Jinghpaw mungdaw de Myen hpyen hte laknak n-gun ni jat bang nga

Myen gumshem hpyen asuya gaw, Jinghpaw Mungdaw de tinang hpyen n-gun hte sinat laknak machyu pala bawm yam ngun ni, mayun jat bang nga dingyang re lam, chye lu ai. Mungdaw mare daju Myitkyina de wanleng lam hku nna, Myen hpyendap a matu sinat laknak kaji kaba ni ndai laman dingyang htaw bang nga ai re lam, Myitkyina wanleng daru amu galaw masha ni kawn chye lu ai. Bai nna, ya ten, Myitkyina e shiga mawng pru nga ai lam gaw, Myen hpyen asuya gaw, tinang Myen amyusha dum nta nkau ni hkan e mung sinat laknak ni lagyim bang da ya nga ai re lam, buga masha ni tsun nga ai re. Ya Myitkyina de htaw bang nga ai sinat laknak ni gaw Mandalay maga hku du wa ai rai nna, ndai ten, Myen hpyenla ni htaw tawn ai hpyen mawdaw ni mung Myitkyina de lana mi 4, 5 shang bang nga ai lam, myi-chyaw-mu buga masha ni KNG de tsun dan wa ai. Ya ten, ndai Myen hpyen ni law malawng hpe Jinghpaw mungdaw, Waimaw ginwang e shara jahkrat, shalaw tawn ai lam, Waimaw buga masha ni hpe lakap let chye lu ai. Ndai zawn Myen hpyen ni Jinghpaw mungdaw kata hpyen masa shajin wa ai lam gaw, lama Wunpawng Mungdan Shanglawt Hpyendap (KIA) hte bai gap hkat ra wa yang, jin jin htim gasat lu na yaw shada ai re lam, Myen hpyendap shiga lawk kawn chye lu ai. Maga mi de, KIA hpyendap ni gaw zim nga ai hpe mu lu tim, Myen hpyen ni htim shang wa yang, dai hpe ninghkap gasat na matu gaw jin jin (standby) masa galaw tawn ai lam, KIA daju Laiza shiga lawk kawn chye lu ai. Raitim, ya ten, KIA a mungmasa hpung rai nga ai KIO gaw "Jinghpaw Mungdaw madu uphkang ahkaw ahkang ra sharawng ai lam hte tinang KIA dap hpe Jinghpaw Giwang Makawp Maga Dap (Kachin Regional Guard Force, KRGF)" hku hkrang galai mayu ai lam hpe, Naypyitaw Myen hpyen asuya daju de tang madun tawn sai mung re lam, KIO salang ni kawn chye lu ai. Bai nna, ndai KIO a ra sharawng ai lamyan 2 hpe sha, Naypyitaw na hpyen asuya ningbaw ni de asan sha tsun dan lu na matu, ya ten, Rev. Dr. Lahtaw Saboi Jum hte kanau Hkun Myat yan woi awn ai, mungmasha simsa lam tam lapran salang ni mung shakut nga ai lam, Myitkyina shiga lawk kawn chye lu ai. Lai wa sai April shata kawn, Myen gaw KIA dap hpe 'Jarit Sin Hpyendap (Border Guard Force, BGF) hku gale na matu, tara shang shiga shana tawn sai re.