Shada jahkrup ten, Myen hpyen n-gun Jinghpaw Mungdaw de jat nga

Ya ten, Myen hte KIO gaw KIA dap galai na ntsa jahkrup jahkrum nga ai ten, Myen hpyen asuya gaw Jinghpaw mungdaw de hpyen n-gun mayun jat bang nga ai lam, chye lu ai. Ndai June shata ga-ang kaw nna mying hkrak n chye ai Dap Nawng (Tat Ma) 2 kaw nna, majan pa shang lu ai atsam rawng ai hpyenla ni hpe Mali Hka a Sinpraw Hkran, Manmaw Ginwang mayan hte Mali Hka a Sinna Hkran, Wanleng Lam mayan hkan e mayun mayoi shara la dap jung tawn ai re lam, kam ging ai buga kata shiga lawk kawn chye ai. KIA hpyenla ni hpe Jinghpaw-Miwa ga jarit Laisin Bum e mu lu yang. Manmaw mare na myi-chyaw sakse ni tsun ai hta, ndai shata praw kawn Myen hpyen hpung ni law law hpe Manmaw hte Kai Htik mawdaw lam lapran e mu lu ai re, nga ai. Bai nna, dai shara ni hta KIA hpyen hpung ni mung gawan hkawm nga ai lam, chye lu ai. Ya hpang jahtum Myen n-gun jat ai lam gaw, ndai June shata 21, lai wa sai Laban Ya shani Jinghpaw mungdaw mare daju Myitkyina e, Myen hte KIO datkasa ni hkrum ai shaloi, KIA dap hpe "Ga Jarit Sin Hpyendap" hku n re sha, "Mungdaw Hpyendap—State Security Force" hku nga na hpe KIO datkasa ni tang jahkrup wa ai majaw re lam, KIO shiga lawk kawn chye lu ai. Ndai zuphpawng hpe Myitkyina na hpyen asuya a Dingdung Daw Daju (Ma-Pa-Hka) na Mali Hka Yikta e galaw ai hta, KIO datkasa hpung hpe Lt-Gen Gauri Zau Seng woi awn nna, Myen mada de gaw Ma-Pa-Hka d ap up (Taimu) Brig-Gen Soe Win woi ai lam, chye lu ai. Myen a matsun hpe lade nna, ya na zawn KIA dap hpe "Mungdaw Hpyendap, SSF" hku nga mayu ai lam hpe KIO datkasa ni tang madun wa ai majaw, lama na gap hkat ra wa yang jin jin (standby) rai nga na matu tau nau hkyen lajang ai hku nna, ndai zawn Myen hpyen n-gun ni Jinghpaw Mungdaw de shalaw tawn ai re lam, sagawn chye lu ai. Ndai zawn Jinghpaw Mungdaw de Myen hpyen n-gun shalaw na matsun ai wa gaw, Myen hpyen asuya a Kaichyan Dap (Tsa-Ya-Hpa snr Military Affairs Security) a lithkam Lt-Gen Ye Myit re lam, matut chye lu ai. Maga mi de, KIA hpyendap ni mung tinang hte seng ai shara ni yawng hta Myen htim gasat wa yang, bai htang ninghkap gasat na matu, shawnglam ginra na KIA hpyenla ni hkying hkum 24 tup sadi maja let nga nga sai lam, KIA shawnglam shiga lawk kawn chye lu ai.