Myen gaw, "Manau Poi" galaw hkyen ai Manau Pa hpe da sang sa htu jahten

Ndai shata hta Jinghpaw htunghking "Manau Poi hte N'lung N'nan Sha Poi kaba" galaw hkyen ai, Jinghpaw mungdaw, "Manmaw Manau Pa" hpe Myen hpyen asuya masha ni, dai ni da sang sa htu jahten sai lam, Manmaw shiga lawk kawn chye lu ai. Manmaw mare, Deng Lahkawng, Awng Ta lawk na Jinghpaw Laili Laika hte Htunghking Hpung (JLH) wang kata, manau shara hpe "nlung zaibru hte nam htun ni" nem shajin tawn ai hpe asuya ga htu jak (power shovel) langai maja shang wa nhtawm, dai hpawt hkying 10 kawn shada de pyen 2 du hkra, sa htu mahkyit jahten kau ai re lam, myi-chyaw-sakse ni tsun wa ai. Raitim, Manau nau shara ga-ang kaw shadun tawn ai Manau Shadung hpe gaw hpa n di ai lam, Manmaw JLH salang ni hpe lakap let chye lu ai. Dai hpawt hkying 8 ram hta, manau wang hta Manmaw mare na Hkalup hte Hkahtawlik hpung woi ni woi awn let akyu hpyi jawm galaw nna, galaw tawn chyalu hpun Manau Shadung hpe manau wang hta sharawt shadun ngut sai hpang, ya na zawn asuya ni manau pa sa jahten wa ai re lam, myi-chyaw-sakse ni kahtap tsun dan wa ai. Ndai zawn Manmaw manau pa sa jahten na matsun hpe, Myen hpyen asuya a Manmaw Ginwang Uphkang Dap (Hka-Ya-Ka) ningbaw Col. Khin Maung Myint jaw ai re lam, Manmaw JLH kawn chye lu ai. Manmaw buga masha langai tsun ai hta, dai ni Manmaw manau pa sa jahten ai ga htu jak hta hkan nang ai asuya masha ni kaw--- Hka-Ya-Ka ningbaw Col. Khin Maung Myint hte pyada du ni mung shanglawm ai re, nga ai. Ndai Manmaw JLH Manau Wang hta ndai Nov. 26 kawn 28 ya du hkra, "N'lung N'nan Sha Poi hte Manau Poi kaba" hpe shawa daw tsa hte wu wu di di galaw na hkyen lajang nga ai mung, rai nga ai. Kaja wa nga yang, Myen hpyen asuya a Manmaw Ginwang Uphkang Dap (Hka-Ya-Ka) kaw na mung, ndai shata hta poi kaba galaw na matu ahkang jaw da chyalu gaw re lam, htunghking salang ni kawn chye lu ai. Ndai Manmaw JLH wang hta, manau shadung, manau wang nhpan, manau wang shanglam chyinghka kaba hte manau htingnu ni hpe ngang kang ai wut bilat ni hte galaw lu na matu, seng ang ai hpyen asuya rung ni de lai wa sai March shata kawn lang hte lang ahkang hpyi yu sai raitim, ya ten du hkra n jaw ai lam, JLH salang ni kawn chye lu ai. Lai wa sai June 22 ya hta, Manmaw Hka-Ya-Ka ningbaw Khin Maung Myint gaw, Manmaw JLH komiti malawm yawng marai 40 hta na marai 5 hpe lata shaga la nhtawm, "manau shadung hte manau nta n gap sai" ngu ai lajang da chyalu laika pa kaw atik anang hkam la lakmat htu shangun sai re. Manmaw e Jinghpaw htunghking manau poi galaw ai lam hpe Myen hpyen asuya ahkang jaw ai raitim, manau shadung hpe poi ten hta sha sharawt na ahkang jaw ai rai nna, poi ngut ai hte gun kau shangun ai lam, buga masha ni kawn chye lu ai. Lai wa sai 1995 ning December shata hta J.W Hkalup Hpung Ginjaw galaw ai, Mandalay, Awng Panglai (Awng Pyin Le) na Jinghpaw Laika lu la ai 100 ning masat hku nna, wut bilat hte galaw ai "Manau Shadung Kaba" hpe mung, ya, hpyen asuya a nambat lahkawng chyam-tari Dukaba Maung Aye a matsun hte 1997 ning hta tsepkawp jahten kau ya sai re. Kaja wa gaw, Myen mung gaw Mungkan Wunpawng Hpung (UN) a "Ninggawn Shinggyim Ahkaw Ahkang Ndau Shabra Laika (UDHR)" hpe hkan sa na lam, myit hkrum lata masat htu tawn ai re. UNHR a tara kanu masat 22 hte 27 ni hta asan sha ka da ai gaw, "masha shagu tinang a htunghking hte laili laika hpe jai lang na, rawt jat hkra galaw na hte makawp maga na ahkang nga ai", nga ai. Raitim, Myen gumshem hpyen asuya gaw Jinghpaw sha n ga kaga mungdan ting na myu bawsang ni a ahkaw ahkang ni hpe magup sumhpa ladat hku, tawt lai nga dingyang re. KNG