Simsa lam ngu ai hpe n ra sharawng ai masha nnga ai. Yawng ra sharawng ai re. Annau ni hpe zingri zingrat shamyit taw nga ai myen asuya ni pyi simsa lam hpe ra sharawng yang, Zingr izingrat shamyit hkrum sha nga ai Annau ni gaw shanhte hta pyi grau ra sharawng taw nga ga ai re. Lahkawng maga na ni yawng gaw simsa lam hpe ra sharawng taw nga ai rai tim hpa majaw ngang grin na simsa lam de nmai sa hkraw ai kun? Ndai hpe shawng jawm myit yu nna tawk hprut daw dan ra ai ten rai sai ngu nna mu mada ai.
Simsa lam ngu ai hta..
(1) Tara ai hku maren mara ahkaw ahkang hte simsa ai simsa lam.
(2) N tara ai re hpe chye nga ninglen baw gum zim taw nga ai simsa lam.
Daini Wunpawng Mungdan Shanglawt Asuya KIO/KIA hte myen asuya a lapran hta ngang grin na simsa lam de nmai sa hkraw ai gaw, shanhte myen amyu ni ra sharawng ai simsa lam hte Annau ni ra sharawng ai simsa lam nmai bung pre hkraw ai majaw re.
Annau ni ra sharawng ai simsa lam gaw, Tara aihku maren mara ahkaw ahkang hte simsa ai simsa lam hpe she ra sharawng ai.
Myen asuya ni byin mayu ra sharawng taw nga ai simsa lam gaw, N tara ai re hpe chye nga ninglen baw gum zim taw nga shangun mayu ai.
N dai daram ting shai hkat ai manghkang a majaw daini Annau ni hkrap myiprwi hte ninghkap taw nga ra ai re. Shai hka tai lam ni hpe matut nna bai yu ga nga yang..
(1)Annau ni gaw Panglung ga sadi hte maren, Maren mara ahkaw ahkang hte jet ai Federal Munghpawm mungdan hpe jawm gawgap na ra sharawng ai.
-Myen asuya ni gaw Panglung ga sadi hpe jahten kau nna, Munghpawm mungdan hpe Shanhte myen amyu ni hkrai up sha na matu Munghkyawm mungdan gaw gap na hpe ra sharawng ai.
(2)Annau ni gaw gap gasat jahkring nna tengman ai mung masa mahtai hpe lu la na matu,
Myi man hkrum mung masa bawngban mayu ai.
-Myen asuya ni gaw gap gasat jahkring tawn lu jang lamu ga maden zinghka la mayuai. N-gasat ra ai ladat hte aloi sha lamu ga zing la mayu ai.
(3)Annau ni gaw sinat mahku zim ai ten hpe, byin wa ai mung masa manghkang a kata lam, ntsa lam mahkra ahkrai shapraw nna hparan la mat wa mayu ai.
-Myen asuya ni gaw sinat mahku zim mat jang mungdan simsa sai nga nna mungkan a man e nteng nman ai masu ga hte mying kaja la mayu ai.
(4)Annau ni gaw shanhte tsun ai ga hpe manu shadan ya ai.
-Myen asuya ni gaw Annau ni tsun ai ga hpe gwi kyi langai mi wau taw nga ai daram pyi manu n shadan ya ai.
(5)Annau ni gaw 94 shaning hta shanhte myen asuya ni jaw ai ga sadi hte maren mung masha Asuya byin pru wa ai shani she mung masa bawngban la mu nga ai majaw dik hkra hkam sharang lai wa yu sai.
-Thein Sein woi awn ai myen asuya gaw mung masha asuya rai ga ai law nga nna, 09-06-2011 ya shani hta Annau ni hpe amyu shamyit majan hpang dat sai.
(6)Annau ni gaw grai kam loi, grai kam lawan ai amyu ni re.
-Myen amyu ni gaw masu hkalem ai lam hta grai kung kyang ai ni re.
