ကချင်ရေကာတာ စီမံကိန်း ရပ်တန့်ပေးရန် တောင်းဆို

အေးလဲ့

ကချင်ပြည်နယ် ဧရာဝတီ မြစ်ဖျားရှိ ရေကာတာ ဆောက်လုပ်ရေး စီမံကိန်းကို ရပ်တန့်ရန် ကချင် လူမှုရေး အဖွဲ့ တခုက တရုတ်နိုင်ငံ စွမ်းအင်ရင်းနှီးမြှုပ်နှံမှု ကော်ပိုရေးရှင်း (CPI) ကို ယမန်နေ့က တောင်းဆိုလိုက်သည်။

စီမံကိန်းသည် ကချင်ဒေသအတွက် ဆိုးကျိုး များစွာ ဖြစ်ပေါ်စေကြောင်း အစီရင်ခံစာတစောင် ရေးသားပြီး စီမံကိန်း ရပ်တန့်ရန် CPI ကော်ပိုရေးရှင်းကို တောင်းဆိုလိုက်ခြင်း ဖြစ်သည်ဟု ကချင် လူမှု ဖွံ့ဖြိုးရေး ကွန်ယက်အဖွဲ့ (KDNG) က ပြောသည်။ အစီရင်ခံစာကို “ရေဖုံးလွှမ်းမှုကို ခုခံ တွန်းလှန်ခြင်း” ဟု အမည်ပေးထားသည်။

“အဓိက ရင်းနှီးမြှုပ်နှံတဲ့ CPI ကို ဒေသခံတွေ ဘယ်လိုမျိုး ဆုံးရှုံး နစ်နာမှုတွေ ဖြစ်တယ်၊ CPI အနေနဲ့ စစ်အစိုးရ အုပ်ချုပ်နေတဲ့ မြန်မာနိုင်ငံမှာ ရင်းနှီး မြှုပ်နှံမှုတွေကို ရပ်တန့်ပေးဖို့ ကျမတို့က တောင်းဆိုထားတာပါ” ဟု KDNG မှ ပြောရေးဆိုခွင့် ရှိသူ အာနန်က ရှင်းပြသည်။

မေခမြစ်နှင့် မလိခမြစ် ပေါင်းဆုံ စီးဆင်းရာ ဧရာဝတီမြစ်ဖျားပိုင်း ရေကာတာ စီမံကိန်းကြောင့် ဒေသခံ ၁၅၀၀၀ ခန့် နေထိုင်သော ရွာပေါင်း ၆၀ ကို အတင်းအကျပ် ပြောင်းရွှေ့မည့် အခြေအနေ ဖြစ်ပေါ်နေကြောင်း ယမန်နေ့က ထုတ်ဝေသည့် KDNG ၏ “ရေဖုံးလွှမ်းမှုကို ခုခံ တွန်းလှန်ခြင်း” အမည်ရ အစီရင်ခံစာတွင် ဖော်ပြထားသည်။

ဤအတောအတွင်း အာဏာပိုင်များ နှင့် စီမံကိန်းတွင် ပါဝင်နေသည့် အေးရှားဝေါ ကုမ္ပဏီက ဒေသခံများကို နစ်နာကြေး ပေးမည်ဟု ကြေညာထားသည်။ စီမံကိန်း စတင်နေပြီ ဖြစ်သော်လည်း မည်သည့် နေ့ရက်တွင် နစ်နာကြေး ပေးမည်၊ မည်သည့် နေရာသို့ ရွှေ့ပြောင်းရမည်ဟု ကြေညာခြင်း မရှိပေ။

ဒေသခံ ရွာသူရွာသားများ၏ မြေဧရိယာ အကျယ်အဝန်းနှင့် ပိုင်ဆိုင်မှု ပစ္စည်း တန်ဖိုးများ တွက်ချက်ခြင်း ၊ တိုင်းတာခြင်း၊ ပိုင်ဆိုင်ကြောင်း လက်မှတ် အတင်းအကျပ် ထိုးခိုင်းခြင်းတို့ကို ပြုလုပ်နေကြောင်း သိရသည်။

