ging jep ging ai daram sha galaw ai she re” nga tsun wa ai.

Dai rai yang salang Lahtaw Brang Shawng hpe rim zingri ai, hkum ting Kan ting ningma hkrai rai hkra re gaw, galaw gin nna galaw ai daram sha rai i? Eya lawk kaw na Salang Tang Gun gaw n ta mung hkru mat, nta masha n kau mung si mat, shi hpe mung rim adup zingri nna htawng rim bang ai, Salang jan Roi Ji hpe shingyim jawm roi rip la nna ndat dat ai dai ni si ai hkrung ai n chye ai mat taw nga ai mabyin gaw galaw ging nna galaw ai ni re i? U Sik Myai woi awn ai HRC hpung ngu ai gaw anhte Wunpawng sha ni a matu akyu lawm ai i?Myen gaw myen sha re Wunpawng sha ni e.

2011 ning hta lutdaw hpang masai. Wunpawng sha ni kaw na mung n madi shadaw tim yawng a gawng malai hku nrai tim, tinang  hkum tinang gaw “ngai gaw shawa masha lata tawn ai lut daw dat kasa rai nngai nga n-gup namchyim the ya sha tsun, ya sha tsun re ni, myu sha lam hpe gaja wa galaw sana zawn zawn, dip da hkrum nga ai myu sha ni hpe dai ni jang hpawt ni jang lu shapraw dat na zawn zawn, rai tim thein tsing alun dat ai the, “lut daw tara munu ni kaw nna lutdaw kasa ni gaw pyi htawng tsu madang n re” ngu masat dat masai. Lachyum gaw mungdan up hkang nga ai Gun san magam  the atsu ya Wungyi hpung hpe lut daw kaw na nmai jum tek ai,Order nmai jahkrat ai ngu ai hku rai malu ai.dai majaw lutdaw gaw mung masha ni lata dat ai wuhpung re majaw, mungdan a tsaw dik ai wu hpung re ngu ai ten hta pyi, myu sha ni a matu hpa mung rai n lu galaw ai wa, ya pyi htawng tsu madang n re nga jang gaw, aten du jang lu ging ai shata shabrai htuk sha nna zim sha nga  mat sana lam sha rai mat sai.

Rai tim Karai Kasang gaw Wunpawng sha ni kaw lawm nga ai re. Anhte n hkaw n tai tim mungkan gaw anhte myu sha ni maga myi man yawng wa ai. Dai zawn anhte maga myit lawm wa ai hpe jahten kau mayu ai majaw, Rehkai the banggali ni a lapran e myen atsu ya sumprat bang dat ai rai nga ai.Nnan e gaw ndai daram manghkang kaba wa na n shadu ai. Rai tim ya gaw je la she laja, magra yang mung ju, ma-um da ngu yang mung n lu rai yak nga masai. Myen mung na hpyen la nga manga KIA hpe lung gasat shangun nga ai majaw, Rehkai manghkang de hpyen la law law sa nna makawp maga la ra ai rai tim hpyen la manga shi daram sha lu shagnun dat ai. Dai majaw, je la n lu ai sha, masha asak, U wa yam nga, dum nta ja gumhpraw sut gan law law hpe n lu makawp maga la ai sha sum mat sai. Hpyen la ni shanhte hkum lawt hkra pyi tsing tsi she hprawng lawt ai hku re. kaja nga yang Rehkai ni hpe mung anhte hpe zawn moi kaw na amyu shamyit mayu ai. Bangali ni hpe mung mung dan kata nnga shangun mayu ai. Rai tim bangala na bangali ni shang wa ai shaloi, marai 99% gaw mayun kumhpa jaw nna shang wa ai ni re majaw, shanhte hpe shachyut jang bai n htang kawa na ni re majaw, nmai shachyut nna nga nga ai ni re. dai majaw Rehkai the bangali ni lahkawng maga sat hkat nna htum mat mu ga ngu ai maw lanyet re. Mungkan na jep sagawn ai ni gaw atsu ya hpe mara shagun nga masai.Arap mungdan hpung ni jep sagawn ai lam hpe sa galaw na nga ai hpe myen atsu ya nhkap la ai sha, shanhte nan rehkai hpe tara ai hku san jep na re nga san jep hpung hpaw da masai. Rai tim myen gaw myen sha re.N shai na re.

