2010 ning Ra lata poi a matu KSPP pati Myitkyina e Rung nnan hpaw dat

2010 ralata poi a matu, tau hkyen lajang ai ninggam langai hku nna, Jinghpaw Mungdaw Rawt Jat Pati (KSPP) gaw, mani, Nov. 18 ya hta, Jinghpaw Mungdaw mare daju Myitkyina e rung nta n'nan hpaw dat sai re.Htap lahkawng wut dek rung hpe Myitkyina, Myu Tit gaw gap tawn ai rai nna, nta n'nan dingshawn poi hpe Hkristan htu hku jahpawt hkying 9 kawn 11 lapran, galaw wa sai lam, Myitkyina buga masha ni kawn chye lu ai.Ya ten, Kachin State Progressive Party (KSPP) gaw rung nta hkrak lu sai raitim, pati mying gaw garai n shakap shi ai lam, chye lu ai. Hpa majaw nga yang, KSPP gaw tara shang pati naw n byin shi ai majaw re lam, pati salang langai KNG de sanglang dan wa sai.Kade n na yang, hpyen asuya kawn 2010 ralata poi shang na mungmasa pati ni, mying jahpan bang na ahkaw ahkang jaw, ndau dat sai hte, KSPP mung tara shang pati byin hkra shawk shawn na re lam, pati salang ni hpe lakap let chye lu ai.KSPP pati nta dingshawn poi de marai 100 jan sa du ai hta, Myitkyina mare na J.W Hkristan nawku hpung hkum hkra hpung woi ni hte mungmasa ningbaw ningla ni mung, ahkum ara shanglawm wa sai re.Shanglawm ai ningbaw ningla nkau hta, KSPP pati ningbaw Dr. Manam Tu Ja, KIO ningbaw kaba dingsa Mali Zup Zau Mai, KIO Ninggawn Amumadu Dr. Lahkyen La Ja, NDA-K ningbaw dingsa Zahkung Ting Ying, JHZ (KBC) amumadu dingsa Rev. Dr. Lahtaw Saboi Jum hte Wa Jau Naw Din hte Myen de na du salang nkau mung shanglawm wa sai lam, poi sa masha ni kawn chye lu ai.KSPP hpe J.W uhpung uhpawng hta kaba dik KIO, NDA-K hte Myitkyina daju Wunpawng Amyusha Mungbawng Rapdaw (WMR) ni jawm hpaw ai Jinghpaw Mungdaw Pran Wan Komiti kawn dai ning shaning n'nan ten, hpaw ninghtan dat ai re.KIO gaw, Pran Wan Komiti hte KSPP ningbaw rai nga ai, KIO Tingnyang-up Malai 2 Dr. Manam Tu Ja hte rau, kaga ginjaw salang marai manga hpe, shanhte a magam lit ni kawn, lai wa sai September praw 2 ya hta shapraw kau sai, rai nga ai.Ya ten, KSPP hta pati malawm marai 100 ram du nga sai rai nna, dai hta madung KIO hte NDA-K magam gun dingsa ni, htunghking salang ni hte WMR salang nkau, shanglawm ai lam, pati shiga lawk kawn chye lu ai.Maga mi de KSPP a lak lak lai lai ahkaw ahkang lu ai lam langai gaw, Jinghpaw mungdaw kata hpyen asuya hta lai nna, kaga kaning re ai pati mung 2010 ralata poi a matu tau mungmasha zinlum na ahkaw ahkang n lu tim, tara shang pati n re ai KSPP lu galaw ai lam re.