မြေ တိုင်းတာခြင်းကို စတင် လုပ်ဆောင်နေသည့် ရွာများမှာ တန်ဖဲ၊ ကျိန်ခရန်၊ အင်ဂျစ်၊ အင်ဆွန်၊ လဖ၊ လရန်၊ နောင်ခြိမ်း၊ အင်ဂန် တို့ ဖြစ်သည်ဟု ဆိုသည်။

“အိမ်တွေ လိုက်တိုင်းတယ်၊ လျော်ကြေးပေးမယ် ဆိုပေမယ့်လည်း တချို့ဆိုရင် ဘိုးဘွားပိုင် အိမ်တွေ ပိုင်ဆိုင်မှု စာရွက်စာတန်းတွေ မရှိရင် မရဘူး၊ တချို့နေရာမှာ ဆိုရင်လည်း အိမ်တန်ဖိုးပဲ ပေးမယ်၊ မြေတန်ဖိုး မပေးဘူး” ဟု လည်း အာနန်က ပြောသည်။

ဒေသခံ တဦးက “ရွာသားတွေကို ကျိန်ခရန်ချောင်း ဘေးနားမှာ နေရာ ချထားပေးတယ် ကျိန်ခရန်ချောင်းရဲ့ တဖက်ကမ်းမှာ၊ လောပန်း ဦးယွပ်ဇော်ခေါင်ရဲ့ ခြံတောင် တ၀က် ပါသွားတယ်” ဟု ပြောသည်။

၂၀၀၇ခုနှစ် မေလက မြန်မာ့အလင်းသတင်းစာတွင် မြစ်ဆုံ ရေကာတာ စီမံကိန်း ပြီးစီးပါ က လျှပ်စစ် ဓာတ်အား ၃၆၀၀ မဂ္ဂါဝပ် ထုတ်လုပ်ပေးနိုင်မည်ဖြစ်သော ရေအားလျှပ်စစ် စီမံကိန်း အကောင် အထည် ဖော်နိုင်မည်ဖြစ်ကြောင်း၊ မဂ္ဂါဝပ် ၁၃၃၆၀ ထွက်ရှိမည့် ရေအား လျှပ်စစ်စီမံကိန်း ၇ ခုတွင် တခုအပါ အဝင် ဖြစ်လာမည်ဟု ရေးသားထားသည်။

၎င်း ရေအားလျှပ်စစ် စီမံကိန်း ၇ ခု အတွက် ၂၀၀၆ နှစ်ကုန်ပိုင်းက မြန်မာအစိုးရနှင့် CPI တို့ သဘောတူ စာချုပ် ချုပ်ဆိုခဲ့ကြသည်။

စီမံကိန်းအရ မေခမြစ်တွင် ရေကာတာ ၅ ခု၊ မလိခမြစ်တွင် ရေကာတာ ၂ ခုကို အကောင်အထည် ဖော်မည်ဖြစ်သည်။ ယခုအခါ မေခမြစ်တွင် ချီဖွေ ရေကာတာ စတင် တည်ဆောက်နေပြီဟု သိရသည်။

အစိုးရ၏ သံလွင်မြစ်ရှိ ရေကာတာ စီမံကိန်းများသည်လည်း ကန့်ကွက်ခံနေရသည်။ သံလွင်ရှိ ရေကာတာ စီမံကိန်းကြောင့် စစ်ပွဲများ၊ မတည်ငြိမ်မှုများ ပိုမို များပြားလာနိုင်သဖြင့် စီမံကိန်း ရပ်သင့်ကြောင်း ထိုင်း-မြန်မာ နယ်စပ်ဒေသမှ မြန်မာ့အရေး လှုပ်ရှားနေသည့် အဖွဲ့ ၅၁ ဖွဲ့က ပြီးခဲ့သည့် အပတ်တွင် ကြေညာခဲ့သည်။

ဧရာဝတီ