Rai yang Wunpawng sha ni gaw ndai daram anhte hpe galoi mung akyu n jaw ai myen the matut nna gara hku naw rau nga lu na i?Maga mi sha tsaw ai sum tsaw gaw yawn myi prwi the hpung dim ra na re majaw, asan sha nga mat na she myit shajin saga. Mungkan na yu tsawm daw bawng ban ra ai rai yang mung bawng lawm ga rai tim anhte a ra sharawng ai lam hpe gaw ja ja kawa lamyi n htawt rai ga. Myen gaw hpyen n gun the ka-up nna adip arip rai bawng ban mayu ai. Myu tsaw share shagan ni, ginjaw salang ni e n dai hpe kachyi mi pyi hkum hkrit. Anhte the Karai Kasang rau rai nga ai. Mung shawa yawng nanhte hpe madi shadaw nga ai. Myit mada nga ai. Myen hpe galoi n sum sai . hpang de mung sum sana n re. Shanhte garan sha nra, kawa hkat nga masai kade nna yang shanhte kata kaw kapaw sana ra ai. Dai gaw Uru seng maw ga kaw na wan yam dum kapaw ai hta tham kying hku kaba ai rain a re.August 29 ya shani wanyam dum kapaw ai gaw Karai anhte the rau rai nga ai ngu ai hpe sak se hkam nga ai.Anhte hpe mau hpa n-gun the garum la na Karai re. Ndai lam gaw karai Kasang jaw na kaw na kachyi mi sha naw re. Wunpawng mungdan nan Wunpawng sha ni hpe ap ya na re hpe kam sham let chyurum sha ni a hkrun lam yup tung n-ga sai. N htoi de naw matut da ting rawt sa ga.

Wunpawng sha ni a asai hkyep
Agu Namti

6 comments:

jasham yawhtung said...

re grai jaw ai re myen shiga hkan galoi tim na pyaw daw hkan ga law ma ai nmai kam ai.an the mung an hte a sha ga dap ni hpe ten yu na shan hte tsun ai njaw jang ai pai kan tsun ra ai.an hte shiga ni gaw grai lanyin ai law.facebook hkan myen ni hpe n add ga.myen ni nchye hkra an hte ma lam langai hku dan mat wa ga.

sammung ramma said...

grai jaw ai.

Anonymous said...

grai jaw ai k k s sha man ya u ga..

Tokyo shi yi said...

Umm!!Teng ai lam ni chyu rai nga ia. Ya ten hta Mung kan mung , Barack Obama mung, UN mung, UNHCR mung, Daw Ag san Su Kyi mung ndai ntara ai majan hpe kadai mung nlu hkye ai.... Seria mung dan hte bung taw sai.Ya ten hta An hte Jhp WP myu sha ni hpe lu hkye la na gaw hta ni hta na Hpung shin kang hte ding grin anga nga ai Karai Kasang sha re hpe yawng myit dum let ma tut n`na Akyu hpyi let up nanwg ga!!!

Anonymous said...

Nhtoi maga rai sai. naw shaja da ga. myen gaw myen sha re teng dik ai. Sai ga shaga ai ngu ai rai nga ai.Dai U sik Myai ngu ai HCR ningbaw wa n tara ai hku masu tsun ai dai n gup hpe naw shatup dat ya mu.Munghpawm teng yang gaw, atsu ya wungyi kaw jinghpaw n lawm ai i?.Hpyen dap hpyen du up hkan gara jinghpaw lawm ai i? Atsu ya hta na kaw Jinghpaw gade daram nga ai i? Anhte hpe grai shagrit da ai ni rai ma ai hpe galoi hkum malap.
Lungbra

Myu Sha Dan said...

ံHpaji hparat grai lu shaw la ai ga ngau she rai nga ai .Grai jaw ai Myen gaw Myen sha re ,WP mung WP sha re ,Myen wa mung shi gwi sat lawat hte maw lanyet nga na sha re ,WP mung chyoi pra ai sat lawat hte ning hkap nga ding yang re.Jahtum na mahtai gaw ga lahtum nshut WP myu sha ni KK a marang e awngdang ai hte lawt lu na re ngu tsep kawp kam nga nngai .

Post a Comment