Rasha gaw Jinghpaw mungdaw na Uranium ni 2007 kawn shaw la nga

Rasha (Russia) mung na nhprang company gaw, Jinghpaw mungdaw, Hkakan na Ngarai Bawm (nuclear bomb) ai kaw n lang n mai nhprang rai, Uranium hpe laiwa sai 2007 ning kawn htu la ngai ai lam, chye lu ai. Myen hpyen asuya a shimlam jahtat tawn ai npu, Rasha, Victorious Glory International Private Ltd. gaw, Uranium hpe Hpakan Uru Sengmaw ga, Tarmakhan hte Hongpa, Katai Taung makau hkan na htu shaw la nga ai re lam, myi-chyaw-mu buga masha ni tsun ai. Bai nna, Uranium nhprang htu shaw nga ai shara ni hpe chyip chyip rai nhpan kum tawn ai rai nna, bum kata de prat dep nhprang htu rai ni lang nna Uranium nhprang htu shaw la nga ai re lam, chye lu ai. Ndai zawn htu shaw la lu ai Uranium nhprang rai ni hpe, bilat ga buk hte bung ai, buk ni hta bang nna, mawdaw gaba ni hte Hopin Wanleng daru de htaw lahka tawn nhtawm, dai kawn Yangon sanghpaw daru de wanleng hte htaw la nga ai lam, myi-chyaw-sakse ni kawn chye lu ai. Yangon sanghpaw daru e du ai Uranium nhprang rai katsing ni hpe gaw Rasha de hka lam hku lahka la nga ai re lam, Hpakan shiga lawk kawn chye lu ai. Laiwa sai 2007 ning February 15 ya hta, ndai Rasha company hte Myen hpyen asuya gaw, Jinghpaw mungdaw na Hpakan hte Sagaing ginwang na Homalin lapran, Uru Hka dingyang e ja hte shi hte lakap ai nhprang rai ni tam na matu hku nna sha, myit hkrum ta masat galaw da ai gaw re. Raitim, Russia company gaw Myen hte myit hkrum lam n la shi ai laning mi jau nna, Tarmakhan, Hongpa e Uranium nhprang rai tam nga sai re lam, Hpakan buga masha ni kawn chye lu ai. Ya ten Hpakan e du nga ai Rasha company masha ma hka a pru-shang hte hkawm sa hkawm wa shimlam ma hkra hpe Myen hpyen asuya kaw na lit la ya ai lam, KNG kawn sagawn chye lu ai. Myen gaw mayun Ngarai bawm galaw masing nga ai rai nna, dai hpe galaw wa ai hku nna, mungdan a dingdung daw, Yangon kawn Kilometer 600 daram tsan ai, Naung Laing e bum kata de dawlawng hku (tunnel) galaw nga sai lam, maigan de hprawng le mat ai Myen hpyendap hpyen hprawng 2 a n-gup kawn chye lu ai. Ndai Myen a Ngarai bawm galaw masing hpe, dingdung Korea hte Rasha asuya yan shingdu e garum jaw nga ai re lam, Dingda Korea shiga lawk kawn chye lu ai.