Sinpraw, sinna, Dingdung, dingda, jut 4 hku nna yu dinglik yu tim myen asuya a kata kaw nna tsep kawp asan sha pru ra sai. Karai Kasang a hpung shingkang arawng sadang hpe shadan jahkung lu ai Kachin mungdan hpe she gaw gap saga ngu nna, tsawra ai Chyurum Wunpawng sha ni yawng hte KIO/KIA ningbaw ningla, Du salang kaji kaba mahkra hpang de tang shawn dat nngai law. Yehowa Karai Kasang gaw Annau ni a Awmdawm pandung shadaw de du hkra makawp maga ya na re.
AWMDAWM DE MADAW TAWK HPRUT DAWDAN RA SAI.
Sau Nan Du
03/09/2012
6 comments:
grai jaw ai,myen ni gaw Gaw ngu mungdan byin tai kau na hte daini gaga mungdan kaw myen mung na amu gun nga ai embassy hkan na masha ni yawng myen Gaw Ngu naw ai ni sha shara lu ai.Jinghpaw ni yawng myit hkrum nna galaw sa wa yang Karai Kasang madat ya na re ngu kyu hpyi nga let.
Ya kaw na gaw yawng jinggrim di tawn nna kio kia a nseng sha madat nga saga yaw wp myusha ni yawng e...Kachinland Kachinland Kachinland........
dai hku rai ra ai.anau ni n.lu ai sut hpe me lu ai ,nga ai ngu tsun hkawm ai n.re.lu da chyalu re hpe gaw,anhte mai gan du myu sha hkum ngau sha gu tsun ging sai.myit tin ai ladat gaw n.re.dai ni an hte yawng myit gayin wa n.na kk kaw ga baw langai hte sha dingyawm hpyi jahtau nga ra sai. mai gan ni man kaw grau gwi gwi tsun ga.
Sau Nan Du a ningmu hpe grai madi shadaw ai. Ramma ni hte jahta yu yang awmdawm shanglawt she nga yang ya jang shanglawt hpyen la wa la na re nga ai ramma ni law nga ai. KIA/KIO kata Ningbaw ni hte prat ram hpyen la ni a lapran hta pyi gaw hkam la ai lam, galaw sa wa ai lam ni shai hkat nga ai. Prat ram hpyen la ni gaw awmdawm shanglawt nga nna jaji majan gasat nga, Ningbaw daw ni gaw munghpawm nga nna mung jahta rai nga ma ai. Mungchying mung masha ni gaw awmdawm mi nga nga munghpawm mi nga nga jamjau ai lam, zingri hkrum ai lam gaw maren sha rai nga ai. Hpa majaw nga yang Myen gaw anhte ni hpe myu shamyit masting hku sat sharu taw nga ai majaw re. Dai majaw hpa rai na KIA/KIO ning baw ni awmdawm shanglawt ngu n gwi tsun taw nga ai kun? Shanglawt hpyi na ten du sai, munghpawm ngu ai n ngai sai, Awng San wa hpe lup ai kaw lup makoi bang kau ma sai, n nga sai hkum hpyi nga manu. Dai majaw Awmdawm shanglawt hpyi na hpe a ja a wa madi shadaw nngai.
N kau Du salang ni hte malawm ni simsa lam Lu mayu n na galaw taw ai ni gaw,sung sung nau n Myit yu na masa nga ai.Madu jajum hpraw tam sha loi na matu madung da n na simsa lam Lu mayu ai ni mung grai jawng nga ma ai.N kau Du salang ni mung nang de Kap,le de Kap "Lapran masha"!
Mung shawa ni kawn Shanglawt Asuya hpe Pressure jaw ra sai ten bai du wa sai law.... Mung shawa ni madi shadaw ai majaw ngang grin nga ai shanglawt asuya re majaw mung shawa masha ni a n-sen hpe mung madat ra chyalu re....dai n-rai yang Myen asuya hte hpa n-shai ai. second Myen asuya tai mayu nga ai ningbaw ni hpe grau hpaji jaw la, shadum jahprang la ra sai.
Post a Comment