KIO Dap Ba Mali Up hpe Marai-Sanit-Datkasa-Hpung de jat bang

Wunpawng Mungdan Shanglawt Hpung (KIO) gaw lai wa sai May shata hta hpaw shabawn tawn sai, laksan Marai-Sanit-Datkasa-Hpung hta, Lahta Sam Mung e daju ai, KIO a Dingda Ginwang Ginjaw a Tingnyang-up Col. Lahpai Zau Raw hpe jat bang sai re.

Laiza Mungshawa Zuphpawng, May 18, 2009.

KIO kata tinang KIA a Dap Ba Mali (4th brigade) a Dap Up (Brigade Commander, B.C) mung rai nga ai, Col. Lahpai Zau Raw hpe Ginjaw Komiti kawn lai wa sai June 27 ya shani tara shang jat bang ai re lam, KIO shiga lawk kawn chye lu ai.

Shawng de Mari-Sanit-Datkasa-Hpung e shanglawm ai ni gaw, Tingnyang-up malai 1 Lt-Gen Gauri Zau Seng, Brig-Gen. Dr. Lahkyen La Ja, Brig-Gen. Sumlut Gun Maw, Lt-Col. Lahpai La, Lt-Col. Lazing Ji Nawng, Sara Kaba Kumhtat Hting Nan hte Maj. Gawlu La Awng ni rai nga ai.

Ndai datkasa hpung hpe Lt-Gen Gauri Zau Seng woi awn ai rai nna, madung magam lit gaw tinang KIA dap hkrang galai na lam n'tsa, tinang dapshawa mungshawa ni a gawng malai tai let Myen hpyen asuya hte jahkrup jahkrum bawngban sa wa na matu re lam, KIO salang ni kawn chye lu ai.

Lahta Sam mung, KIA Dap Ba 4 makau, Kawng Hka e daju ai, Dukaba Mahtu Naw woi awn ai Kachin Defense Army (KDA) hpe Myen npu na "N-gawn Hpyen (Pyi Tu Sit) langai hku gale kau ai kade n na yang, KIO gaw ndai zawn Dukaba Lahpai Zau Raw hpe datkasa hpung de jat dat ai lam mung re.

Lai wa sai June 21 ya shani hta, KIO gaw tinang hpyendap KIA hpe "Jarit Sin Hpyendap" a malai "Mungdaw Makawp Maga Dap" hku mahtang nga mayu ai lam hpe Myen hpyen asuya de tang madun tawn sai, rai nga ai.

KNG