Hpyen masa a majaw Sadung e sadi maja let hkawm sa ra

Ya ten, Myen hpyen asuya dap hte Wunpawng Mungdan Shanglawt Hpyendap (KIA) ni, Jinghpaw Mungdaw e shara la, hpyendap shagreng, hpyen shaman jawng nga ai majaw, dai ginra na buga masha ni a hkawm sa hkawm wa lam hta sadi maja ra wa sai lam, chye lu ai. Lai wa sai bat masum ya, July praw 1 ya shani e, Waimaw ginwang Sadung e, n bung hkat ai Myen hpyendap shada da, agyi langai hpe hpyenla wa gap sat kau nna hprawng mat wa ai mabyin byin ai majaw, ya ten, grau nna, sadi maja let, hkawm sa ra nga ai re lam, Sadung buga masha ni kawn tsun dan wa ai. Bai nna, ya ten, Sadung mare e hkau na hte hkai sun galaw hpaji ni hpe sharin ya nga ai, World Vision Myanmar (WVM) magam gun masha ni mung, sadi maja let hkawm sa hkawm wa hte amu galaw ra nga ai lam, magam gun masha langai tsun dan wa ai. Sadung e, laika hpaji hte kanbau bungli ni hta hkrat sum nga ai buga masha ni a matu, WVM hpung gaw, lai wa sai shaning kawn, lam galaw ya ai lam ni, jawng n lu lung ai ma ni hpe ja gumhpraw garum jaw ai lam hte, lawu tsang jawngma ni hpe n-gu lusha jaw nna, hkauna galaw hpaji mung garan gachyang ya ai majaw, dik shale yak hkak ai lam gaw, n nga wa sai lam sagawn chye lu ai. Hpa mi rai rai, buga masha ni gaw, ya ten hta mungdan kata, hpa byin nga ai hpe hkrak n chye ai raitim, hpyenla ni sinat hte hkawm sa hkawm wa law wa ai hpe mu nna, mungmasa shuk wa ai maram yu nna, shanhte a kanbau bungli ni hta sadi maja let, hkawm sa nga ma ai re lam, buga masha ni matut tsun wa ai. KNG