KDA gaw Myen a N-gawn Hpyen de gale sai

Myen mungdan, Lahta Sam Mung, Jinghpaw Makawp Maga Dap (Kachin Defense Army, KDA) gaw Myen hpyen asuya a N-gawn Hpyen de gale hpaw na myit hkrum ga sadi jaw kau sai re. Myen hpyen asuya hku nna KDA hpe N-gawn Hpyen hku (Pyi-tu-sit) hkrang galai shangun ai aten loi mi na mat sai hpang, lai wa sai bat laman hta myit hkrum kau ai re lam, KDA hte ni nawn ai shiga lawk kawn chye lu ai. Dai re majaw, ya ten, Lahta Sam mung, Lashu, Kutkai, Muse hte kaga mare buga hkan na J.W amyusha ni gaw, kaning n chye di, "grai yawn let sha" nga ai lam, Muse buga masha langai tsun wa ai. Lai wa sai May shata hta sha, KDA ningbaw Mahtu Naw gaw buga salang ni hte hpung woi sara ni hpe Kawng Hka daju de alak mi zuphpawng shaga nhtawm, KDA hkrang galai na Myen shagyip shagyeng nga ai lam hpe tsun bawngban dan wa sai lam, chye lu ai. Dai zuphpawng de sa du ai buga salang ni gaw, "KDA hta buga masha ni a kashu kasha ni mung grai lawm ai majaw, ra wa jang mung garum na jin jin na majaw, Myen ga madat nna hkrang galai ai hpe n galaw na matu, hpaji jaw wa sai lam, Kutkai buga masha ni kawn chye lu ai. Ndai zawn buga salang ni hpaji jaw tawn ai ten, KDA salang nkau mung myit n hkrum lawm ai raitim, ningbaw Mahtu Naw hku nna KDA hpe N-gawn Hpyen hku nga na matu Myen hpe ga sadi jaw kau ai re lam, Kawng Hka shiga lawk kawn chye lu ai. Ningbaw Mahtu Naw woi awn ai KDA gaw shawng de kanu KIO/A a dap ba 4 rai nna, dai kawn ga garan nna Myen de shang pawng mat ai gaw, lai wa sai 1990 ning hta rai nga ai. Dai ten kawn KDA gaw Myen madi shadaw jaw ai n-gu hte kaga malu masha jarik ni hpe hkap la wa ai gaw ya ten du hkra re lam, chye lu ai. Bai nna, Jinghpaw mungdaw e daju ai, KIO/A a ga garan hpung 2 rai nga ai, NDA-K hte Lasang Awng Simsa Lam Hpung mung, Myen a matsun hte maren, inang dap hkrang galai hpaw na masing hpe myit hkrum ga sadi jaw kau sai re. Dai re majaw, ya ten, Myen a shagyip shagyeng ai lam hpe lale nga ai gaw KIO/A sha rai nga ai. KIO/A gaw Myen hpyen asuya de shi a ara "Ga Jarit Sin Hpyendap" galai na malai "Mungdaw Makawp Dap" hku na nga mayu ai lam hpe,tang shana tawn sai lam, chye lu ai.